Sustatu

Nafarroako udalek kale-izendegiak on-line ikusteko aplikazioa izango dute. Programa Lotura enpresak sortu du, flash teknologia bidez, eta Nafarroako Gobernuko Toki Administrazioa Departamentuaren ekimena da.

Appleberri blogean, MacWorld 2007 biltzarrean atzo San Frantziskon (AEB) aurkeztutako Apple produktu berri biren (AppleTV multimedia estazioa eta iPhone) informazioa dago. Bertatik ala urrunetik, jarraipen zehatza egin dio Biltzarrari blog honen maczale euskaldun saiatuak.

Gero eta jende gehiagok darabil Firefox Interneten nabigatzeko. Mundu osoan milioiak eta milioiak dira erabiltzaileak. Euskal Herrian ere, gero eta gehiago. Asko, ordea, oraindik ez dira ausartzen saltoa ematera. Horientzat, hainbat testigantza ekarri ditugu hona; batzuk adituak dira Internet kontuetan eta beste batzuk, erabiltzaile hutsak. Denok kontatuko digute zergatik darabilten Firefox.

Kontseiluak Euskal Autonomia Erkidegoan onartutako aurrekontuen balorazioa egin du, 'aurrerapausoak' ikusi dituela nabarmenduz. 2006 urtea bukatu baino lehen Kontseiluak euskarak aurrekontuetan aurten behar duen igoera aldarrikatu zuen eta aurtengo EAEko kontuetan igoera lortu izanagatik pozik azaldu da. "Esaten genuen euskararen normalizazioak baliabide handiagoak behar zituela eta aldaketa hauek arrazoia eman digute", adierazi dute Kontseiluko ordezkariek. Halaber, gogorarazi du datozen urteotan hazkundearekin segitu beharko dela.

Duela 5 hilabete, 2006ko abuztuan, sortu zen del.icio.us zerbitzuaren Loturak izeneko klona. Euskaraz, gaztelaniaz, katalaneraz, gailegoz eta ingelesez sortu zuten zerbitzua, baina aste honetan, urtarrilaren 15ean itxi egingo dute.

2006ko telebista audientzien laburpena argitaratu du Urtzi Urkizuk bere blogean. Araban, Bizkaian eta Gipuzkoan ETB1ek sei hamarreko galdu ditu 2006. urtean, Sofresen arabera. 2005ean %5eko batez bestekoa izan zuen euskarazko kateak eta 2006an %4,4koa. Askoz handiagoa izan da ETB2ren jaitsiera, bi puntu eta sei hamarrekoa: %18,4tik %15,8ra. Baina EITBk irakurketa positiboa egin zuen herenegun kontu honena.

Google Zeitgeist izenarekin, munduko bilatzaile indartsuenak, termino bilatuenen zerrendak argitaratzen ditu aldika. Urteroko laburpenak joera garrantzitsuen seinaletzat jotzen ziren. Baina deskubritu da, 2006rako eman zigutena, Bebo zela termino bilatuena, ez dela egia.

Txikichef (Hariadna Editoriala, 2006), Mugaritz jatetxeko sukaldariak egindako liburua, 'Gourmand World Cookbook Awards 2006'en irabazle da. Sari hauek, sukaldeko liburuen 'Oscar'tzat hartzen dira. Nazio mailan jasotako sari honen ondoren, Andoni Luis Adurizen liburua, mundu mailako lehiaketan parte hartuko du, Munduko Gastronomia Haur-Liburu Onena kategorian, estatu bakoitzeko ordezkariekin.

Hizkuntza Politikarako Sailburuordetzaren 2007ko aurrekontua aurkeztu zuten atzo Patxi Baztarrika sailburuordeak eta bere kolaboratzaile estuenek. Aurrekontuek bi urtetan izandako igoera nabarmendu zuten eta, besteak beste, euskarazko itzultzaile automatiko bat sortzeko ekimena bultzatuko dutela esan zuten.

Eskualdez eskualdeko Hitza egunkari euskaldunek RSS jarioak gehitu dizkiete beren edizio digitalei. Aurrerapausu bat hainbat herritan informazio lokala euskaraz Internetetik jaso ahal izateko.

Azken aldi honetan Google besterik ez dugu gogoan, baina Google nahiko bilatzaile eskasa da euskaraz bilatzeko, euskal gramatikaren izaera dela-eta: Googlek hitz osoak bakarrik hartzen ditu aintzat eta ezin dugu atzizkiekin osatutako hitzen artean bilatu. Hori desabantaila handia da gainontzeko hizkuntzen aurrean. Lehendik eskas eta Googlek oraindik gehiago eskasten gaitu.

IEB2007, Informatikari Euskaldunen 6. Bilkura aurten izango da, maiatzaren 11n. Web 2.0 hemen izango da bilkuraren gai nagusia. IEB bilkurak UEUk antolatu ditu, eta oraingo honetan, blog batekin bideratuko dute Bilkuraren antolakuntza, Unibertsitatea.net gunean.

(Oporretan izan garen egunetako batean, albistea gertatu eta hau kargatu zuen irakurle batek). Gaur abenduak 30 ditu, arratsaldeko 20.30ak dira mezu hau idazten hasi naizenean. Gaur, goizeko 9.00etan Madrilgo Barajas aireportuan lehergailu bat zartarazi dute. baieztapen ofizialik ezean, denek ETAri leporatzen diote eztanda. ETA izan zein ez izan, Euskal Herrian ondorio nabarmenak izaten ari den berria da, zalantzarik gabe.

Gaur ostirala 22 eta bihar larunbata, Feministaldia Donostian, Plazandreok-ek antolatuta, beste batzuen laguntzarekin. Webgunea, bloga, mapa sarean... Jardunaldietara ekarri dituzten gonbidatu asko bezala, Internetekin oso ondo lotutako ekimena.

LaSexta telebista kateak futbol partiduak euskaraz ere ematen ditu seinale digitalez, baina Euskaltelek ez die euskarazko audio seinale hori banatzen bere kablearen bezeroei. Euskaltel, euskal hitza bere izenean daraman enpresa euskal kultura babesten egongo behar litzatekeena, euskararen kontrako ekintzak gauzatzen dago.

eguneraketa, abenduak 22. Ez dakigu protesta honen ondorioz den, baina irakurle batek dioskunez atzo jada euskarazko audioa eman zuela Euskalteleko kableak

Librezale elkarteak zerbitzu berri interesgarria jarri du martxan; software euskaratzeetan laguntzeko, Pootle sistema ezarri dute zerbitzari batean. Orain arte egindako hainbat itzulpen lanen itzulpenak (.po fitxategiak), bertan ezarri dituzte, Firefox eta Mozilla proiektuko zenbait bereziki, eta bi proiektu berriren itzulpena burutu nahi dute orain: VLC eta Xfce.

Iñaki Gabilondo atzo "La 4" TV.ko albistegietan: "Elurra ari du mara-mara baina Espainia ekialdean, ez prezeski gehien behar duten lekuan, Valencian baizik. Eski estazioetan malutarik ere ez...". Albisteak duen oihartzuna orohar halakoxea... "Arraroa, Valencian elurra!" Ez al dute ba nahi? Gure blogean jorratu dugu gaia.

Orain dela lau hilabete geroztik badugu Nireblog euskaraz, Blogak euskaraz eta doain sortzeko beste gune bat. Ezaugarrietako batzuk: Blog zerbitzu batek dituen aukera ia guztiak eskaintzen ditu. Aipagarrienak: pertsona desberdinek Blog bera idatzi ahal izatea (baimen desberdinekin), Tag sistema, berezko URL-a duten Blogak, inportazio sistema Blogger (edo inportazio aukera ematen duen edozein sistematik), neurrira egokitutako diseinua, Trackback-ak,...

BBS edo foro itxurako parte-hartzerako webgune bat jarri du martxan Eusko Legebiltzarrak. Galdera edo gaiak proposatu daitezke, orokorrean, edo talde parlamentario jakin bati zuzenduta.

Aurtengo Durangoko Azokako liburu arrakastatsuenetakoa izan da "Pololoak 2: Poxpoliñaren bahiketa", Patxi Gallegok Xabinaitor superheroiaz idatzitako komiki-liburua. Dagoeneko irakurri dutenentzat nahiz oraindik ezagutzen ez dutenentzat interesa duelakoan, sortzailearengana jo dugu galdezka.