Antso Jakituna Fundazioak euskal ondarearen liburutegi digitala sortu du
Antso Jakituna Fundazioak, Eusko Jaurlaritzarekin elkarlanean, 3.000 izenburu inguru bildu ditu liburutegi digitalean; 800.000 irudi ere ikus daitezke sarean. Euskal ondare bibliografikoa helaraztea du helburu ekimenak.
Dokumentu eta irudiak
Estreinatu berri duten Euskal Liburutegi Digitalaren Atariaren bitartez, Arabako Antso Jakituna Fundazioaren euskal funts bibliografikoko 3.000 titulu eta 800.000 irudi inguru ikusi daitezke. Gainera, aurrera begira, obra berriak gehituko dira. Sareratu diren liburuetatik 1.800 euskaraz idatzitako eskuizkribuak dira.
XV. mendetik 1934 urtera arteko dokumentuak aurkitu daitezke liburutegi digitalean. Ez dago azken 70 urteotako obrarik, Jabetza Intelektualen Legeak babesten baititu eta ezin dira Internet ezarri. Antso Jakituna Fundazioaren asmoa da obra gehiago sareratzea; Fundazioaren funts digitalean 4,5 milioi irudi eta beste 8.000 titulu daude. Oraingoz Gasteizko egoitzan (Zulueta Jauregian) bakarrik kontsulatu daitezke.
Erabiltzeko erraza
Euskal Liburutegi Digitala profesional taldeei zein herritarrei zuzenduriko ataria da, erabilera erraza eta azkarra duena. Bilaketak alfabetikoki edo bilatzailearen bidez egin daiteke. Obra bakoitzaren fitxak haren ezaugarri orokorrak jasotzen ditu: izenburua, egilea, data, hizkuntza, etab. Fitxatik liburuaren orrialde bakoitzean sartu daiteke; bertan tamaina handitzeko, gordetzeko edota inprimatzeko aukera dago.
jakinmin handiaz abiatu naiz gunea ikustera eta... liburuak iruditan jasota daudela ikusi dut. nik uste nuen 'liburutegi digitala' etxetik testu moduan irakurtzeko moduko zerbait izango zela, baina orrialdeen irudiak jaisteko behar den denborarekin irakurtzeko gogoa joaten da. lastima. ADSL batekin beharbada arinagoa izango da, baina gurean ez da oraindik halakorik.
testu bihurtzea lan gaitza izango da, baina alde ederra legoke, bilatu, kopiatu, jaitsi nahiz beste edozertarako. egunen baten egin beharko du norbaitek hori ere.