Sustatu

Duela egun batzuetatik Berbaxerka euskarazko joko eta erronka, Berria egunkariaren webgunearekin integratuta dago, hemen: Berria.eus/berbaxerka . Jokoaren euskal bertsioaren sortzaileek, Marc Font informatikariak eta Gorka Salces irakasleak, asteartean aurkeztu zuten integrazioa, Martxelo Otamendi zuzendariarekin. Jokoaren mekanika berdin jarraituko du, baina Euskaltzaindiaren hiztegiaren bertsioarekin eta onartutako hitzen zerrendarekin orrazketa egin dute Berriaren euskara arduradunek eta jokoaren garatzaileek.

Zuzenekoan, irratiz zen Twitchen, euskarazko sareko Wikitribia joko berrian aritu dira Luistxo Fernandez eta Iñigo Arrese. Horrez gain, r/place delako sareko esperimentu erraldoian ikurrinak bizi izan dituen abenturak esplikatzen saiatu gara.

Vocaroo da podcastak edo oro har audioak grabatzeko onlineko tresna. Ezer deskargatu gabe eta erregistrorik gabe audioak grabatzeko eta partekatzeko tresna. Oso aproposa ikasleekin erabiltzeko. Tutoriala prestatu dute euskaraz nola erabili ikasteko.

Wordle hitzezkoa eta geografikoa euskaratu zituen enpresak, Talaiosek, beste jolas edo denborapasa arin bat euskaratu, kanpoko eredu bat egokituz berriz ere. Wikitribia da jokoa eta euskarazko Wikipedian jatorria duten hainbat eduki kronologikoki ordenatzea edo kronogramak egitea da gakoa.

Atzo hil zen Andoni Mujika Ulazia, 58 urte zituela. Durangaldeko eta Debagoieneko proiektu euskaltzale, kooperatibista eta hezitzaileetan ibilitako pertsona. Bera gogoratu duten mezu batzuk jaso ditu adibidez Goienak.

Lau egunez Redditek antolatutako borroka estetiko edo esperimentu bitxia, r/Place izenekoa, hondarrezko mandala tibetar bat bezala amaitu zen: egindako guztia ezereztaturik. Milioi bat pixeleko lan eta borroka kolektiboan, dena den, ikurrina pare bati eustea lortu zuten hainbat erabiltzaile euskaldunek, ezabaketa saiakerei aurre eginez.

Frantzisko Aita Santuak 'Miñan' liburua gomendatu du kazetarien aurreko agerpen batean, migrazioaren drama aipatzen zuelarik. Maltara egin berri du bidaia Frantziskok, eta itzuleran, ohi duen bezala, berriketaldi izan du kazetariekin, informalki baina informatzeko baimenarekin egin ohi dituen agerpen horietako batean. Gaztelerazko eta katalanezko edizioa argitaratu duen Blackie Books argitaletxeak zabaldu du bideoa, era guk Amaia Ereñaga kazetariarengandik jakin dugu albistea.

22. Korrika honen ezaugarri nabarmen bat zuzenean bide osoa 10 egunez jarraitzeko gaitasuna da. Youtube kanalean edo ETBren webgune berezian, 24 orduz hor da, eta edozein unetan ehundaka lagun ikusten ari direla ematen du. Asteburuan elurrarekin batera ikusi diren irudiek, epikaren eta estetikaren sublimazio hori, lagunduko zuten agian ikus-entzunezko bereziaren arrakastan. Albiste hau argitaratzeko unean, adibidez, 700 ikusle konektatuta.

Duela hiru egun egin genuen zuzenekoa (irratian eta Twitchen), eta OpenAI GPT3 izeneko tresna batekin egindako jolasa edo esperimentua egin genuen zuzenean. Testua sorkuntza automatikoa egiten du tresna horrek ingelesez, eta hor jarri du probatan, ea Sustatu edo Segura Irratia nola deskribatzen dituen.

Gaur hasten da Donostiako Giza Eskubideen Zinemaldia, eta honekin lotuta online jolas bat proposatu dute, Begira Tú izenekoa; galdera batzuen bidez zuk zeuk zein begirada zinefilorekin begiratzen diozun munduari erakutsiko dizu jokoak. Gaurdanik apirilaren 8a arte dago jokoa irekia, eta amaieran parte-hartzaileen artean 5 bonu zozkatuko ditugu Donostiako Saretuz kontsumo eraldatzailearen sareko dendetan gastatzeko.

Testu sorkuntza automatikoarekin Barredromoa ekitaldian (ikus iragarpena eta kronika) Olatz Perez de Viñaspre informatikariak adimen artifizialaren alorrean egindako aurrerakuntzak erakutsi zizkigun, OpenAI GPT3 izeneko tresna batekin egindako jolasak erakutsiz. Segura Irratian eta Twitch bidez esperimentua errepikatzen saiatu gara, eta nahiko ondo irten zaigu. Orain testuzko azalpen bat jarraian.

Dibertigarria izan zen atzo UEUk, bere 50. urteurrenaren eta Korrika Kulturularen aitzakia bikoitzarekin, Eibarren antolatu zuen zientzia-bakarrizketen Barredromoa ekitaldia. Guztiaren laburpena eman barik, bi zientzialarik eman zizkiguten lezio praktiko deskribatuko dizkizuegu. Esperimentu txiki bat egiteko denbora eman digu (!), eta minutu batzuk barru (10:40 aldera), Segura Irratiaren eta Twitch-eko Sustaturen zuzenekoaren bidez ere erakutsiko dizuegu.

Gaur Trans Ikusgarritasunaren Nazioarteko Eguna da. Gaiarekin zerikusia duen argitalpen bat kaleratu zen joan den hilabetean, "EAE-ko trans emakumeen lan-egoera". Txosten eta liburuxka (gaztelaniaz eta euskaraz argitaratu da), sarean ere aurki daiteke formatu digitaletan (PDF, ePub, Mobi). Ikerketak 10 emakume trans eta lan-harreman arloko 6 profesionalekin eginiko elkarrizketak jaso ditu, eta hainbat ondorio eta proposamen nabarmendu ditu. 

Euskarafobia du gaitzat Argia aldizkariaren Larrun pentsamendu gehigarriaren azken aleak, 272. zenbakiak. Larrun hori lantzen jardun duen Lander Arbelaitz Argia erredaktoreak hari batean aurkeztu ditu Larrunera eraman dituzten puntuetako batzuk, eta hona elkarlotuta dakartzagu.

Google euskaraz konfiguratuta daukazue? ba Oscar Irabazleak bilatu eta euskarazko zerrenda osoa agertuko zaizue lehen orrian, ordenagailuko lehen bilaketan, irabazlea nabarmenduta eta gainerako hautagaiak txikiago.

Irabazi Arte telesailaren istorioan onarrituta, aplikazio formatuan komiki interaktiboa argitaratu du EITBk, EITBLab-ek sustatutako ekimenean. Nerea Loiola idazleak eta Aitziber Alonso ilustratzaileak sortutako "Irabazi Arte: Iraganeko mamua" komikia da aplikazioak erakusten duena. Eta bi bertsiotan dago eskuragai, euskaraz eta katalanez.

"1992ko udazkenean hilabete igaro nuen Ukrainan, oporraldi berezi samar batean", dio Luistxo Fernandez Sustatuko editoreak Ttap agerkari digitalerako grabatutako audio pieza honetan. Orduan, 1992an, "desegituraketa ekonomiko hartan ikara pixkat ematen zuten oportunismo mafiosoaren zantzu batzuk ikusi nituen, eta baita ultra-nazionalismo oso gogor batenak". 

Informatikari Euskaldunen Biltzarraren 11. edizioa duela lau urte izan zen. Pandemia tartean, 2020an egin behar zena bertan behera geratu zen, baina 2022 honetan tokatuko da azkenean IEB 2022, 12. edizioa.  Donostian izango da uztailaren 1ean, eta adimen artifiziala izango da gaia, aurreko deialdi frustraturako aukeratu zen gai bera, materiak gaurkotasunik haldu ez duelakoan. Aurreko gizaldi amaieratik antolatzen ditu IEB biltzarrak UEUko Informatika Sailak.

Aurreko asteko probaren ondoren, Sustaturen Twitch kanala inauguratua geratu da 2022ko martxoaren 24ko emanaldi honekin. Badira urte parea kolaboratzen dugula Segura Irratiarekin, ostegun goizetan 10:40etan Goizerokoa atalarekin bat eginez zuzenean teknologia gaiak komentatzeko. Luistxo Fernandez Sustatuko editoreak bat egiten du Iñigo Arrese esatariarekin, eta biak izango dira twitch emanaldi hauen protagonistak. Hemendik aurrera, telebistako edo pseudo-telebistako zuzeneko saio bat izango da hau. Ale honetan hain zuzen horretaz jardun dugu nagusiki; zuzeneko ikus-entzunekoek euskaraz Interneten duten tokiaz eta etorkizunaz.

Seaskaren bigarren hezkuntzako ikastetxea, Etxepare Lizeoa, Frantziako Estatuko ikastetxe onentzat jo dute (2315etik lehena). Zerrenda egin ohi du urtero 'L'etudiant' webguneak, eta aste honetan argitaratu du bere 2022ko sailkapena, batez ere ikasleek Baxoa azterketan lortzen duten emaitza aintzat hartuta egindakoa.