Teknofiloen albistegia
144

Nork esan du Halloween euskal ohitura zaharra ez denik?

Erabiltzailearen aurpegia
2013-10-31 : 10:43

Azken urteotan gero eta ezagunagoa bihurtu da Halloween jaia gure artean. Ameriketatik "inposatzen" ari diren ospakizuna ere badela entzun izan dugu maiz, guztiok sinetsi arte. Baina kontrakoa dirudien arren, Arimen Gaua ospatzeko ohitura ondo errotutako tradizioa da Euskal Herrian, eta oinarri-oinarrian, film amerikarretan ikusten ditugun irudietatik ez oso urruti. Halaxe kontatu digute gure hainbat lekukok!

Guztia irakurri (ahotsak.com) »»

Txioak (137) | 7 Erantzun

Erantzunak

2013-10-31 : 11:58

Zumaian ere ospatzen omen zen. Gauez etxe atarietara hurbiltzen ziren gazteak, kalabazak han utzi, atea jo eta ospa egiten zuten. Etxekoek atea zabaltzean... #halloween @arimengaua

2013-10-31 : 12:06

Utergan, gure herri erdaldunduan, bada ohitura polit bat Santu Guztien egunean. Mezaren ondoren, umeek, etxez etxe, hau kantatzen dute:

dominé-dominé
castañé
y si no zikiñé

eta etxeetan arrebutxa egiten da (intxaurrak, almendrak, goxokiak eta, tarteka ere, txanpon batzuk botatzen dira airera, ea nork hartuko).

Iruditzen zait baduela antzik Halloweenarekin.

2013-10-31 : 12:53

Aiba!

Bideoa ikustean, memorian galduta neukán kontu batez oroitu naiz: nik ere, txikitan, lagun nagusiago batzuekin, kalabaza bat hustu nuen gero barruan kandela bat pizteko! Ez dakit noiz izan zen, zer zela eta izan zen, baina bai, egin genuen.

46 urte ditut. Beraz, hau gertatuko zen orain 35 urte-edo. Garai hartan ez zegoen Disneitxanel. Beraz, pentsatzekoa da ohitura hori bertoko batzuengandik jasoko genuela.

Eta ni neu ibili naiz nire seme biei matraka ematen, Halloween hori alienazio yankeea baino ez zela...

2013-10-31 : 14:14

Kontu hau ikertu duen Oier Araolaza antropologoak elkarrizketa eskaini dio Goiena-net-i. Elgetan umeekin kutsu zaharreko ohitura berreskuratzen saiatuko dira gaur, Arimen Gauan, eta horren haritik etorri da elkarrizketa.

http://goiena.net/albisteak/oier-araolaza-uste-dugu-ondo-ezagutzen-ditugula-gure-sustraiak-baina-gezur-hutsa-da/
http://goiena.net/agenda/arimen-gaua/

2013-10-31 : 17:25

Gure amak inoiz kontatu digu zela Zumaeta baserrian bizi zirela, Antzuolako Lizarraga auzoan (Antzuolara heldu zirenean, antza, han jarri ziren bizitzen), kalabazak era horretan jartzeko ohitura zegoen, bide erdian. Ikaragarria behar zuen, kaleko argi barik, arbolak alde batera eta erreka bestera, bide ilun hartan kandelaz piztutako kalabazak ikustea. Gaur egun on #halloween jai guztiak baino askoz ere beldurgarriagoa, seguru!

2013-11-01 : 11:21

Eskerrik asko guztiei zabalkundearengatik.

@gorkazabaleta Bai, Zumaian ere jasota ditugu zenbait lekukotasun, baina guztientzat lekurik ez bideoan ;-)

@urtergar Interesgarria! Eskerrik asko. Araban, Errioxan, Aragoin... antzeko lekukotasunak bildu izan dira. Izan ere, Europa osoan zabaldutako ohitura izan da Domu Santu inguruko errito eta diru-bilketena.

@joseba Harrigarriena da, nola galdu den ohitura belaunaldi bakarrean, eta inolako aztarnarik hutsi gabe ondorengo belaunaldietan. Eta orain, begira! Guztiak ere berriro aitona-amonen erritoetara itzultzen... Hori bai, Disneyren bedeinkapen eta parafernaliarekin, nola ez ;-(

@marijo Garai ilunak ziren erdi aroko haiek... ;-)

2014-10-31 : 16:59

Iaz bezala, aurten ere egon da honen inguruko aipurik. Ume bati irakasleak esan diola atzerriko festa dela... Oier Araolaza antropologoaren agerpen bat han edo hemen...

Artikulu bat, berriz testigantza hemanez, Oarsoaldeko Hitzan, Jaime Altunarena:
http://oarsobidasoa.hitza.info/2014/10/31/halloween/

Dio Altunak;


Kontua da nire alabarentzat eta bere adineko askorentzat Halloween ospatzea ohitura bihurtu dela, nire aitarentzat ohitura zen bezala. Baina ospatzeko nahiko antzeko diren bi eredu hauen lotura hautsia dago. Haurrek ez dute ezagutzen aiton-amonek nola egiten zuten, eta adinekoek nahiko arrotz sentitzen dute egungo eredua. Interesgarria litzateke gazteei ospakizunaren jatorria argitu eta festa berrasmatzeko aukera luzatzea, hainbat ezaugarri berreskuratuz eta berrituz.

Ba, hara, Elgetan bigarren urtea da herri-ekimen gisa antolatu dela Arimen Gaua. Horra informazio pittin bat: http://goiena.eus/elgeta/1414750691019

Bestalde, eredu bat bestearekin lotzeko ahaleginean gerta dakizueke Idurre Eskisabeli bezala, seme-alabek bereizketa azpimarratzea zein den noren eredua... http://www.berria.eus/paperekoa/1777/020/002/2014-10-31/gureaberea.htm

Erantzun

Twitter ikonoa  Facebook ikonoa  Sartu