Sustatu

Joan zen astelehenean sareratu zen Kronika.eus berritua, Urumea bailarako albisteak biltzen dituen hedabidea. Kronikarekin burutzen da Tokikom Elkarteko hedabideek azken urtean izandako berrikuntza prozesua, urte betean 20 tokiko hedabideren webguneak eraberritu baitira, Tokikomek eta Codesyntaxek elkarlanean garatu duten web-plataformari esker.

Duela urtebete zer esana eman zuen Europako Batasuneko Batzordeak erabaki zuela neguko/udako ordutegi aldaketak aplikatzeari utziko zitzaiola. Urtebeteren buruan, ez dago zantzurik erabakia gauzatuko denik. Urte batzuez ordua aldatzen jarraituko dugula ematen du.

Datorren astean (urriak 28) Yahook murriztu egingo ditu Yahoo Groups posta-zerrendak kudeatzeko sistema historikoaren gaitasun asko: artxiboak desagertu egingo direla ematen du, eta mezu banaketak jarraituko duen arren, harpidetza aukerak asko murriztuko dira. Garai batean, euskarazko Interneteko jardunaren ardatzetako bat izan zen Yahoo Groups, baina oraingo murrizketa hauek ez dute eraginik izango ia inorengan ere, uste dugunez.

Donostia Kultura irrati publiko kulturala hasi da uhinetan Donostian. Egiazki lehendik kultura-etxe batera lotuta zegoen Casares Irratiaren "berjaiotza" bat da, baina izen eta identitate berri batekin fase berri batean hasi da. Momentuz Irratia.DonostiaKultura.eus webgunean zuzeneko seinalea entzun daiteke bakarrik, baina laster irekiko omen da webgune oso bat, podcast bilduma eta guzti.

Ahostegunak datorren urriaren 31n hasiko den ekimen bat izango da, Donostiako EHUren kanpusean garatuko dena, eta hilabetez luzatuko dena. Ikasle-martxarekin lotutako ostegunei erreferentzia ginez, Ahozko kultur sorkuntzarekin ondo pasatzeko saioak izango dira. Antolatzaileak dira Mintzola, EHUko Mikel Laboa Katedra, Euskaltzaindia eta EHUKultura.

Bihar eta etzi, urriaren 24 eta 25ean, Tokiko Hedabideen Pirinio-Arteko Topaketa egingo da Katalunian (CIMP, katalanezko sigleta), Euskal Herritik joandako partaidetza nabarmen batekin. Izan ere, antolatzailea AMIC erakunde katalana da, baina elkarte laguntzaile nagusiak dira Hekimen eta Tokikom euskaldunak. La Seu d'Urgell hirian izango da topaketa.