Sustatu

Amazonek Espainian daukan banaketa-gunerik handieneko langileek greba egingo dute martxoaren 21 eta 22an. Madrilgo San Fernando de Henaresen dagoen biltegia da geratuko dena, Espainiako handiena eta baita Europako handienetakoa ere. 2.000 langile dira eta %75ak grebaren alde bozkatu du.

Stephen Hawking fisikari eta astronomo entzutetsua hil da. Londresen jaioa 1942an, hainbat zientzia arlotan sari ugari jasotakoa, besteak beste 12 honoris causa doktoretza. Zulo beltzen inguruan eta kosmologiaren hainbat esparrutan egindako ekarpenek zientziaren ikuspegia aldarazi zuten gai horien inguruan. Bart hil da, familiak jakinarazi duenez, 76 urte zituela. Sarean bere figuraren inguruko aipamenak izugarri ari dira zabaltzen #Hawking traolarekin.

3D imprimagailu bat erabiliz inprimatu daitekeen etxe oso bat aurkeztu dute. Zorakeria burugabea dirudi lehen begiratuan, baina garapen bidean dauden hainbat herrialdetarako sekulako aurrerapausua izan daiteke. Urakanek edo lurrikarek kaltetutako lurraldeetan ere irtenbidea izan daiteke etorkizun hurbilean. Baina ez horretarako bakarrik: salmenta eta irteera komertziala ere izan dezakeela uste dute garatzaileek.