Edukiontzien kontrako 'Haka' bat, Angel Errok komentatua

Haka izatez indarra erakutsi eta eta parean dagoenaren erreakzioa aztertuta norberak nola jokatu erabakitzeko modu bat da, azterketa antzeko bat. Kanpotarrak zetozenean indar erakustaldi hori egin eta lurrean, bisitarien parean, objektu bat usten zuten. Objektu hori errespetuz jaso eta onartzen bazuten bisitariak ongietorriak ziren, opariari uko egin edo zakar jokatzen bazuten berriz erasotzen zituzten.

Maori talde edo tribu baten ohitura zen, gero beste maori askok bereganatu dutena. Baita Zelanda Berria edo Aotearoako All Blacks errugbi taldekoak ere. Errugbikoa moldaketa bat da, objekturik lurrean utzi gabe baina indar erakustaldia aurkariak parean egonda errespetu osoz jasotzen dutena. Moldaketa hori eta aurkarien jarrera errugbi taldeen arteko errespetuzko ohiturarekin guztiz bat dator.

Bideo hortan berriz... non daude bisitari edo aurkariak? Atzeko (ez aurreko) edukiontziak? Haka ez da alde bakarreko ekintza bat, dantza egiten dutenak bezain garrantzitsuak dira hartzaileak, eta hauek bertan egotea. Horren aurrean nolabaiteko feedback-a ematea ezinbestekoa da.

Hori gutxi balitz, Lusitxok aipatu zuen bezala, hasieran ingelesez "This HAKA is a declaration of an ideological war against the trash dumpsters" azpititulatu dute. Haka ez da gerra-deklarazio bat, hori egin edo ez erabakitzeko aurreko pauso bat baizik.

Bideo hori moldaketa bat baino hakaren jabetze guztiz desegokia iruditu zait, eta nik ere auzo lotsa sentitu dut.

Kopiatzekotan zentzuz eta errespetuz kopiatu mesedez.

Juanjo Olasagarrek ere zutabe bat idatzi du gai horren kontura: http://www.deia.com/2014/10/18/opinion/columnistas/zirrikituetatik-begira/basa

Kritika guztiak onargarriak dira eta haietatik ikastea da guri dagokiguna. Hoietako batzuk zintzoak dirudite, beste batzuk berriz, materialak nahastuz zaborra sortzen den bezala, zer ikusirik ez daukaten ideiak eta eragileak nahastuz mezua ezkutatu eta atentzioa desbideratzeko ahalegin tristea besterik ez.

Bideo honekin gure helburua ez da izan kultur ekintza bat burutzea, ez da hori gure lan esparrua eta ez dugu inoren lan esparruan sartzeko asmorik. Bideoaren helburua, zaborraren sorkuntzan zabor edukiontzia eskura jartzeak daukan eragin kaltegarria azpimarratu, eta, arazoa konpontzeko elementu horrengan eragin behar dela seinalatzea da.

"Gerra" ideologikoan eragitea da gure asmoa eta Hakarekin mezua ulertzen ez bada, Haka zabaltzearekin batera emandako mezuan ulertuko dela espero dugu. Baliteke, ondorengo testuan, puntu eta koma behar zuen lekuan koma bakarrik jarri izana, eta horrelako bestelako akatsik egotea. Aurrez jakinarazten dugu, hori ere ez dela gure lan esparrua eta eduki horren eztabaidan ez garela katramilatuko.

Bukatzeko, gerra galduetaz dihardutenei, gure "gerra" irabazten ari garela esan nahi diegu. Gipuzkoako udalerrien erdiek hondakinen %70etik gora gaika biltzen dituzte, duela 6 urte eskas %30a gainditzen zuen udalerri bakar bat ez zegoenean, errauste planta kutsakorra eta bere zabortegiak bertan behera geratzea lortu dugu, birziklapenaren, konpostajearen eta Zero Zabor politikaren inguruko kontzientzia geroz eta handiagoa da, bai Gipuzkoan, eta geroz eta gehiago, beste herrialdeetan ere bai, egunetik egunera emaitzak hobeuz doaz geroz eta eremu zabalagoan...

Baikortasunerako arrazoiak baditugu, eta, puristek barkatuko digute, horrek eragiten digun dantzarako gogoak ezarritako kanonak betetzen ez baditu.

Zabor edukiontzia birziklatzera kanpainaren mezua ondorengoa da:

http://www.gipuzkoazz.com/zerozabor/zabor-edukiontzia-birziklatzera-2/

Gerra aldarrikapen bat iragarri genuen eta gaur irudikatutako guda dantza honen bidez “Zabor edukiontzia birziklatzera” izeneko kanpainari hasiera ematen diogu.

Zabor edukiontziari gerra aldarrikatu diogu, gerra ideologikoa. Absurdoaren museoan leku pribilegiatua duen asmakizun horren miseriak agerian jarri asmoz.

Guztiok onartzen dugu hondakinak nahasteak zaborra, zarama, zakarra, arazoa sortzen duela. Zabor edukiontziak hondakinak nahasteko besterik balio ez duela. Eta ez da Sokrates izan behar, aurreko bi premisak lotu, eta, zabor edukiontziak zaborra, arazoa, sortzeko besterik balio ez duela ondorioztatzeko.

Denbora luzez eztabaidatu izan dugu herritarron betebeharretaz. Denbora luzez aritu gara gora eta behera herritarren birziklatzeko betebeharraz. Baina bada garaia, agintarien betebeharretaz hitzegiteko.

Agintariek, gizon-emakumeon eskubideak bermatzeko betebeharra daukate. Agintariek ezin dute diru publikoa zaborra sortzeko bitartekoetan xahutu, guztion dirua guztion kalterako erabiliaz. Hainbat agintarik, tamalez, gizon-emakumeok ingurune osasungarri batean bizitzeko dugun eskubidea urratzen jarraitzen dute.

Hortaz, zabor edukiontziak hor egoteari utzi behar diote. Zabor edukiontziak hortik kendu behar ditugu, hobe esanda, kendu behar dituzte. Zabor edukiontzia kentzen denean gaikako bilketan jauzi ikusgarria ematen dela irakatsi digu esperientziak. Guk ez diegu agintariei nola egin esango, soilik beraien betebeharra bete dezatela eskatzen dugu, gaikako bilketa eraginkor bat berma dezatela, arazoa sortzeko bitartekoak ken ditzatela eta gizon-emakumeon eskubideak zain ditzatela.

Zero Zabor Ingurumen Babeserako Elkartetik gaur Donostian hasi dugun “Zabor edukiontzia birziklatzera” kanpainarekin, oraindik beraien kaleetan zabor edukiontzia duten udal ordezkariei, besoak gurutzaturik gera ez daitezen eskatzen diegu, eta, gaur irudikatutako zigilatzea Gipuzkoako eta Euskal Herriko hainbat herrietara zabalduko dugun arren, gogorarazi, beraien ardura eta betebeharra dela zabor edukiontziak zigilatzea, kaleetatik ezabatzea.

Horrenbestez, argi eta ozen diogu: zaborra / zarama / zakarra

ZABOR EDUKIONTZIA BIRZIKLATZERA!