"TCP/IP Sareak" liburua sarean

"TCP/IP Sareak" liburua, sareei buruz euskaraz zuzenean idatzitako aurreneko liburua, dagoeneko eskuragarri dago Interneten, dohainik. Liburu honetan Interneten funtsa den TCP/IP sare-arkitektura eta berari lotutako aplikazioak eta segurtasun kontuak adierazten dira.

Nori zuzenduta

Unibertsitate mailako ikastaro baten oinarria izan daiteke, baina euskarazko ertaineko irakaskuntzan ere oso erabilgarria da liburua.

Beste aldetik, bere kabuz ikasi duenarentzat dago idatzita neurri handi batean, eta, beraz, birziklapena edo eguneraketa teknikoa behar duten Informatika eta Telekomunikazio profesionaleentzako ere laguntza handikoa izango da, bereziki testuinguru euskaldunean aritzen direnen kasuan, hiztegiaren aldetik egiten diren ekarpenengatik.

Edukia

Interneteko TCP/IP arkitektura sortzeko bide luzea berregingo du irakurleak liburuaren zehar, une bakoitzean sortutako arazoei erantzuna emanez. Ibilbidea arazo sinpleenetik (bi konputagailu elkarrekin komunikatu) konplexuenetara doa (mundu mailako sarez osatutako sarea eraikitzea). Tartean TCP/IP arkitektura osoa eraikiko du irakurleak, bere protokoloak (TCP, UDP, IP, IPv6, PPP, ICMP, ARP ...) eta aplikazioak (Web, FTP, DNS, Posta elektronikoa), eta hauei dagozkien estandarrak (socket interfazea, HTML, HTTP, POP3, RFC822, MIME, ...) eta arazoak aztertuz. Gainera, segurtasun kontuak ere azaltzen dira liburuan: kriptografia teknikak eta estandarrak (DES, 3DES, AES, SSL, sinadura digitalak, ziurtagiri elektronikoak, PGP, IPsec ...).

Liburuaren paperezko bertsioa joan den azaroan kaleratu zen. Orain, bere bertsio elektronikoa UPV/EHUko webgunean dago edozeinek erabiltzeko moduan, ondoko helbidean: http://www.sc.ehu.es/acwreco2/TCP_IP_Sareak/TCPIPSareak.html