Sustatu

Eibarko Udalak eta UEUk antolatzen dute urte bitik behin Juan San Martin beka, ikerlari izan zen Juan San Martin eibartarrak landu zituen gaien inguruko ikerketak sustatzeko. Aurtengo deialdia aste honetan ireki da eta urriaren 11ra arte egongo da zabalik. Aurtengo ikerketa-gaia Historia izango da. 

Galder Segurola informatikariak boluntarioen laguntzarekin sortutako aplikazioa da Kantari. Bizkaia aldeko zenbait kantu kolektiboko ekitalditan dexente erabiltzen da: Bilbo Kantari, Zorrotza Kantari, Plentzia Kantari, Gabon Kantak, Athletic Kantari... Izatez kantaldi horietan erabiltzeko sortu izan diren euskal abestien liburuxka digitalak biltzen ditu.

Datorren irailaren 26an, euskal eskola publikoaren inguruko jardunaldi bat izango da Bilbon, Unamuno institutuan, izenburu honekin: Gaur eta biharko hezkuntza erronkak. Antolatzaileak dira Euskal Eskola Publikoaren Zuzendaritza elkarteen Federazioa (Heize) eta Euskal Herriko Ikasleen Gurasoen Konfederazioa (EHIGE).

Gauza jakina da, honezkero, Halloween gaua, azken urteetako inportazio arrotza izateaz aparte, duela ez hainbeste Euskal Herrian bertan kalabaza eta guzti egiten ziren Arimen Gauaren aldaera baizik ez dela. Oier Araolaza antropologoaren artikuluak, Ahotsak ekimenaren bideo ezaguna... Ezagutza zabaltzetik urrats bat aurrera emateko garaia ere badela pentsatu dute UEUk eta Topagunea: ikastaro bat proposatu du ospakizuna klabe euskaldunetan egin/berreskuratzeko. Urriaren 31ko gau beltzerako prestatzeko, orain hasi plangintza!

Jardunaldi interesgarria antolatzen du datorren astean Donostian 2deo laborategiak: Hizkuntza aniztasuna eta ikus-entzunezkoak digitalizazio garaian. Euskal Herriko, Finlandiako eta Eskoziako adituekin. Euskaraz eta ingelesez izango da jardunaldia.

Salaketa triste bat egin du Galder Gonzalez euskarazko Wikipediako editoreak: "Ikasturtea hasi da. Informatika ordua hasi da. Wikipedia bandalizatzeko sasoia da". Ikasle euskaldunei esaten dietenean Wikipediako orriak editatu daitezkeela, eta ordenagailu aurrean uzten dituzunean, tontakeriak egiteko aprobetxatzen dute askok tamalez.

Gaur aurkeztu da Bergaran "Telesforo Monzon eLAB Euskal Herrigintza Laborategia" delakoa, think-tank euskaldun baten eran: "Euskal estatu baterako ideia-laborategi bat da", azaldu dute aurzkepean. Iratxe Esnaola da laborategiko presidentea, eta Urko Aiartza zuzendaria. Ez dirudi oraingoz webgunerik duenik ekimenak (guk ez dugu aurkitu behintzat). ZUZENKETA, 2019-09-16: Badu webgunea, TelesforoMonzonLab.eus. Eskerrik asko zuzendu digun lagunari (erantzunetan).

Jon Barberena bertsolari eta poeta nafarra (Elizondo, 1979) gaur goizean hil da. 2007ko eta 2008ko Nafarroako Bertsolari Txapelketetan txapeldunorde izan zen, eta “Izoztu zitzaigun negu hura” (2016, Denonartean) liburua argitaratu zuen.

Zaharrunoon teknologia zen biniloarena. Gure gazte denborako (eta are gure aitona-amonen garaiko) "teknologia". 80. hamarkadan CDak agertu ziren arte. Teknologia digitalaren eraginez, biniloak ia-ia desagertzera iritsi ziren, baina azken urteotan bueltan datoz. 1986az geroztik lehenengoz, aurten binilo gehiago salduko omen da CDak baino. 

Euskal Herriko Unibertsitateko NIK ikerketa taldeak, euskalgintzako eragile nagusi batzuekin batera (Kontseilua, Elkar, Berria, Elhuyar, AEK, Emun, Ikastolen Elkartea eta Topagunea) 'Euskararen marka' izeneko ikerketa proiektua garatzen hasi da. Egitasmoaren muina da markagintzan eta marketinean baliatzen diren teknikak hizkuntza plangintzara ekartzea.

"Euskarazko datu libreen sorkuntza, elkartrukea eta zabalpena" sustatzeko asmoz argitaratu du deialdiaUEUk, Euskal Wikilarien Kultur Elkartearen laguntzarekin. Ikerketa-lanaren iraupena 8 hilabetekoa izango da, originala izan beharko da, eta 5000 euroko 2 diru-poltsa aurreikusten dira. Eskaerak aurkezteko epea 2019ko urriaren 25ean bukatuko da. Izen-ematea eta informazio osoa, UEUren webgunean.

Azken asteetan aldaketa txiki baina esanguratsu batzuk sartu ditugu Sustatun. Batetik, uztailetik aurrera, ez dugu jada Saretik ataleko "albistegi automatikoaren" ekarpenik azalera ekartzen. Komunitatearen ekarpenak eta, batez ere, Sustatuk berak landutako artikuluak dira orain azalaren eduki osoa. Bestetik, ordenagailuko diseinuko azala ere aldatu dugu, sinpletuz. Jada ez dago mosaikoa (ikus irudia eta esan diezaiogun agur), baizik eta betiko blog eskema klasiko eta sinpleagoa: goitik beherako albiste hurrenkera klasikoa. IKT informazio zuzen eta argi ematen jarraitzeko asmo berritu baten seinale dira, laster 18 urte beteko ditugularik (azaroan).

Zine elkarteen arteko lankidetzaz eta berauen onuraz hitz egingo da irailaren 14ko jardunaldi batean Donostian. Bazkal ondoren zineklub desberdinentzat interesgarria: Espainia mailako banatzaile desberdinak etorriko dira beraien proiektu eta produktuak aurkeztera. Antolatzailea Donostia bertako zineklub beteranoa da, Kresala.