Aste honetako Egunean Behin jokoko babeslea da Kutxa Fundazioa, eta bere Hitzetatik Ekintzetara egitasmoa, zenbait eragilerekin gauzatuko dena hurrengo egunetan zehar. "Klik agenda" deitzen dutena prestatu dute: eragileekin lankidetzan, ekintza bat da klik bat, aurten aukeratu den kausarekin inplikatzeko hgizartea (kausa hori da hizkuntza eta kultura aniztasuna) Maiatzetik ekainera, 19 jarduera/klik egingo dira lurralde osoan, eta horietako batean, Egunean Behin egiten duen enpresak, CodeSyntax-ek parte hartuko du: Hitzak Opari izenekoa, maiatzaren 21ean egingo da Aretxabaletako Huhezi kanpusean, goizez.

"Teknologia burujabea Euskal Herrian? Zure proiektua ezagutu nahi dugu!": horrela egin du deia Euskarabildua jardunaldiaren antolakuntzak hurrengo ediziorako proposamen eskea eginez. "Azaroan Euskarabildua jardunaldiaren 14. edizioa ospatuko da eta Euskal Herriko esperientzia eta proiektuak partekatu nahi ditugu."

Euskarazko aplikazioa garatu dute hiru lagunek, Katedra izena emanda: pilota partiden inguruan pronostikoak edo kinileka eginez jolastea da kontua (ez dugu esango jokatzea, dirurik gabeko lehia sanoa baita app-ekoa). Asteburu honetako buruz buruko lehiaketako final laurdenetako partidekin kiniela egin nahi? Gaur bertan aukera, gauerdira bitartean!

Aste gutxi batzuetako etenaren ondoren, atzo egin genuen Twitchen eta Segura Irratian ohiko zuzenekoa. Podkast artifizial horiek euskaraz hain modu bitxian egiten dituen NotebookLM tresnara konektatu ginen, beldurrez ez ote dituen Segura-Sustatu elkarrizketak ordezkatuko horrek. Halako batean saiatu beharko garela pensatu genuen, lau artikulu nabarmen eman makinari, eta ea gure zuzenekoaren jarduna ordezkatzeko gauza den AA! Bestalde, apiril amaierako itzalaldiaren ondoren, hurrengorako beharko genituzkeen tresna sorta errepasatu genuen.

Aste honetan, eta denboraldian ere bai, Ipuskoa 1025 / 2025 ekimenak babesten du Egunean Behineko jokoa. Gipuzkoako kulturarekin zerikusia duten lau opari sorta bikoitza emango dituzte Gipuzkoako Foru Aldunditik, eta merezi du errepasotxo bat egitea zer sorta jasoko dituzten irabazleak eta zozketa bidezko beste jokalari batek.

Adimen emozionalarena beti iruditu zait susmagarri samarra niri, eta badakit honetan jende gehiena ez dela ados egongo nirekin. Baina tira, noa gaurko auzira. Kontua da oraintsu adimen artifizialaren (AA) inguruan zabaltzen ari den joera eta moldeetan, adimen emozionalarekin lotu daitekeen ukitu edo jite bat sartzen ari direla sistema horietan. Eta emaitzak, negargarritik oso arriskutsura egoteko bidean daude. AA sikofanteak sortu dituzte, koipelustreak esango dut nik. Eta potentzialki min asko emateko modukoak.

Gaur arratsaldean hasiko da Erroman (Vatikanoan, nahiago baduzue) konklabea, hurrengo aita santua aukeratzeko biltzarra. Aukera aprobetxatu dugu Egunean Behin jokoan galdera sorta sartzeko. Lasai, konklabea laster amai daitekeela uste da, eta aitasantugarrien galderek ez dute asko iraungo. Hala ere, errepaso bat egin diezaiogun batzarraren eta bozketen mekanikari.

Datozen asteetan iritsiko dira liburudendetara Kilimak koaderno jostagarriak, Ikaselkar hezkuntza-argitaletxearen eskutik. Euskaraz eta euskaratik sortuak izan dira, oporraldian ere euskaraz jolasteko eta gozatzeko.

Artikulua idatzi zuen joan den astean Iban Zaldua idazleak bere blogean izenburu honekin: Korporazio zitalak. Bi kontu aipatuz, nagusiki. Batetik, oparoa dela korporazio zital, maltzur, evil horien tradizioa; zientzia fikzioan bereziki. Bestetik, fantasiako mundutik, fikziotik, nola hartu duen izena enpresa batek, Palantir; eta horixe dela, une honetan, mundu errealen topa dezakegun korporazio erreal gaizto eta higuingarri baten adibide paradigmatiko bat. Eta, hara!, duela 10 urteko Sustatu artikulu bat oroitarazi digu sarrerak.

Gaur zortzi izan zen, apirilaren 28an, itzalaldi orokor hori Hego Euskal Herrian. Biharamunean, gailu pare bat aipatu genituen balekoak izan daitezkeenak ez sarerik ez argindarrik dagoenerako. Eta pare bat iturritatik etorri zaigu iradokizuna gehitu daitekeela beste hardware pieza interesgarri bat: irratia duten telefonoak. Istorio bitxia dute hauek: duela 20 urte ohikoak ziren, baina gaur egunean ez.

Martxoan informatu genuen zer den Iradi proiektua, nola Legebiltzarrean akordioa egon zen hura bultzatzeko, eta orain arte izan dena azaldu genuen: software libreko hezkuntza plataforma. Lehen esperimentazio fasean bost ikastetxek hartu zuten parte, gero beste 13, eta orain deialdia ireki da beste 12 gehitu daitezen eta Iradi hurrengo ikasturtean, 2025-26an, ezartzeko. Maiatzaren 9a arte dago epea, eta EAEko ikastetxe interesatuek Berritzegune Nagusian aurkeztu behar duten beren interesa.

Iragarri genuen bezala, asteazkenean (apirilak 30) izan zen mahai-ingurua EHUn, Euskararen Erronkak unibertso digitalean: Adimen Artifiziala. Hizlari izan ziren Xabier Arregi Hitz Zentrokoa, Leire BarañanoEuskorporakoa, Aitzol Astigarraga Elhuyar eta Oraikoa, eta Jon Sarasua (telematikoki atzerritik) Euskaltzaindiko Euskararen Gogoetagunekoa. Osorik ikus dezakezue grabaketa hemen, eta laburpen bat irakurri.

Bi aste eskas gelditzen dira Euskaraldia hasteko (maiatzaren 15etik 25era izango da), eta ia dena prest dago ariketari ekiteko, gaur Lekeition egin den aurkezpenean antolatzaileek adierazi dutenez. Euskaraldian jarrera aktiboa izateko deia egin diete herritarrei, gogoratuz izena-ematea oraindik irekita dagoela, euskaraldia.eus gunean. Txapak banatzen hasi dira jada herrietan; ariketa eroso egiteko ezinbesteko identifikagarria jaso dezakete, beraz, herritarrek.