Sustatu

Duela hiru urte, "iraultza" izan omen zen. Pokemon Go jokoak errealitate areagotua eta geokokapena nahasten berehalako arrakasta itzela izan zuen. Baina baretu egin zen tsunami hura. Orain, haren ondorengoa aurkeztu dute garatzaileek, beste frankizia batean oinarritua: Harry Potter's Wizards Unite da jokoa.

RedKaraoke Espainian sortutako mundu mailako zerbitzu nahiko ezaguna bihurtu zen, 2007an sortu zenetik. Hamabi urteko jardunaren ondoren, bi aste barru (uztailaren 20an), itxi egingo da. Karaokea etxean edo lagunartean egiteko tresna digital gisa azken 10 urteotan garatutako zerbitzuen artean 3 erabilienetan egon da mundu mailan RedKaraoke, baina ez da nahikoa izan negozio eredu iraunkor bati eusteko.

Aurreko asteburuan, TV3 telebista publikoko katalaneko programa batek Llenguaferits izeneko emanaldia eman zuen (30 minutu dira, sarean dago). Katalana hizkuntza gutxitua dela, diglosiaren arriskuan bizi dela, izan zen programaren ardatza. Besteak beste, teknologia aditu batek adibidea jarri zuen, berak nahiko zuela txigorgailuarekin (katalanez, torradora; gaztelaniaz, tostadora) katalanez egin etxean. Isekarako hartu zuten kontua elebakar espainol askok, baina, jakina, kontuak badu bere garrantzia.

Joan den astean, Eusko Jaurlaritzaren eta Euskal Wikilarien Kultura Elkartearen (EWKE) arteko hitzarmenaren balorazioa egin zuten publiko Bilboko agerraldi batean. Laguntza ofizialak bultzada eman dio Euskarazko Wikipediara, eta hainbat zifrak erakusten dute hori.

Hiri gehienetako kaleak daude kamerez beteak gaur egun. Eta Iruñekoak ez dira salbuespena. Norbaitek pentsatu du ongi etorriko dela San Fermin jaietarako kamera hauek non dauden dokumentatzea, eta kokapena emanez eta argazkiak eginez, denak bistan jarri dituzte mapa publiko honetan.

Astelehenean abiatu zen 2019ko EuskarAbentura espedizioa Mauletik, eta iraungo du uztailaren 31a arte. Ehun eta hogei nerabek hilabetean Euskal Herria zeharkatuko dute, gure txokoak, kultura eta historia hobeto ezagutzeko. Euren jarduna sare sozialetan partekatzen dute, baina aurten, berritasun gisa, aplikazio bat daukate (Android eta iOS), informazio esklusiboa partekatzen duena, senide, lagun eta EuskarAbentura jarraitu nahi dutenek zuzeneko informazioa eduki dezaten. CodeSyntaxek garatu du aplikazioa.

Whatsapp, Instagram eta Facebook-eko zenbait zerbitzu osorik edo partzialki gelditu egin ziren atzo. Bereziki, Whatsappeko erabiltzaileek igarri zuten bezala, irudi-prozesamenduan zeuden arazoak, berriketa idatzia oro har ondo baitzebilen. Irudiekin izandako arazo horietan, nahigabeko pista bat agerian utzi zuen Facebook-ek: nola etiketatzen dituzten irudi guztiak adimen artifizialeko teknikekin.

Ikerketa-txosten historiko baten berri eman du gaur Eusko Jaurlaritzak. Espainiako Gerra Zibilean eta lehen frankismoan (1936-1945) izandako hildakoei buruzko txostena eman da argitara. Ez da Espainiako Gerra Zibilak Euskal Herrian utzi zuen biktimen kontakizun konpletoa, hiru probintziatakoa baita, baina kopuru zehatz eta xehetuak eman dituzte: 20.000 lagun hil zituen gerrak Araba, Bizkaia eta Gipuzkoan. Horietarik 5.800 hildakoren kasuak gizateriaren kontrako krimenak direla ere ondorioztatu du txostenak.

Asteburu honetan bi Elkano oroituko dituzte Getarian (Gipuzkoa), munduari itsasoz bira eman izanaren 500. urteurrena betetzearen harira. Elkanoren Zeruertza izenarekin antolatu diren ekitaldi ofizial batzuen sorta dago batetik (Espainiako itsas-armadaren partaidetzarekin, besteak beste). Eta Elkanori Bira herri ekimenari lotuta, bestalde, kolonialismoaren salaketa eginez  "Etxeu Nahi Eguna" ('ez ditugu nahi') antolatu dute uztailaren 6rako.

Microsoft Store dendaren bidez erositako liburu elektronikoek funtzionatzeari utzi diote uztail honetan. Liburu batek ez badu "funtzionatzen", esan nahi du ezin dela irakurri, ez dela jada liburu bat, ex-liburu bat baizik. Inoiz inork denda horretan libururik erosi bazuen; suntsitu edo desagertu egin dira liburu horiek.

2deo euskarazko ikus-entzunezko laborategiak proiektuak garatzeko diru-laguntza deialdia plazaratu du. Deialdiaren xedea da ikus-entzunezkoen proiektuen esperimentazioaren garapena erraztea.

Donostia International Physics Center (DIPC), Nanogunea eta Materialen Fisika Zentroa (CFM) elkartu dira Zientzian Harrotasuna eguna antolatzeko Donostian. Uztailaren 5ean izango da, publiko guztietara irekia, LGTBIQ arloa ildo bezala duten bi hitzaldi eskainiko dituzte, eztabaidarako mahai inguru batekin batera.

Bost urte bete dira lehenengo PuntuEus domeinuak sareratu zirenetik (haien artean, Sustatu.eus izan zen aitzindarietako bat). Bost urtean, 10.000 domeinuraino iritsi da komunitatea. Joan den ostiralean ospakizuna egin zen urteurrena ospatzeko.

Aste honetako fenomeno biral globalak bi izan dira, Tequila kantuarekin karaokea egiten duen gizon hori, eta beste anai-arrebatxo adoragarri horiek, espainolezko azento arrotz batekin Kubako doinu zoragarria abesten dutenak. Ez dituzu ikusi? benga, elkartu lagun batekin pantailaren aurrean, eta eman klik.

Datorren astean, EHUko Uda Ikastaroetan, Euskara eta euskal kultura eremu digitalean ikastaroa izango da Donostian, Miramar Jauregian. Uztailaren 10era arte, Ikastaroa hasten den eguna, zabalik da matrikulazio-epea.

Bi euskaltzale eta kulturgileren proposamenak aste honetan, Kike Amonarriz telebistako izarrarena bata eta Goizalde Landabaso kazetari eta idazlearena bestea: Ipar eta Hego Euskal Herria banatzen duen muga arrakala izugarria da, eta gainditzen ahalegina egiteko engaiamendua behar genuke euskaldunok. Biek "galdetegi praktikoekin" ilustratu dute erreibindikazioa, gainera.

Blogari baten ekarpenean irakurri dugunetik, gai interesgarri bat Hezkuntzarekin erlazionatua: Aniztasun gela edo "dibertsi" (Diversidad hitzetik) gela berezi bat da, Derrigorrezko Bigarren Hezkuntzako (DBH) hainbat zentrutan eskaintzen dena. Gela honen helburua da DBHko titulua lortzeko zailtasunak dituzten ikasleei jarraipen zuzenagoa egin ahal izatea, eta ezaugarri interesgarriak dituzte.

Hautsak harrotuta daude TxioHerrian, Twitterreko euskarazko komunitatean. Patxi Huarte Zaldieroak esana: "Euskal TxioHerria arriskuan dago. Bai, jakin badakit hor kanpoan mundu bat dagoela, entzun dudanez, harreman fisikoekin eta zuhaitzen pean egiten diren arratsaldeko pasirekin, muxuekin eta guzti. Baina gure TxioHerria ...Auzolan bat da!. Uzten badugu euskal kulturak pairatuko du."

'El que fuma, bebe y canta' liburua kaleratuko nahi dute, udazkenean, Kubako hiru lagunek. Ray Fernandez musikari kubatarraren abestiak izango dira ardatza, Aristides Hernandez, Aresen marrazkiek ilustratuko dute. Hirugarren kubatarra Joseba Sarrionandia da: proiektua antolatzeaz eta hitzaurrea idazteaz arduratu da.

Youtubeko bideoetatik musika erauzteko zerbitzu ezagun bat, Convert2MP3, itxi berri dute. Dozenaka milioi lagunek erabiltzen dituzten tresnak dira, eta perretxikoak bezala sortu baina itxi ere egiten dira. Adibidez, euskaratuta ere bazegoen YouTube-MP3 zerbitzua 2016an itxi zen (2013an iragarri genuen Sustatun euskaraz zegoela).