Presst, euskal kiosko digital bat sarean
Bihar, urriaren 23 asteartea, irekiko da Presst, sareko kioskoa. Euskal Herriko hiru hedabide-talderen egunkariak eta erlazionatutako aldizkariak (Gara, Noticias Taldea eta Berria) sarean kontsultatu eta erosteko aukera emango du. Eguneko aleak erosi ahal izango dira, edo harpidetza egin (hilekoa zein urtekoa). Ordenagailu, mugikor eta tableterako egokituta egongo da.
Argazkiak.org | Presst, sareko kioskoa © cc-by-sa: sustatu
Sareko kiosko berrian egongo diren produktuak hiru hedabide talderenak dira: Euskal Komunikabideen Hedapenerako Elkartea (EKHE, besteak beste Gara egunkaria argitaratzen duena), Noticias Taldea, eta Berriaren partaidetza ere izango du. Gainera, etorkizunean beste hedabide batzuk gehitzeko aukera ere aztertzen hasi dira, esate baterako, Kataluniako zenbait, Naiz.info-k argitaratu durenez. Ipar Euskal Herriko Le Journal du Pays Basque ere irakurri ahal izango da.
Kioskoaren funtzionamendua oso xinplea izango da. Goizeko 5etarako, eguneko egunkari eta aldizkariak sarean egongo dira erabiltzaile guztien esku (egunkarien gehigarriak eta aldizkariak barne).
Esan bezala, eguneko alea erosteko aukera egongo da edo, harpidetza bidez, hile osoko (edo urte osoko) zenbakiak kontsultatzeko aukera. Gainera, tarteka eskaintza bereziak ere izango dira.
Agerkariak ikusteko ez da PDFrik jaitsi beharko. ISSUU zerbitzua erabiliko da.
Presst bihar irekiko omen da, baina dagoeneko webgunea ikusgai dago guztiontzat, nahiz eta oraindik ezin daitekeen izenik eman eta egunkaririk erosi.
Erantzunak
"Agerkariak ikusteko ez da PDFrik jaitsi beharko". Bale. Baina jaitsi ahal izango da? Ez jaisteak esan nahi du konexioa izan behar duzula irakurtzeko. Eta batzuetan gertatzen da konexiorik gabe tarte bat izatea (autobusean adibidez) eta irakurtzeko astia. Horretarako pdf-a jaitsi ahal izatea abantaila izaten da. Issuu-n normalean izaten da pdf-a jaisteko aukera. Inork badaki Presst-ekin ere hala izango ote den?
Berriako artikuluaren arabera "aleak PDF formatuan erosi ahal izango dira". Gero ordea esaten du "PDF bera hartu beharrean, Issuu tresnarekin egunkaria edo aldizkaria flash formatuan ikus daiteke". Ez du oso garbi uzten PDFaren aukera.
Bigarren esaldiari "BERRIAren paperezko edizio osoa iPad gailuan irakurtzeko aukera ematen du, Safari edo Chrome nabigatzailea erabiliz" gehitzen bazaio, nahiko kezkagarria iruditzen zait panorama. Izan ere, irakurtzeko aukerak Flash edo iPad-a badira, irakurle potentzialak plataforma zehatzak erabiltzera behartzen ariko dira.
Niri, orokorrean, ekimen txukuna iruditu zait. Diseinua ere, orain arte ikusi dudan apurragatik, txukuna.
Hemen azaldu diren konektibitate eta formatu arazoez gain, beste arazotxo bat nabarmenduko nuke: Prezioak.
Batetik iruditzen zait alde handia dagoela batzuen eta besteen artean (Gara/Berria adib.). Eta bestetik, garestitxo iruditu zaizkit prezio batzuk paperekoarekin alderatuta.
Badakit plataforma honen sortzeko inbertsioa egin behar izan dutela, eta hori amortizatu beharko dela. Baina egunkari baten banaketa, inprimatze eta paper gastuak ekidinda, egunkari digitalen prezioak paperezkoarena baino baxuagoa, dezente baxuagoa, izan beharko luke, derrigor.
Hori du nire ustez oztopo nagusia Presst-ek.
Presst kioskoak ez badu aldatzen planteamendua, bide laburra egingo du. Horixe idatzi dut Atabala blogean http://bit.ly/X7MXeg
Beno, behin kritikatzen hasita, eztabaidatik aparte dagoen xehetasun bat aipatu nahiko nuke. Eta esan daiteke SEOa ere ez dutela ondo zaindu. Programatzerako orduan gaztelaniaz pentsatu dutela argi dago. Meta datuak adibidez, gaztelania hutsez daude eta beraz, google-en bilaketak egin ezkero, web orrialdearen informazioa gaztelaniaz agertzen da. Proba egin dezakezue hemen: https://www.google.es/search?hl=eu&q=presst
Honetaz euskarabilduan hitz egin zen, SEO eta euskararen lanketa hizkuntzari ikusgarritasuna eman ahal izateko.
Itxura bikaina Presst-ek, euskal kiosko berriak