Sustatu

Eusko Jaurlaritzaren Enplegu Zerbitzua da Lanbide, eta orain langabeentzat eskaintzen dituen 585 ikastaroetatik guztiak dira gaztelaniaz. Tira, guztiak ez: euskara ikastaro bat dago, euskaraz. Beraz, 584 gaztelaniaz, eta euskara ikastaroa (1), euskaraz.

Sustatuko editore Luistxo Fernandezen kolaborazioa Euskadi Irratiko Amarauna saioan, Gorka Juliorekin batera, esplikatzen Berbaxerka bezalako joko batek zergatik duen erakarpena. Egunean Behin, Wordle eta beste adibide batzuekin ilustratuta.

Telesforo Monzon eLab Euskal Herrigintza laborategia (TM eLab) hirugarren edizioa aurkeztu du, 2020tik egiten digardue Naziometro edo Euskal Burujabetzaren Barometroarena. Urtarril honetan argitaratutako inkestan, burujabetzaren aldeko jarreraren datuak eman dituzte oro har.

Gaur hasten delarik Zuberoako maskaraden zikloa Atharratzen (egutegiaz informatu genuen hemen), bere egutegia nolabait inauteriaren zikloarekin lotua dago. Eta hau, halaber, elizaren Pazkoako egutegi liturgiko mugikorrarekin. Zeren baita kalkulatzen da? Horretaz ere Dantzan.eus-ek informatu zuen bere garaian, eta hona ekarriko dugu gogorakizuna.

Euskadiko Filmategiak, DIPCk (Donostia International Physics Center) eta Zinemaldiak urtero antolatzen duten Zinema eta Zientzia ekitldia etengabe hazten da edizio berri bakoitzean. Ekimen honen bosgarren hitzordua izango denak berrogeita hamar proiekzio inguru izango ditu bost egoitzatan banatuta. Ohiko hirurei (Donostiako Tabakalera, Bilboko Arte Ederren Museoa eta Donibane Lohizuneko Le Sélect zinema) Gasteizko Artium museoa eta Iruñeko Golem-Baiona zinemak gehituko zaizkie. Programazio eklektikoa izango dute, nazioarteko zientzialari entzutetsuen presentziarekin gizarteari hausnarketa kritikoa eta kulturarekiko estimua areagotzeko.

Inauterietako zikloa gainean da, eta lehen seinale gisa, Maskaradak Zuberoan. Aurten Atharratze eta Alozeko gazteek prestatu dituzte. Asteburu honetan egingo dute lehena igandez Atharratzen (errepika batzuk egin dituzte aurreko egunetan, dena dela). Dantzan.eus-en eskutik, egutegia jarraian.

Gaur bete dira 10 urte Jose Luis Alvarez Enparantza,Txillardegi, hil zela. Hizkuntzalari abertzale eta euskaltzalea erreibindikatzeko unea ere bada, Donostiako Udal Liburutegi nagusiari Txillardegiren izena emateko ekimena berriabatu baita. Hemen webgunea sinadura bilketarekin: https://txillardegiliburutegia.eus/ 

Astelehenean eman genuen Wordle jokoaren famaren berri hemen Sustatun, eta ostiralerako euskaraz dugu jada.Berbaxerka euskaraz agertu eta astebetera. Euskarazko joko adiktiboen urtea izango da 2022? Talaios enpresaren eskurik etorri da Wordle euskaraz: hemen joka daiteke.

Albiste da Donostian Mirakontxan etxe bat eraitsi eta beste hotel bat egingo dutela.  Aitzakia ematen digu horrek Haritik Hirira Donostiako informazioarekin lan egiten duen Twitterreko kontuaren informazioa ekartzeko hona. Hotel eta turismo-etxeen ugaritasunak Donostiari nola eragiten dioten ondo dokumentatzen dute, eta hari bat egin zuten duela aste batzuk datu jakingarriekin.

Duela egun batzuk euskarazko "urteko hitzen" berri ematerakoan (Berriak eta Euskaltzaindiak txerto eta aldaera aukeraturik), Gaurko Hitza ekimenaren lehiaketa irekita zegoela jakinarazi genizuen. 2021ean hautaturiko hitzen artean, zabalkunde gehiena izan zutenak batu zituenGaurko Hitzaren egile Maite Goñik, eta bozketaren ondoren, sorgin-gurpil izan da hautatua.

2021ean hasi zituen Eneko Oroz Ameslariak BakarrikEdoBi zuzeneko-podkast berezi ia esperimentalak, Twitter Spaces azpiegitura erabilita. Gaur asteazkena, urtarrilak 12 gaueko 22.00etan, abisatu digunez, "Twitterreko Espazioetatik ikusentzunezko formatura egingo dugu salto, horrelako gauza bereziek ospatuak izatea merezi dutelako". Gaia izango da Lasarte-Oriako Euskararen Maratoiak 10. edizioa duela, horren inguruan jardutea.

Duela egun batzuk zientzia egutegi biren berri eman genizuen, biak euskaraz eta emakumezko zientzialariak aipatzen zituztenak, eta gaur beste baten berri eman da: 2022 Eskolako Egutegi Zientifikoa, Espaniako CSIC erakundeak bultzatzen duena eta euskaraz ere ateratzen dena duela hiru urtetik hona. Euskarazko bertsioak EHUko Kultura Zientifikoko Katedraren laguntza izan du prestaketan, eta hemendik aurrera izango du banaketan.

Urtzi Odriozola astro-argazkilaria da, teleskopioz eta ordenagailuaren laguntza teknologikoarekin, espazioko objektuen argazkilaritza landu duena azken hilabeteotan. Atzo bere irudi onenetako batzuk Wikipedian partekatuko zituela iragarri zituen. Hona bere ekarpena, ikus-entzunezko fitxategien Wikipediako atalean, Wikimedia Commons-en.

Berbaxerka sortu, hemen Sustatun iragarri, eta berehala nahiko modako bihurtu dela ematen du. Katalanez Paraulogic-ek bezala, Berbaxerkak euskaraz erakarmena daukala ematen du. Eta hitz jokoak modan dauden beste seinale bat, Wordle jokoaren popularitatea nazioartean. Ingelesez puztuz joan da bere erabilpena azken asteetan, eta oraintsu katalanezko eta gaztelerazko bertsioak sortu dira jada.

Bai Euskarari elkarteak euskarazko lan eskaintzen berri ematen duen Lansarean.eus webgunea berritu du berriki. 2014an sortu zuen webgune hau Bai Euskarari Ziurtagiriaren Elkarteak. Erakunde honen zioa arlo soziekonomikoaren euskalduntzean eragitea delarik, Lansarea plataformak bere bidea egin du jada urte hauetan. Erabilpenaren aldetik, 2017an izan zuen jada berrikuntza bat, eta 2022 hau funtzionalitate gehigarriekin hasui dute. 

Emakumezko zientzialarien lana ardatz hartuta, euskarazko bi egutegi argitaratu dira 2022rako, Elhuyarrena eta Itelazporena (hau elebiduna, gazteleraz ere baitago).

Datorren urtarrilaren 14an beteko dira 10 urte Jose Luis Alvarez Enparantza, Txillardegi, hil zela. Euskalaritzako eta euskal politikako figura erraldoia gogoratzeko, zenbait ekitaldi antolatu dira Donostian.

Azken asteetan Katalunian zabalkundea eta sona lortu duen Paraulogic hitz jokoaren euskarazko bertsioa sortu dute: Berbaxerka. Web bidez jokatzen da, baina mugikorrerako ere ondo egokitua dago. Probatu hemen: https://berbaxerka.gitlab.io/# 

Beñat Irasuegi kooperatibista eta teknofiloak musika banaketarako plataforma interesgarri baten berri eman du Twitterren: Resonate.is. Irasuegiren azalpenean, "musika plataforma kooperatiboa" da Resonate, eta "musikaren ekonomia berri bat proposatu nahi du, zuzentasuna, gardentasuna eta kooperazioan oinarrituta."

Iskander Barrena Larrabetzuko biologo eta argazkilari bat da. Natura erretratatzen berezitua (hartan ehiztariek egindako kalteez egindako argazki sorta bat komentatu genuen iaz Sustatun). Webgune propioan (Natura Argazkitan / IskanderBarrena.com) argitaratzen ditu bere sortak eta irudi onenak, eta bertatik etxerako kopiak ere agindu ditzakezu.