Sustatu

Hauteskundeak ekainaren 10etik 13ra bitartean egingo dira Europa osoko herrialdeetan. Espainiar eta frantziar estatuetan ekainaren 13a izango da hauteskunde eguna. Internet bidez berehala argitaratuko dira emaitzak.

Scribus 1.1.7 – "Aliyssa" aurkeztu berri dute, programaren azken bertsioa. Autoediziorako lizentzia libredun programa da, doakoa. Azken batean, QuarkXpress-en ordezkoa da. Gainera, euskarazko itzulpena ere badago; guztira 25 hizkuntzatan eskuratu daiteke.

Lorea Agirre kazetari eta idazle beasaindarrak euskalgintzaren azkeneko urteetako historiari buruzko hitzaldia eman zuen ekainaren 4an, Donostian, Kursaalen, MIDASen batzar nagusian (Eremu Urriko eta Eskualdeko Hizkuntzetan Argitaratzen diren Egunkarien Europako Elkartea da MIDAS). Hainbat gogoetez gain, informazioa eta datuak ere eman zituen Agirrek.

Antso Jakituna Fundazioak, Eusko Jaurlaritzarekin elkarlanean, 3.000 izenburu inguru bildu ditu liburutegi digitalean; 800.000 irudi ere ikus daitezke sarean. Euskal ondare bibliografikoa helaraztea du helburu ekimenak.

Atzo aurkeztu zen Anjel Lertxundiren liburu berria, Konpainia Noblean. Euskal Herriko hedabide digital indartsuenak, El Correo Digital-ek, atera du berria. Eta Julen Gabiriari irakurri diot gaur Interneten: Espainian barriro be esango dabe euskal idazleek eskopeta kargauta idazten dabela...

Gipuzkoako Diputazioko Gizarte eta Erakunde Harremanetarako Departamentuak 2004ko Anton Abbadia saria deitu du, euskararen erabilera sustatzeko alorrean nabarmendu izan diren pertsona edo elkarteen jarduna saritzeko asmoz. Hautagaiak aurkezteko epea irailaren 30ean amaituko da.

Kafe Bar Bilbaok, Bilboko Udaleko Kultura Sailarekin elkarlanean, "Kafe Bilbao - Teatro laburreko Gidoien Saria" lehiaketaren laugarren edizioa aurkezten du. 2004ko Urriaren 31a baino lehen aurkeztu behar dira lanak.

Cybereuskadi Elkarteak Euskal Herriko webguneen ranking-a kaleratu du Alexaren datuekin. Ranking horretan oinarrituz, guk webgune euskaldun elebakarren sailkapena egin dugu. Podiumeko hiru postuetan, Sustatu, Berria eta Euskalerria.org. Zenbagarren dago zurea?

Interneten teknologiari buruzko euskaraz egindako aurreneko liburua eskuragarri dago sarean.

Acctiva izeneko enpresa batek Espainiako komunitate autonomoetako gobernuen webguneak aztertu ditu, eskuragarritasuna (accesibility) kontuan hartuta. Eskuragarritasun txarrena dutenen artean daude Eusko Jaurlaritzaren eta Nafarroako gobernuaren webguneak.

Aurreko urteotan legez, Udako Euskal Unibertsitateak zehazturik dauka 2004/2005 ikasturterako bere Irakasleen Etengabeko Prestakuntzarako eskaintza. Irakaskuntza ez-unibertsitarioaren alorrean, urtero, bere eskaintza berrizten du UEUk, datorren ikasturtea 8. izango genuke.

Gipuzkoa berrikuntzaren eta jakintzaren lurralde izan dadin, Gipuzkoako Foru Aldundiak lurralde horretan jakintza sustatzeko dekretu berritzailea kaleratu du, etengabeko ikaskuntzan oinarriturik.

Elhuyar Fundazioa Alphagalileoren partaide bihurtu zen 2003k otsailean eta hauek izan dira bere eginkizunak: Euskal Herrian egiten den ikerketaren, garapenaren eta berrikuntzen berri ematea; Alphagalileoko zuzendaritza-taldeko partaide izatea eta Alphagalileo euskarara eta gaztelaniara itzultzea.

Yuri Guitman New Yorkeko artistak Interneterako konexioa eskaintzen duen bizikleta asmatu du; WIFI haririk gabeko sarearekin konektatzen da. Atzealdeko poltsan dago ordenagailua eta antenak bizikletaren egituran daude jarrita.

Herri Arduralaritzaren Euskal Erakundeak (HAEE) web-kudeatzaileen lan-poltsa osatzeko deialdia egin du. Hiru lurralde historikoetan, EAEko Administrazio Orokorretan eta haren erakunde autonomiadunek duten edozein bulegotan aritzeko lan-poltsa da. Eskabideak aurkezteko epea ostiralean, ekainak 11, amaituko da.

Klik batzuk egin osatean webgune kurioso bat topatuko dugu. Bilatzaileetan izenak sartu eta txirrindulari askok sarera egin dutela ikus dezakezu. Markel Irizar sarera iritsi berri da: Beste Webgune Euskaldun Bat.

Zabalik dago epea lanak aurkezteko aurtengo Emakunde sarietan. Lau arlo hauek onartuko dira: komunikabideak, publizitatea, hezkuntza eta kirola. Lanak irailaren 30erako aurkeztu beharko dira.

Alemaniako ikertzaile batzuek "Brain Pong" izeneko bideojokoa garatu dute. Bideojokoak gizakiaren pentsamenduekin bakarrik funtzionatzen du. Asmakuntza berri honek agerian uzten du posible dela ordenagailua pentsamenduekin maneiatu edota erabiltzea.

Gasteizko talde batek formula bat aurkitu du, egungo etxebizitzaren arazoari irtenbidea aurkitzen diona. Formula hori edozein herritan aplika daitekeela esan du. Nork bere etxea eraikitzean dago oinarritua formula. Goienkariari adierazi dionez, "langabezian dauden herritarrei prestakuntza eskainiko zaie eta lanean hasiko dira. Soldataren zati bat etxebizitzaren sarrera ordaintzeko gordeko da". Horra hor irtenbidea.

Kontseiluko Idazkari Nagusiak, Xabier Mendigurenek, eta Kontseiluko ildo politiko instituzionalaren arduradunak, Iñaki Lasak “Hizkuntz Eskubideak! Denon Konpromisoa” manifestazioa egiteko Iruñeko Udalak jarritako oztopoen gainetik bere mezua bertan egongo dela adierazi dute.