Sustatu

Duela urtebete hil zen Aitor Sarasua Maritxalar bertsolaria. Zehazki azaroaren 14an bete zen urteurrenaren harira, behin Aitorrek osatu zituen bertso batzuk musikatu dituzte familiako lagunen artean. Emaitza, "Ilun beltzean" bideoa, hunkigarria da.

Berria egunkariaren podcast feminista da Berria FM. "Puri-purian dauden gaiei genero ikuspegitik heltzeko espazioa" izango dela adierazi du euskarazko egunkariak. Bi astetik behin, asteazkenetan patxadaz landuko dira gaiak, 25-30 minutuko tarteetan. Saioa Maider Galardi kazetariak gidatuko du, baina hainbat kolaboratzailek eta Berriako beste zenbait langilek ere parte hartuko dute bertan.

Durangoko Azokaren barruan izaten den Kabia teknologien atalak badu jada aurtengo egitaraua, Azokaren 54. ediziokoa (aurten abenduaren 5etik 8ra izango da).

Hizkuntza politikaren alorreko lankidetza Protokoloaren Jarraipen Batzordeak hizkuntza ofizialak bultzatzea aldarrikatu du Bilbon, "akordioa eta hizkuntza bizikidetza" oinarri hartuta, eta Espainian eratu behar duen hurrengo gobernuari hizkuntza gutxituen aldeko neurriak eskatu dizkio. EAEko, Nafarroako, Galiziako, Kataluniako, Balear Uharteetako eta Valentziako gobernuetako ordezkariek urteroko ohiko bilera egin dute, berezko hizkuntzak sustatzeko ekintzak koordinatzeko, eta aurten Euskal Herrian egin da topaketa.

Zenbait zientzalarik argitaratu duten artikulu baten arabera, balea bakar batek 30.000 zuhaitzek adina karbonoren "kaptura" eragin dezake naturan, eta hortaz, baleen ugalketa karbono isurketen kontrolerako neurri eraginkorra izan liteke. Karbono kontrolerako neurriek duten prezioen arabera, bi milioi dolarreko balioa luke baleak berak, merkatuko prezioetan. Ikerketa, bitxia bada ere, Nazioarteko Diru Funtsa edo IMF delakoaren webgunean argitaratu da, hango estatistiken arduradun bati ideia interesgarria okurritu zitzaiolako honetaz azterketa egitea.