Sustatu

UEUren 51. Udako Ikastaroak abian dira, #ElkarEkin leloarekin dotoretuta hainbat jardunaldi eta ikastaro antolatu dituzte, eta matrikula ireki da izena emateko.

Duela aste batzuetako BBCren erreportaia batetik ateratako datuak jarraian. Dislexia hizkuntzen arabera agertzen den modu desberdina agerikoa dela erakutsi dute ikerketek, eta euskara ere aipatzen delarik bertan, Ipar eta Hego Euskal Herriko haurren irakurketa ohituretan desberdintasunak antzeman dituztela ere agertzen da.

eLankidetzak garapenerako lankidetzaren alorrean profesionalak espezializatzeko eta prestatzeko lau beka eskaini ditu. 28 urte baina gutxiago badituzu eta tituluduna bazara, apuntatu zaitezke deialdira, ,aiatzaren 22an amaitzen da epea. eLankidetza Eusko Jaurlaritzaren organo bat da, Garapenerako Lankidetzaren Euskal Agentzia.

Prosopagnosia gaitzaren inguruko film laburra egin nahi du Ekain Martinez de Lizardui zinegileak, fikzio lan bat. Aktore lanak egiteko, Itziar Ituño eta Kepa Errastiren baiezkoa jaso du jada. Crowdfunding bat abian egon da eta dago, aurrekontuaren %55a estaltzeko; eta helburuaren gehiena betea du jada. Azken bultzadarako balio diezaiola albiste honek.

Arnaut Oihenarten hiru poema berri aurkitu ditu Gidor Bilbao EHUko Ikasketa Klasikoen Saileko irakasle eta Monumenta Linguae Vasconum taldeko ikertzaileak. Aurkikuntza nola egin duen da interesgarria halaber: sareko biltegi digitaletan bilaketak egiten. Bilaketa horien adibide batzuekin praktikoki metodo hau erakusten saiatu gara zuzeneko honetan.

Bidasoako euskara eta kulturaren azoka antolatu dute larunbaterako (maiatzak 6), Beran (Nafarroa Garaia), Topaguneak eta Pirinioetako Estrategia ekimenak. Topaketaren muina, 11:30etik 15:00etaram euskararen erabileran eta transmisioan eragiten duten egitasmoak antolatzaileen ahotik ezagutzea.

Kanaldude tokiko eta Interneteko telebistak webgunea berritu du, eta telekomunikazio zerbitzuen bide bere irismena zabaldu du Ipar Euskal Herrian. 2018tik zuen webgunea Nafarroa Beherean kokatutako ekimenak, baina orain itxuraz aldatu eta berritu da.

Aurreko urteetan bezala Literaturia  Zarautzen egingo da aurten ere. Asteburu honetan da literaturazale euskaldunen zita hau, ostiraletikigandera. Irekiera, maiatzaren 5ean, Jon Benitok irakurriko duen Manifestuarekin. Aukera aproposa Benito zarauztarra entzuteko, aste honetan bertan Espainiako Kritikaren Saria jaso baitu Lagun minak narrazio bilduma poetikoagatik.

Partituren webguneen berri eman genuenean joan den astean, bi webgune aipatuz, beste pare bat aipatu gabe utzi genituela ere gogoratu digute. Horiek ere merezita dute aipamena, bai horixe, Kantuan.eus eta Trikipediako Doinutegia.

Hona dakartzadan hitz hauek Ttap aldizkariaren asteburu honetako alean argitaratu dira, eta gorazarre bat dira elizetan ikus daitezkeen objektu bitxi horien: erlikiak, santuen objektu eta gorputz-zatien ontzi inoiz gurtuak. Objektu bitxi horien aipamenetik, konstatazio batera, Katolizismoa bera erlijiotik erlikia bilakatzera doa Euskal Herrian.

Asteko kultura albistea izan da, Gidor Bilbao filologo, euskaltzian urgazle eta irakasleak fondo digitaletan bilaketak eginez aurkitu ditu Arnaut Oihenarten poema berriak. Hala azaldu du Euskal Idazleen Elkartearen webgunean Miel Anjel Elustondok egin dion elkarrizketan. "Sarean dira Europa osoko biblioteteketako materialak ere: hortxe dugu Europeana. Denetan ikusi ahal dira liburuetako erreferentziak, eta askotan baita argazki oso onak ere." Bilbaok bere "perbertsiotxoa" azaldu du elkarrizketan: "astia dudanean han eta hemen arakatzen ibiltzea."

Euskarazko streaming plataforma posibleaz jarduteko jardunaldia antolatu dute Iruñean datorren maiatzaren 4an, ostegunarekin, Euskaltzaindiak eta Iruñeko Komunikabideak Fundazioak (IFK). Lelo honen inguruan elkartuko dira hainbat aditu eta interesatu: "Zer ekarriko liguke euskarazko streaming plataforma batek?". Izen-ematea irekia maiatzaren 2a bitartean.

Gladys del Estal informatikariaren izena daraman sariaren 3. edizioa aurkeztu dute aste honetan. PuntuEus fundazioak antolatzen duen sari honen helburua da ingurune digitalean ari diren emakume gazte euskaldunak saritzea, gazteentzat erreferente berriak sortuz eta haien lana jendarteratzearekin batera. Gladys del Estal informatikaria izan zen, EHUko Informatikako 3. promozioko ikaslea 1979an poliziak hil zuenean protesta ekologista batean Tuteran.

Euskararen langile profesionalen interesak defenditzeko lanean ari da Lanartea elkarteak agerraldia egin du aste honetan Eusko Legebiltzarrean, eta oinarrizko bost eskakizun proposatu dituzte bertan. Esate baterako, EITBn euskal kulturari berebiziko ikusgarritasunaren emateko kuotak proposatzea.

Aste honetako Twitch zuzenekoan (Segura Irratian ere emana), zenbait kontu: 

• Euskal partiturak eskuratzeko webguneei errepasobikoitza.  
• EITBren opendata ekimen berria, hurrengo foru eta udal hauteskundeen aurrikuspenekin.
• Esna Tu jokoa sarean.

Webgune berri baten notizia izan dugu (Partiturak.eus) eta horrez gain, beste bat ere antzekoa esistitzen dela etorri zaigu bururua, Jo Marisen partitura fondoa. Musika irakurtzen baduzu eta jotzen badakizu, biltegi interesgarriak biak.

Ikastolen Elkarteak eta Txikipediak erronka abiatu zuten urtarrilean, "300 baietz" leloarekin. Hau egin duten hirugarren ekitaldiaizan da, eta arrakastatsua suertatu da oso: hiru hilabeteren buruan, Euskal Herriko 28 ikastolatako ikasleek Txikipediarako 631 sarrera sortu dituzte epe honetan. Jarritako jomuga bikoiztu eta gehiago.

Euskadiko Garapenerako Gobernuz Kanpoko Erakundeen Koordinakundeak joko bat jarri du sarean, galderak erantzutekoa, zeinaren bidez kontsumoaz oro har (praktika arduratsuak, zerk eragiten duen energia gastu handiagoa, eta halakoak) ikasiko dugun, eta gainera sarietarako aukera izan dezakegun: Esna Tú jokoa da.

EITBk "Open Data atari" bat ireki berri du, eta bertako edukia hornitzeko, boto asmoari buruz egindako azken inkestako datuak sartu dituzte. Martxo amaierako datuak dira, baina begirada bat merezi dute, eta atari berrian daudenez, agian inkesta berriekin osatuko direla uste dugu, maiatzaren 28an izango baitira udal eta foru hauteskundeak Hego Euskal Herrian.

Agerraldia egin zuen atzo Euskalgintzaren Kontseiluak Iruñean, Parlamentuaren aurrean, euskararen ofizialtasunaren aldeko adierazpen bat plazaratzeko. Bestalde, ofizialtasunaren aldeko ekintza iragarri du biharko (larunbata, hilak 22) Euskal Herriak Euskaraz taldeak Bardeetan.