"Euskal TxioHerria arriskuan dago"

Azken bizpahiru egunetan sare sozial hau utzi  dutenen artean daude Santi Leone idazlea (@ororostorm), Xabier Landabidea Txerren (@txerren) Deustuko Unibertsitateko irakaslea, Jaume Gelabert zutabegilea (@bonbergant) eta Aintzane Muguruza (@aintzanemug) Gehitu elkarteko koordinatzailea.

Kontuak ezabatu dituzte lauek: inoiz ezer esan badute, ezin da orain Twitterren irakurri. Hortaz, motiborik aipatu badute bertan, horien gaiean ez dago asko esaterik, eta elkarrekin lotuta egon daitezkeela ere espekulazioa litzateke.

Motibazio garbiena Santi Leonerena dela esan daiteke, polemika potolo samar batekin lotuta dagoelako. Duela egun batzuk salatu zuen Zuzeun, Danele Sarriugarteren Erraietarik liburuaren gaztelaniazko itzulpenaren aurkezpenean, beste idazle batek, Lucia Baskaranek mesprezuzko hitz gordinak esan zituela Hasier Etxeberria zenaren kontra.

Artikulu hark eragin zituen erreakzioen artean, Lander Arretxea ikus-entzunezkoen komentaristak Berrian argitaratuak bereziki sutu zuen Santi Leone. Erantzun batzuk utzi zituen Twitterren, eta ez bakarrik sare hau, euskarazko hedabideak ere utziko zituela esan zuen Leonek.

• Leonerena Zuzeun, eta txioetan izandako zenbait erreakzio gure Saretik biltegian.
• Arretxearena Berrian, eta txioak Saretik-en.

Harrezkero, beste iritzi batzuk ere egon dira. "Dimisioen" harira Zaldieroak esana, artikulu honen izenburu eta sarreran jarri dugu. Aipatzeko moduko beste batzuk:

Beñat Hach Embarekek Zuzeun, enpatiaren aldeko dei bat: Euskal Herrian talka birtualak ez dira hain birtualak. Hari labur bat, Katixa Agirrerena, zentzu bertsuan.

Gorka Bereziartuaren iruzkina, sakoneko Etxeberria-Baskaran kontuaz. Eta artikulu horren azpian, Gorka Erostarbe kazetariaren erantzuna, bestearen azalean jartzeko dei bat. Ikus halaber txioetan Bereziartuarenak eragindako haria.