Teknologia albisteak

Euskal Herriko lehen mapa digital librea

Mugibili

2014-04-25 : 00:44

Dagoeneko prest dugu Ibilbideak maparen bertsio berria: Euskal Herriko lehen mapa digital librea. Ibilbideak webgunearen bisoreetan ikusgai dago eta hainbat formatutan doako behera kargatze librea eskaintzen da, GPS gailuetarako eta sakelako telefonoetarako.

Nabarmendu nahi dugu administrazio publikoen iturri kartografikoen ekarpena (Eusko Jaurlaritza eta Nafarroako Gobernuaren kartografia zerbitzuak, Espainia eta Frantziako Geografia Institutuak, Bizkaiko eta Gipuzkoako Aldundiak, Donostia, Gasteiz eta Getxoko Udalak) eta OSM (Open Street Map) bezalako iturri libreak eta ibiltarien ekarpenak aurreko bertsioa zuzentzen eta eguneratzen.

Iturri ofizialei dagozkienak egileen jabetza dira eta 2006ko Azaroaren 21ean onartu zen “Inspire” Europako testuaren arabera arautuak daude.

IGN España, “© Instituto Geográfico Nacional de España”, “LiDAR-PNOA © Instituto Geográfico Nacional de España”-k eskainita.
IGN France, Open data BD Alti® “Open Licence 1.0” lizentzia.
IDE Euskadi, Open Data Euskadi “Creative Commons-Aitorpena (CC-by 3.0)” lizentzia.
IDE Nafarroa, Open Data Navarra “Creative Commons-Aitorpena (CC-by 3.0)” lizentzia.
OSM (Open Street Map), “Open Database License (ODbL)” lizentzia.

Tontorretako datuak Mendikat webgunearen informazioarekin osatu dira, egilearen (Javier Urrutia) baimena izanik.

Guzti horren emaitza da betetako esparru osoan informazio bateratua eskaintzen dela, zehaztasun handiz, aberastutako edukiekin, eta Ibilbideak sortzeko eta jarraipena errazteko kolore egokiak erabiliz. Gainera, bidegorriak eta bide berdeak bezalako eduki bereziak eskaintzen ditu.

Baina kartografia honek berezitasun bat du, kartografia “bizia” izatea nahi dugu. Transibilbideak BTT eta Ondare Ibilbideak bezalako auzolan ekimenetarako erabilgarria izan behar da. Gainera, Ibilbideak seguruagoak eta atseginagoak izateko asmoz, POI (interes puntuak) bildumen jasotzea mapa honekin osagarria da.