Sustatu

Eusko Jaurlaritzako Gobernu Batzordeak astearteko bileran erabaki zuenez, Hizkuntza Politikarako Sailburuordetzak 90.000 euro emango dizkio EHUko Euskara Institutuari. Euskara Institutuak Interneten zenbait lan interesgarri garatu ditu, besteak beste: Egungo Euskararen Hiztegia; Hiztegi Batua Euskal Prosan; eta Lexikoa, Atzo eta Gaur aplikazioa. Hiruak, gainera, eduki libre gisa banatuak, Creative Commons Aitortu (cc-by) lizentziarekin jarrita baitaude sarean.

Leizaola Elkargoak antolatuta, Gutxiengo Hizkuntzen Erabilera Gazterian Sustatzeko Gauzatutako Eskarmentu Arrakastatsu eta Praktika Egokien Biltzarra egingo da Bilbon, azaroaren 20an eta 21ean, Euskalduna jauregian.

Gaur 10 urte beteko dira Federico Krutwig Sagredo euskaltzain, idazle eta intelektual euskalduna zendu zela. Data hori gogoan hartuta www.krutwig.org webgunea sortu da.

Oñatiko Ganbara Txiki Abesbatzaren V. Urteurrena ospatzeko hainbat ekitaldi antolatu dira eta horien artean azaroan zehar ospatuko diren 4 kontzertu izango dira. Azaroaren 8an eman zitzaion hasiera Ganbara Txikik, Ganbara abesbatzaren laguntzaz, eskaini zuen kontzertuarekin. Datozen asteburuetan beste hiru kontzertu izango dira.

Lehiaketara aurkeztu diren 110 blogen artean, Atarrabiako Paz de Ziganda ikastolako Anais Sánchez gazteak eskuratu du lehenengo saria Berdundis superheroia izeneko blogarekin. Bigarren saritua Donostiako La Anunciata ikastetxeko Iván Matellanes izan da, Earthman izeneko blogarengatik. Hirugarren saria, aldiz, Bilboko Luis Briñas ikastetxeko hiru ikaslek egin duten Forestwoman blogak eskuratu du.

Eusko Jaurlaritzako Hizkuntza Politikarako Sailburuordetzak eta Euskalitek mintegi bat antolatu dute azaroaren 18rako, Zamudioko Parke Teknologikoan. Izenburua hauxe da: "Praktika onak: enpresa aurreratuek euskaraz (ere) jarduten dute" Bereziki bezeroari zuzenduta dauden hiru euskal enpresa handik (Eroskik, Euskaltelek eta Kutxak) beren praktika onen berri emango dute, hizkuntza-kudeaketari dagokionez.

Sarean dago jada apertium-eu-es, euskaratik espainierarako Apertium plataforman oinarritutako itzultzaile automatiko librearen lehenengo bertsioa: erdaratu.eu webgunean probatu daiteke.

Mundu osoko idazlei zuzendutako lehiaketa honetan parte hartu nahi dutenek kontakizun bat idatzi beharko dute euskal gaiez euskaraz, gaztelaniaz, fantsesez edo ingelesez. Gehiengoz 300 hitz izan daitezke. Lanik hoberena 500 euroko saria jasoko du.

Berdintasunerako Defentsoria Erakundetik salaketa jaso du Gerediaga Elkarteak, Durangoko Azokaren antolatzaile den aldetik, 43. edizioa iragartzeko kartelak emakumeak diskriminatzen dituela arrazoituz. Hona hemen Gerediaga Elkarteak adierazten duena (Durangoko Azokaren webgunean ere argitaratu da ohar hau).

Kataluniako Generalitateak itzulpen automatikorako duen webguneak hizkuntza-bikote berriak ipini ditu erabiltzaileen esku Opentrad partzuergoak garatutako kode irekiko Apertium teknologia usatuta

Bilboko Itsas Adar Museoan 300 lagun inguru bildu ziren azaroaren 11n Tokiko Telebista Euskaldun berriaren aurkezpenean. Politikariak, enpresariak, gizarte mugimendu askotako lagunak eta erakundeetako ordezkariak bertara bildu ziren.

Duela aste batzuk erakutsi genizuen kartel hau, baina orain berriz albiste da, Eusko Jaurlaritzako Gizon eta Emakumeen Berdintasunerako Defentsa Erakundeak matxista iritzi diolako Gizon ikusezina Azokan lemari, berez lema hori kartelean ageri ez den arren. Karteleko pertsonaia gizonezko edo emakumezkoa den, hori ere ez da ondoegi nabari, egia esateko.

ItzuL -ek, EIZIE -ren posta zerrendak, hamar urte bete dituen honetan, senide jaio berria du: 2tzuL bloga, Itzultzaileen Irizpen Biltegia.

Laugarrenez jarraian, aurten ere Ikus-entzunezkoen Rallya antolatu du Topagunea Euskara Elkarteen Federazioak. Lehiaketak izen propioa estreinatuko du aurten: KAMERATOIA.

Bizkaiko Foru Aldundiak eta ESLE - Euskadiko Software Libreko Enpresen Elkarteak elkar lanerako hitzarmena sinatu dute. Horrela, orain arte ez bezala, Foru Aldundiko zerga ezberdinen laguntza programak garatzeko aukera ezberdinak aztertu eta programa horiek sistema eragile batean baino gehiagotan, bai eta software librean oinarritutakoetan ere, exekutatu ahal izango dira.

Arazoak 11. Arazoak, kezkak, galderak erantzuten saiatzen gara. Plan bat egiteko, ezdakitnora joateko, txartel bat lortzeko ahaleginak eta bi egiten ditugu. Informazioa batu, kudeatu, eskaini eta zabaltzen dugu. Gure panel, leiho eta pantailetatik.

Elhuyar Fundazioak antolatuta, Bioteknologia eta Gizartea, harreman konplexua izeneko hitzaldia eskainiko du Leire Escajedo Zuzenbidean doktoreak, azaroaren 13an Donostiako Koldo Mitxelenan, goizeko 11:00etan. Hitzaldiaz gain, Bioteknologiaren aurrerapen osasungarri eta jasangarria liburua aurkeztuko da.

Gaurtik hasita, noizbehinka elkarrizketaren bat egin eta jarriko dut nire blogean. Elkarrizketa sorta horiei hasiera ematen diona Eider Rodriguezi egindako hau da. Hizketagaia, bere azken liburua, Haragia. Edozein aitzakia aprobetxatzen dut liburu hau jendeari gomendatzeko.

Azpidazki EHU barruko administrazio eta zerbitzuetako pertsonalak erabiltzeko gomendio, arau eta baliabideak biltzen ditu. Baina horrez gain, edonork ohiko hizkuntza zalantzak argitu nahiko balitu, hemen du aukera. Azpidazki berria apirilean jaio bazen ere, azaroan hasi da lehen pausoak ematen, azaroan hasi da katamarran eta jolasean.

Caja Vital Kutxa-k eta Ceia-k Arabako Enpresa Berritzaileen Sorkuntzarako VI. Lehiaketarako deia egin dute aurten ere. 2.000-10.000 eurora bitarteko bost sari emango dira eskudirutan, eta 7.000 euroko zerbitzu poltsak. Proposamenak aurkezteko azken eguna azaroaren 28a da.