Sustatu

Jardunaldi interesgarria antolatzen du datorren astean Donostian 2deo laborategiak: Hizkuntza aniztasuna eta ikus-entzunezkoak digitalizazio garaian. Euskal Herriko, Finlandiako eta Eskoziako adituekin. Euskaraz eta ingelesez izango da jardunaldia.

Salaketa triste bat egin du Galder Gonzalez euskarazko Wikipediako editoreak: "Ikasturtea hasi da. Informatika ordua hasi da. Wikipedia bandalizatzeko sasoia da". Ikasle euskaldunei esaten dietenean Wikipediako orriak editatu daitezkeela, eta ordenagailu aurrean uzten dituzunean, tontakeriak egiteko aprobetxatzen dute askok tamalez.

Gaur aurkeztu da Bergaran "Telesforo Monzon eLAB Euskal Herrigintza Laborategia" delakoa, think-tank euskaldun baten eran: "Euskal estatu baterako ideia-laborategi bat da", azaldu dute aurzkepean. Iratxe Esnaola da laborategiko presidentea, eta Urko Aiartza zuzendaria. Ez dirudi oraingoz webgunerik duenik ekimenak (guk ez dugu aurkitu behintzat). ZUZENKETA, 2019-09-16: Badu webgunea, TelesforoMonzonLab.eus. Eskerrik asko zuzendu digun lagunari (erantzunetan).

Jon Barberena bertsolari eta poeta nafarra (Elizondo, 1979) gaur goizean hil da. 2007ko eta 2008ko Nafarroako Bertsolari Txapelketetan txapeldunorde izan zen, eta “Izoztu zitzaigun negu hura” (2016, Denonartean) liburua argitaratu zuen.

Zaharrunoon teknologia zen biniloarena. Gure gazte denborako (eta are gure aitona-amonen garaiko) "teknologia". 80. hamarkadan CDak agertu ziren arte. Teknologia digitalaren eraginez, biniloak ia-ia desagertzera iritsi ziren, baina azken urteotan bueltan datoz. 1986az geroztik lehenengoz, aurten binilo gehiago salduko omen da CDak baino. 

Euskal Herriko Unibertsitateko NIK ikerketa taldeak, euskalgintzako eragile nagusi batzuekin batera (Kontseilua, Elkar, Berria, Elhuyar, AEK, Emun, Ikastolen Elkartea eta Topagunea) 'Euskararen marka' izeneko ikerketa proiektua garatzen hasi da. Egitasmoaren muina da markagintzan eta marketinean baliatzen diren teknikak hizkuntza plangintzara ekartzea.

"Euskarazko datu libreen sorkuntza, elkartrukea eta zabalpena" sustatzeko asmoz argitaratu du deialdiaUEUk, Euskal Wikilarien Kultur Elkartearen laguntzarekin. Ikerketa-lanaren iraupena 8 hilabetekoa izango da, originala izan beharko da, eta 5000 euroko 2 diru-poltsa aurreikusten dira. Eskaerak aurkezteko epea 2019ko urriaren 25ean bukatuko da. Izen-ematea eta informazio osoa, UEUren webgunean.

Azken asteetan aldaketa txiki baina esanguratsu batzuk sartu ditugu Sustatun. Batetik, uztailetik aurrera, ez dugu jada Saretik ataleko "albistegi automatikoaren" ekarpenik azalera ekartzen. Komunitatearen ekarpenak eta, batez ere, Sustatuk berak landutako artikuluak dira orain azalaren eduki osoa. Bestetik, ordenagailuko diseinuko azala ere aldatu dugu, sinpletuz. Jada ez dago mosaikoa (ikus irudia eta esan diezaiogun agur), baizik eta betiko blog eskema klasiko eta sinpleagoa: goitik beherako albiste hurrenkera klasikoa. IKT informazio zuzen eta argi ematen jarraitzeko asmo berritu baten seinale dira, laster 18 urte beteko ditugularik (azaroan).

Zine elkarteen arteko lankidetzaz eta berauen onuraz hitz egingo da irailaren 14ko jardunaldi batean Donostian. Bazkal ondoren zineklub desberdinentzat interesgarria: Espainia mailako banatzaile desberdinak etorriko dira beraien proiektu eta produktuak aurkeztera. Antolatzailea Donostia bertako zineklub beteranoa da, Kresala.

Food Hack Lab Donostiako Tabakalera espazioan garatu den ideia bat da. Aurtengo denboraldiko lehen tailerra aste honetan bertan dute, sukaldaritza tenperatura baxuan, astearte eta ostegun arratsaldean, Basque Culinary Centerreko bi graduatu eta aditurekin.

Aste honetan martxan da Mingaina Dantzan udaleku programaren lehen txanda (beste bat izango da aste pare bat barru). Euskarazko udalekuak dira, baina enfoke linguistiko berezkoarekin: Udaleku hauetan euskara modu ezberdinetan bizi duten gazteak bilduko dira eta elkar lagunduz hizkuntza indartsua, atsegina eta anitza dela ikusten saiatuko dira begiraleak.

Hasier Larrea ingeniari donostiarrak proiektu pilotu bat garatu zuen duela urte batzuk MIT insititituan: CityHome zeritzon, eta modularki eraldatzen ziren altzari eta espazio batzuk ziren funtsa. Proiektu hura enpresa bihurtu zen (Ori Living), eta aurten inbertsio handiak eta Ikearekin kontratu handi bat lortu du.

Netflix, Filmin, Youtube eta antzekoek ikus-entzunezkoak kontsumitzeko molde berriak ekarri dituzte eta, egoera horretan, euskararen moduko hizkuntzek galtzaile ateratzeko aukera asko dituztela. Fenomeno horri buruz informazioa bildu eta gogoeta egiteko helburuz Ezkerraberri fundazioak jardunaldia antolatu du, urriaren 4an, Bilbon: 'Ikus-entzunezkoen erronkak Europako hizkuntza ez-hegemonikoentzat'.

Passion for Knowledge DIPC Donostiako Fisika Ikertegiak urtero antolatzen duen zientzia dibulgazioaren jaialdia da. Irailaren 30ean hasi eta urriaren lehen astean luzatuko da. Donostian dira ekitaldi gehienak, baina egongo dira hitzaldiak baita Bilbon eta Iruñean ere.

Aste honetan, bi zientzialari ikertzaile eta dibulgatzaile euskaldunek kontakizun etsituak egin dituzte zientziagintza instituzionalizatua nola dagoen eratua, eta zein zaila da merituak egitea segurtasuna emango duten ikerkuntza postuak lortzeko. Kasu desberdinak azaldu dituzte Joseba Rios Garaizarrek eta Koldo Garciak, baina biak batera aipatzea ondo letorkeela pentsatu dugu, biek sare sozialetan dibulgazio interesgarria egiten baitute euskaraz (eta ez da hori prezeski jende askok egiten duen zerbait)

Iñigo Muguruza, baxu eta gitarrajole irundarra, hil da 54 urterekin. Kortatu sortu zuen 1984an Fermin Muguruza anaiarekin eta talde haren ondoren beste hainbat proiektutan parte hartu zuen. 2015ean utzi zituen eszenatokiak eta gaixotasunak eraman du azkenean (esklerasoi anizkoitza zeukan, duela laur urte diagnostikatua).

Hilabete honetan hiru lehiaketa jarri ditu abian Euskal Wikilarien Elkarteak euskarazko Wikipediarako. Bi lotuta daude "WikiLovesMonuments" mundu mailako lehiaketarekin, baina kasu honetan ez da mundu osoarekin lehiatu behar, Euskal Herriko "monumentu izendatuetan" irudiak eta artikuluak hobetzea baita kontua.

Iaz egin zen lehen aldiz, arrakasta handiz nonbait, eta aurten berriro egingo da AnsibleFest. Bilbon, irailaren 6-7an, bohar eta etzi beraz. BilbaoArte Fundazioan (Urazurrutia Kalea 32) izango da topaketa.

Badira zortzi urte Amazon denda liburu elektronikoak saltzen ari dela Espainian, baina Hego Euskal Herriko erabiltzaileek debekatua izan dute orain arte aukera sinple bat: ezin zenion libururik oparitu zure kontutik, beste Kindle baten jabeari. Aurtengo abuztuan ezabatu dute murrizketa. Beste norbaiti liburua erosteko aukeraz gain, doako bidalketak egiteko aukera ere badago, eta hori ere azalduko dugu.

Hirugarren urtez egingo da aurten, Bizkaia Zientzia Plaza jaialdia Bilbon. Zientzia-dibulgazioko jaialdi handi hau irailaren 18tik 25era egingo da aurten, hiru egoitzatan: Bilboko Euskalduna Jauregian, UPV/EHUko Bizkaia Aretoan eta Bidebarrieta Liburutegian.