Teknologia albisteak
7

Lourdes Idoiagaren alde

Erabiltzailearen aurpegia
2012-09-26 : 23:44

Bergarako Gaztetxea eredugarria izan da gauza askotan. Aurreko batean, berriz, zerbait negargarria gertatu zen han. Norbaitek jomugan ipini nahi izan zuen Lourdes Idoiaga Oñatiko alkate ohia, eta pankarta batean hauxe idatzi zuen, letra garbiz Lourdesen argazkiaren ondoan: “Zu zara erraustuko dugun 1. zaborra”. Hori jakin eta gutxira, Lourdes Idoiaga ospitaleratu behar izan zuten, ondoezik.

Aurrera egin aurretik, argitu nahi dut Lourdes Idoiaga nire koinata dela. Argitu nahi dut, halaber, zenbait gauzatan Lourdesek eta biok ikuspegi diferenteak ditugula. Jakinarazi nahi dizuet, orobat, ez Lourdesek ez eta nire familiak ez didatela eskatu haren alde idazteko. Erabaki hori neuk hartu dut, sutan jarri bainaiz gertatutakoaren berri izan eta Bergarako Gaztetxean ipinitako pankartaren argazkia ikusitakoan.



Antza denez, pankarta egile anonimoari ez zaio gustatzen Lourdes Idoiagaren jarrera atez ateko zabor bilketaren aurrean, eta erabaki du ordua dela Lourdes akojonatzeko —eta, hedapenez, Lourdes moduan pentsatzen dutenak. Horretarako, SS erakundeko gazteriaren metodoa aukeratu du: pankarta baten bidez saiatu Lourdes zikintzen zabor deituta, eta mehatxatu berau erraustearekin.



Zorionez, Bergarako Udalak gaitzetsi egin du, aho batez, bertako gaztetxean gertatutakoa. Zoritxarrez, gaztetxeko ordezkariei nahikoa iruditu zaie esatea “beraiek ez direla izan”, Goiena.net-en irakurri dudan legez. Horrelako mehatxuek gainditu egiten dute, eta usteldu, eztabaida politikoa, eta basakerian murgiltzen gaituzte, ez baditugu erabakimenez arbuiatzen.



Lourdes Idoiaga ospitaleratu behar izan zuten, eta ni sinistuta nago jasotako mehatxu horrek zerikusi zuzena duela haren egoerarekin. Atzo ezkero etxean dago berriro ere, zaintza medikuan, eta gaur, hilak 27, ezingo da egon osoko bilkuran, Oñatiko Udalak egingo duena gai hori eta beste batzuk tratatzeko, baina ez da isilik geratu, eta “Nahikoa da!” esan du, Goienan argitaratutako gutun batean. Espero eta desio dut gaur Lourdesek Oñatiko Udalaren babesa jasoko duela, Oñatik ezin baitu onartu bere herritar batek horrelako tratu txarrik jasotzea.

Erantzunak

2012-09-27 : 13:52

Rodrigo Ratok ere horixe esan zuen, bera ez dela izan. MAFOk ere berdin, bera ere ez dela izan. Honelako mordotxo bat entzun dugu azken aldian. Eta ihesbide errazean ari direla iritzi diegu. Zer pentsa eman behar lieke gaztetxeko ordezkariei ...

2012-09-27 : 15:24

Urrunetik idatzia.
Ez dakit polita, egokia, elegantia, eraginkorra, balekoa edo nola kalifikatu pankarta hori. Baina mehatxugarria??
Mahomari adarra jo bai eta bertoko agintariei ez?

2012-09-27 : 18:20

Animo!

2012-09-27 : 21:14

Bai, animo Lurdes. Jende zentzuduna zurekin dago.

2012-09-28 : 10:50

Atzo arratsaldean Oñatiko Udalak gaitzetsi egin zuen, aho batez, Lourdes Idoiagak Bergarako gaztetxean jasotako mehatxua. Pozten naiz.

2012-10-02 : 15:52

Zertxobait berandu, baina bat nator Joxek esandakoarekin.
Pistolak gelditu omen dira, baina badirudi oraindik geure buruak beste erritmo batean ari direla pentsatzen eta jokatzen. Eta gainera ezkutuan, beti bezala.
Bihotz bihotzez , animo eta eutsi goiari, Lourdes!!!

2012-10-03 : 01:53

Eta ez al litzateke ona izango Bergarako Gaztetxeko pankarta egin duenari aholkatzea Lourdes Idoiagari barkamena eska diezaiola. Batzuetan gerta liteke gauzak asko pentsatu gabe egitea eta egin duenak uste zuena baino askoz kalte handiagoa eragitea. Gazte horrek barkamena eskatuko balio Lourdes Idoiagari modu publikoan eta nahi badu pribatuan ere bai, uste dut honek barkamen eskaera hori onartu egingo lukeela eta gaztearentzat irakaspen garrantzitsu bat izango litzateke bizi guztirako. Eta iraindua eta kaltetua izan denak nolabaiteko errekonozimendu publikoa jasoko luke eta aldi berean bere barruan liberazio handi bat sentituko luke seguru asko. Honekin ez dut esan nahi kalterik ez denik egin. Kaltea egina dago, baina egindako kalteaz norbera jabetzea eta hura zuzentzeko borondatea azaltzea ere ekintza positiboak dira eta horren bila ibili behar dugu beti: okerrak zuzentzen, alegia.

Erantzun

Twitter ikonoa  Facebook ikonoa  Sartu