Sustatu

Azaroaren 27an Elgoibarko IMHn nazioarteko 3. urtez antolatu da, POPBL metodologien inguruan kudeaketa berritzaileak nola lantzen diren hausnartzeko asmoz.AEBetatik Arbinger Instituteko Michael Lazan, Madrilgo CISVEMeko Miguel Velazquez, Idiazabalgo AMPOko Jon Agirre eta IMHko irakasleak izango dira hizlariak 9.30etatik aurrera.

Zestoako Euskara Zerbitzuak eta GISA elkarteak antolatuta, blogak sortzeko tailerra ospatuko da Zestoan, azaroak 29an, 10:00etatik 14:00tara. Tailerraren ondoren bazkari kolonbiarra jatera joango gara, ikasi dugunari buruz hitzegin ahal izateko.

Eusko Jaurlaritzak kultura-kontsumoari buruzko azterketa bat egin du gaur publiko: "Kultura-ohiturei, -jardunbideei eta kontsumoari buruzko estatistika Euskal Herrian 2007-2008." EAEko datuak ezezik, Nafarroakoak eta Ipar Euskal Herrikoak ere kontuan hartzen dira. Interneteko kultura kontsumoaz ere badago daturik, bereziki erabiltzaile euskaldunen ohituren inguruan.

Deustuko Unibertsitateko Euskal Gaien Institutuak eta Bizkaiko Abokatuen Bazkunak jardunaldi bat antolatu dute euskara juridikoaren inguruan, bihar asteartea, hilak 25. Gaia: teknologia berriak euskara juridikoaren esparruan.

Eusko Jaurlaritzak 702.000 euroko dirulaguntza iragarri du, Kultura eta Etxebizitza Sailen bidez, Kepa Junkeraren proiektuen nazionartekotze lanak egiteko. Gainerako artista guztientzat 230.000 euro partituko dira 2009an. Bidezkoa al da?

Ia mundu osoa astintzen ari den krisialdiaren aurrean, kooperatibek eman beharreko erantzunaz hausnartzeko aukera paregabea eskainiko digu aurtengo Arizmendi Topaketak ekitaldiak. Datorren ostegunean, hilak 27, izango da, 18:45etan, Mondragon Goi Eskola Politeknikoko Areto Nagusian, Arrasaten.

Eliseo Gil arkeologoari elkarrizketa egin diote Veleiako eskandaluaz. Ez du kasu zehatzen gainean erantzun nahi, salbu eta 15. mendeko esaldi latino batez, zeharka: "nork demostratu lehen aipua 15. mendekoa dela?" Bere defentsa nagusia da bera arkeologoa denez, piezen jatorri arkeologikoaz erantzun dezakeela, baina epigrafista ez denez, ezin du erantzun idazkunez.

Aurten, X. Hik Hasi Topaketak prestatzen ari gara eta ikasturtean zehar ere, hainbat jardunaldi antolatuko ditugu. Lehena, azaroaren 28an eta 29an izango da, DONOSTIAN eta DURANGON, hurrenez hurren. "Psikomotrizitate Praktika Haur Hezkuntzan: Pedagogia koherente baten bila" izenburupean egingo dugu jardunaldia eta gurekin izango da, besteak beste, Carles Font Bartzelonako Unibertsitate Autonomoko irakaslea.

Esanak esan, entzunak entzun, eztabaidak eztabaida, zalantzak zalantza...

"Software librearen eta kode irekiko softwarearen erabilpena Gipuzkoako toki eta foru administrazioan" da EB-Berdeak taldeko Ander Rodriguez-ek 2007ko irailean aurkeztutako eskaerari erantzunez, Gipuzkoako Batzar Nagusiek plazaratu duten txostenaren izenburua.

Veleiako aztarnategiko indusketen zuzendariak, Eliseo Gilek, aurkikuntzen benetakotasuna defenditzen jarraitzen du. Langraizen egin zuen atzo agerraldia, ez zuen galderarik onartu, eta Veleiako iruzurra salatu dituztenen txostenak "iritziak" direla esan du, ez froga zientifikoak. Iruzur akusazio zehatzetan ez du esplikaziorik eman (Descartesen kasuan salbu), eta datazio berantiarrago bat proposatu du (horrek sortzen dituen kontraesan berrietan sartu barik).

Ziurtagiriaren Elkarteak Euskaliten Kudeaketaren Kalitate eta Bikaintasunaren XIV. Europar Astearen barruan mintegia antolatu du Euskara enpresan txertatuz, berrikuntzarantz izenburupean. Bilbon izango da jardunaldia, hilaren 26an.

Azaroak 27an bukatzen da Eusko Ikaskuntzak antolatutako ENE sarian izena emateko epea. Saria Euskal Herritik kanpo Euskara bultzatzen duten erakundeei zuzenduta dago.

Veleiako ostraketan agertutako testu eta irudiak faltsuak direla ondorioztatu dute Arabako Foru Aldundiak deitutako aditu taldekoek. Ondorioz, Eliseo Gil arkeologoaren taldeari eta Lurmen enpresari Veleia ustiatzeko baimena kendu dio Diputazioak. Jarraian, atzoko txosten aurkezpenari buruzko kroniketan topatutako faltsukeriaren adibideetako batzuk (15.00etan eguneratuak gehikuntzekin).

HAP masterraren programaren barruko hitzaldia (gaztelaniaz), Rafael Carrascoren eskutik. Azaroaren 24an, astelehena. Arratsaldeko 4etan. Korta eraikinaren areto nagusia. UPV-EHU. Donostia.

ForoKoop, eztabaida kooperatiboaren foroa, aurreko urtean jarri zen martxan eta honen urteurrena ostegun honetan, Azaroak 20, ospatuko da Bilboko Euskalduna Jauregian. Gaia generoen berdintasuna kooperatibetan izango da.

Internet Zuretzat jardunaldiak Eusko Jaurlaritzak antolatu ditu, eta herriz herri egingo dira, Arabako, Gipuzkoako eta Bizkaiko hainbat ikastetxetan. Araban eta Gipuzkoan, abenduaren 1etik 4ra; eta Bizkaian abenduaren 15etik 18ra. Interneten aukerak helduei azaltzea da helburua.

Sareblog Asier Lozanok eta Borja Bonillak 2008an sortutako enpresa da. Euskaraz sortu den lehenengo blog-sare komertzialak gaur hasi du ibilbidea hiru blogekin: Musikazale, Kiroldegi eta Ondopasa.

Iñaki Mendiguren itzultzaileak bukatu J.K. Rowling-en Harry Potterren liburu sortako azkena itzultzen, eta kalean (eta sarean) dago jada 7. liburua euskaraz: Harry Potter eta Herioaren erlikiak. Ingelesez, Harry Potter and the Deathly Hallows da liburuaren izen originala.

One Laptop Per Child proiektuaren XO ordenagailua eskuratzeko aukera izango dugu gaurtik aurrera Give One Get One kanpainaren bitartez. Kanpaina horretan bi ordenagailu ordaintzen dira, bata norberarentzat eta beste bat hirugarren munduko haur batentzat.