Sustatu

Urriaren 21ean PeriodistaDigital.com-ek Ibarretxeren gaineko albiste bat argitaratu zuen. Ibarretxek arazo psikikoak dituela baieztatzen da albistean, beste hamaika zentzugabekeriaren artean. Horren aurrean, Eusko Jaurlaritzak Estatuko Fiskal Nagusiari eskatu dio PeriodistaDigital.com-en aurka neurriak hartzeko.

Koldo Mitxelena Kulturuneko Ganbaran urriaren 27an inauguratu zen "Disidentziak oro" erakusketa. Azpititulua hau da: "Poetikak eta arte ekinbideak euskal trantsizio politikoan (1972-1982)" eta Fernando Golvanok komisariatu du. Euskadiko trantsizio politikoaren lehen hamarkadan (1972-1982) sortu ziren kulturarekin eta artearekin zerikusia duten hainbat mugimendu bateratzen dira. 2005eko urtarrila bitartean izango da zabalik erakusketa.

Irakaskuntzan urteren bat edo beste daramatenek ezagutuko dute Poxpolin zinta famatua. Orain Interneten dago eMule/eDonkey-ren sarean deskargatzeko moduan.

Berrikuntzari buruzko II. Jardunaldia antolatu dute Ikerlan Teknologia Zentroak eta Mondragón Unibertsitateak, MCC eta Ezagutzaren Clusterraren laguntzarekin. Jardunaldia azaroaren 10ean izango da, Ikerlanek Arrasaten duen egoitzan.

11:10ean eguneratua: George Bush izango da presidente, seguruenez. Ohioko botoak zenbatzea falta da baina hor ere nagusi izango dela uste da. Oraindik postaz iritsitako 210.000 botu kontatu behar dituzte eta horiek kontatuta, Ohioko emaitza ofizialak 10 bat egun barru jakingo dira.

Gipuzkoako Diputazioak berritu du Gipuzkoa.net. Diseinua erabat aldatu dute eta horrekin batera irisgarriagoa egin dute webgunea. Hala ere, Mozillarekin ez da ongi ikusten.

Antropologiak, Etnologiak eta Hizkuntzalaritzak bat egiten duten tokian eguraldiari buruz mintzatzeko gunea: zer-nolako ikuspegia daukan herriak eguraldiarekiko, zein hitz erabiltzen den ahozko euskaran fenomeno atmosferiko jakinak izendatzeko. Sasoi edo egun batzuetan dagoen eguraldia aitzaki, iruzkinak egiteko herri-gunea.

Santurtziko Udal Euskaltegiak, Eusko Jaurlaritzaren Kanpo Harremanetarako Idazkaritza Nagusiaren laguntzarekin, Hizkuntzen Portfolio Europarra ezagutarazteko kanpaina jarri du abian.

Noel filma zinemako eta telebistako pantailan estreinatuko da aldi berean, baita erabilera bakarreko DVDean ere. Erabilpen bakarreko DVDek oxigenoarekin erreakzionatzen duten geruza bat dute. Horrela, airearen eraginpean jarri eta 48 ordutara erabilgaitz gelditzen da.

Bushen agintaldiak eta Irakeko gerrak argi utzi duten zerbait berresten ari da AEBetako hauteskunde kanpaina hau: hain zuzen, Internet beste edozein komunikabide bezain baliogarria dela arerioari aurre egiteko, informazioa eta propaganda beste inork baino azkarrago zabaltzeko. Informazioa, iritzia, iseka... guztiok dute lekua Interneten. Hona hemen aurkitutako gune interesgarri batzuk.

HAEE-IVAPeko Itzultzaile Zerbitzu Ofizialak ostiralean Erroman izenpetu zen Europako Konstituzioaren euskal lehen itzulpena egin du Atzerri Arazoetako Ministerioaren eskariz. Testua Erromara eraman omen zuen dagoeneko Zapaterok.

Inork gonbidatu barik joan ginen, txartel barik. Baina izkutuan sartu ginen Durangoko kafe antzoki barrira. Egia esan, jendea asko. Edadekoa eta gazteagoa, polito polito jantzita guztiak. Gauza inportantea behar zuen, duela sei urte entzun genuena egia bihurtu dute gazte-moko batzuk. Esan eta egin. Hori sasoia!

Txillardegiren omenez Koldo Mitxelena Kulturunean urriaren 4tik 6ra ospatu ziren jardunaldietan parte hartu zuten irakasleek aurkeztutako ponentziak Interneten daude, gipuzkoakultura.net webgunean. Gainera, liburutegi digitalean badago Txillardegiren gaineko atala ere badago.

Kalean dago aktiboak ezagutzeko kudeaketa-sistema honen 8.2. bertsioa euskaraz. Ekimena Hizkuntza Politikarako Sailburuordetzarena izan da eta lana EJIErekin lankidetzan burutu da. Euskaratze-lanak UZEIk egin ditu. Sisteplant enpresak banatzen du.

Zenbatek daki futbolaz gure artean? Jende askok, itxuraz. Astelehenero aritzen dira futbol zaleak "jokalari hau atera behar zuen" eta horrelakoak esaten entrenatzaileak balira bezala. Bada, Frantziako futbol talde bateko entrenatzaileak zaleak beraiek dira eta webgune baten bidez ematen dituzte iritziak. Futbol zale askoren ametsa, dudarik gabe.

Giza espezie txiki baten hezurrak aurkitu dituzte Indonesiako irla batean. Duela 13.000 bat urte bizi izan zen eta azken 50 urteotako aurkikuntza paleo-antropologikorik garrantzitsuena dela diote adituek. Giza eboluzioaren teoria hankaz gora jarri du.

Kalean da Microsoft Office 2003ren euskarazko bertsioa. WindowsXPrekin gertatu zen moduan, Internetetik doan jaitsi daiteke modulu hau.

Gaur, hilak 28, osteguna, ospatuko du Donostian Uztaro aldizkariaren 50. zenbakia. Udako Euskal Unibertsitateak argitaratzen du UZTARO, Giza eta Gizarte Zientziaren inguruko aldizkaria.

Atzo ezkero Hego Euskal Herriko musika zaleok ere irekita ditugu iTunes Musika Dendaren ateak. Horrekin batera, Applek aurkeztu zuen iPod Photo.

Jokinen gelakide bat Donostiako institutu batera joan da eta han ere presioa jasotzen du. Harrituta dago Gabiria, nerabeen gaiak komunikabideetan tratatzen direnean Internet beti agertzen delako, txarrerako. Sustatura ekarri dugu Gabiriak Eibartarrak posta-zerrendan idatzitako artikulua.