Sustatu

Aurreko azken urte hauetan bezala, "Klima Egonaldia" antolatu du Bizi mugimenduak, klimaren gaiari lotuko diren militante berriak trebatzeko, ekintzaile berrien uda eskola baten gisara.

Soziolinguistika Klusterrak, Jendaurrean Erabili ikerketa taldearen bitartez, "COVID-19aren eragina erakundeen komunikazio publikoan" lana burutu eta aurkeztu du, Irati Agirreazkuenaga eta Eduardo Apodakak zuzendutako lana. Txostena hemen eskuratu daiteke. Besteak beste, ikerketak ondorioztatu du telelanaren eta tresna digitalen erabilen areagotuak jarraitu egingo duela komunikazio publikoan.

Gipuzkoako Foru Aldundiak Gipuzkoako turismo informazioa Whatsappeko bot baten bidez ematen duen sistema garatu da, eta Arantxat jarri diote izena (txat edo berriketa automatizatua eskaintzen duelako. Euskaraz (eta beste hiru hizkuntzatan), agindu eta galdera sinpleak osatzeko sistema bat da, informazio lortzeko whatsappean.

Ez Nafarroako ez Espainiako gobernuek ez dute deus egiteko asmorik ETB3 Nafarroa guztian ikusi ahal izateko. Hitz atseginez, baina azken finean horixe jakinarazi dio Nafarroako Gobernuak Administrazioa Euskaraz taldeari, ekainaren 18ko idazki baten bidez. Badira zenbait konponbide tekniko posible, baina Espainiako Gobernuak, PSOEren eskuetan baitago, Nafarroakoa bezala, ezetz esan zien guztiei, 2020ko azaroan, orduan izan baitzuten horri buruzko bilera azken aldiz bi gobernuek.

Adam Tranter garraio eutsigarriaren aldeko aktibista bat da Coventry hirian, Ingalaterran. Bere auzoko kale batean, atsedenleku publikiorik ez zegoen lekuan, ibilgailuentzako gordetako toki batean eserleku bat jarri zuen, eta udalak kendu egin zion, ibilgailuentzako tokia zelakoan. Konponbidea asmatu zuen Tranterrek: ibilgailu batean jarri eserlekua.

‘La Voix des Autres / Besteen ahotsa’ kongresua antolatu dute Laval Unibertsitateak, Etxepare Euskal Institutuak, Quebeceko PEN klubak eta Euskal PEN klubak elkarlanean, ‘Saison Québec - Pays Basque’ kultur trukaketa egitasmoaren baitan. Modu telematikoan garatuko da 2021eko urriaren 13tik 14ra bitartean. Eleaniztasuna eta literatura izango du hizpide.

Kikarartean Kt On Barakaldoko artisten plataforma birtuala da. Kt On hori irakurri daiteke bi modutan, Kate On edo Kultura Online bezala eta Youtubeko kanal bat bezala gauzatu da oraingoz, non programatxo bat egin duten, Jauzia izenekoa, nagusiki euskaraz. 

Eusko Jaurlaritzaren eta SPRI bere sustapen agentziaren bultzadarekin da BDCC, Basque District of Culture and Creativity delakoa, Kultura eta Sormenaren Euskal Barrutia. Euskal Autonomia Erkidegoko ekonomia-garapenerako kultura-industriak duen balio estrategikoa aitortu eta sustatzeko plataforma gisa aurkeztu dute.

Iaz bezala, aurten ere pandemiagatik ez da San Fermin jairik; baina Sanfermin78Gogoan herri ekimenak urtero antolatzen duen German Rodriguez gogoratzeko ekitaldia egin egin da, eta jendetsua izan da. Egia, justizia eta erreparazioa exijitu dute berriz ere, izan ere, 1978an Iruñeko jaietan gertatu zenagatik inor ez zein epaitua edo zigortua izan, eta ildo horretan, sekretupean diren dokumentu guztiak argitaratzea eskatu dute.

Gaur bete dira 5 urte Euskal Wikilarien Kultura Elkartea sortu zela. Euskarazko Wikipediaren "gobernantza" bere esku hartzen duen kultura elkartea da, Wikipediaren gobernantza orokorrean errekonozitutako kapitulu edo adar bat. Wikimedia Fundazio globalak domeinu propioarekin lan egiten uzten duen munduko talde gutxienetako bat, kasu honetan Wikimedia.eus -en bidez.

Erridikulua, baina garesti ordaindua. 225.000 euroko garapena kostatu zuen webgune batek segurtasun zulo handi bat izan du Madrilgo Erkidego Autonomoan. NAN zenbaki bat sartu, eta pertsona baten helbidea eta telefono zuzena lortzen ahal ziren, besteak beste. Espainiako erregearen edo ministroen datu horiek arakatu zituzten batzuek ordu batzuez.

Atzo aipatu genuen nola sekulako beroa datorren iberiar penintsulara asteburuan, eta nola hirietan itzala aurkitzeko mapa-aplikazio bat garatu duten. Gerora, gazteleraz idatzitako hari interesgarri bat aurkitu dugu: hiriak, beroak, itzala eta beroketa arintzeko estrategia urbanoak dira gaia; protagonista batekin, hirietako zuhaitz landaketa.

Historia liburu bat da, baina kutsu literarioa du, eta ilustratua dator gainera. Eta emakumeen ikusgarritasunaren aldeko mezua dakar, noski, Cira Crespo historialariak eta Elena Ciordia ilustratzaileak egin dute "Baginen: Euskal Herriko historia emakumeen bitartez".

Shadowmap itzala non egongo den esaten dizu mapa global bat da. Austriako kartografo teknologiko batzuek sortu dute, Nextzen enpresakoek, eta datu kartografiko asko erabiltzen dituzte, batzuk libreak (OpenStreetMap) eta beste batzuk beste iturri batzuetakoak. Itzalaren norabidea jakiteko, jakina eraikinen eta terrenoaren bertikaltasuna ere kontuan hartzen dute beren kartografian.

EAEko Justizia administrazioan Nafarroan sortu eta dagoeneko ezarritako Avantius sistema informaitkoa (kudeatzaile prozesala) ezarriko dute. Albiste ona, Foru Komunitateko Gobernua eta Eusko Jaurlaritza baliabideak partekatzen ikustea baina, albiste txarra, gaztelera hutsez funtzionatzen duen sistema dela Avantius.

Heptamerona Nafarroako Margarita erreginak frantsesez 1559an idatzitako ipuin liburua da. Guztira 72 ipuin edo istoriok osatzen dute liburua, eta egunez egun dayde antolatuta daude, zazpi eguneko itxialdi baten gertatuak balira bezala. 2020ko pandemia eta itxialdiaren garaian izan zuren zenbait litreaturzale euskaltzalek (Booktegi plataformaren ingurukoek) hau euskaratzeko ideia, eta hortik diru-bilketa, Itsulapikoa plataformaren bidez antolatua.

Julen Gabiriaren kexua duela egun batzuk, Euskadi Literatura Sarietan bakarrik adierazten direla nor diren irabazle. Zergatik ez finalistak? Nominazio edo aukera guztiak aipatu gabe, eredu bat izan zitekeen Pulitzer Sariek egiten duena; saria ematearekin batera, finalista batzuk izendatu.

Enpresetako hizkuntza planak, euskararen sustapen eta erabilerako plangintza, duela zenbait urte daude gure artean. Era berean, Bai Euskarari elkarteari esker, edo Euskalit bitartez, euskalduntze ahaleginaren ziurtagiriak ere egiten dira, konpromiso jakin batzuk betetzen direlako. Eta horiek normalak izan arren, ekimen ez oso ohikoa iruditu zaigo Izarkom telekomunikazioetako koopetatibak hartutako urratsak: beraien hizkuntza-politika publiko egin dute.

Ekain amaieran aurkeztu zen Euskal LGTBI+ Behatokia. Aldarte, AMPGYL, Bizigay, Errespetuz, Gaylespol, Gehitu, Izanez, LGTBerri eta Naizen elkarteek sustaturiko ekimena da. Euskal Autonomia Erkidegoa delarik Espainiako Estatuan  kolektiboaren eskubideak babesteko LGTBI+ legerik ez duen erkidego bakarra, egiteko hori bere gain hartu du Behatoki berriak.

"Euskararen jabekuntza, kudeaketa eta hizkuntza-praktikak XXI. mendean", izenburu hori duen masterra EHUk jarri zuen martxan 2020/2021 ikasturtean Eusko Jaurlaritzaren Hizkuntza Politika Sailburuordetzarekin (HPS) lankidetzan, eta EHUko Euskara Institutuaren ardurapean. Irailean hasiko da master horren bigarren edizioa eta bi urtekoa izango da (2021/2023).