Kike Areitioaurtena: «Komikizaleen artean gero eta onartuagoak daude superheroi homosexualak»

Testua: Aitor Abaroa 

Jaioterrian ilustrazio ikasketak egin ostean, AEBetan bizi izan da bost urtez, Miami, Atlanta eta Los Angelesen; publizitate agentzia, film ekoiztetxe, argitaletxe zein komiki etxeentzako egin du lan. Egun, Londresen bizi da, eta senar Alex Galindo eta bazkide Steve Kayrekin batera, Hartzak.com web orria jarri du martxan bere lana ezagutzera emateko.

Superheroiak dira zure ilustrazioetan protagonista. Zergatik?

Umetatik gustatu zait marraztea, eta gogoan dut sei urte nituela aitak The Teen Titans komiki bat oparitu zidala; orduan ekin nion superheroi ezagunak marrazteari. Gerora neure komiki superheroi propioak ere asmatu ditut, eta noizbait komiki oso bat egitea ere gustatuko litzaidake. Azkenaldian, gainera, lagunak edo ezagutzen ez dudan jendea superheroi itxuraz marrazten ari naiz.

Gorra izateak zerikusirik izan du marrazteko zaletasunean?

Ez dut uste zaletasuna pizterako orduan eragin handirik izan zuenik. Hala ere, gaur egun egia da lan egiterakoan atentzio guztia marrazkietan zentratzen laguntzen didala, soinuek ez bainaute distraitzen. Bestalde, esango nuke gorra izanik ikusmenaren erabilera sakonagoa egiten dudala, eta horrek asko laguntzen dit ilustrazioa eta diseinu grafikoa lantzerakoan.

Zer daukate superheroiek beste genero batzuetako pertsonaiek ez dutenik?

Norbanakook hainbat arazorekin topo egiten dugu gure eguneroko jardunean, eta, nire ustez, arazo horiek konpontzeko dugun gaitasuna irudikatzen dute superheroiek. Bestalde, gay eta gorra izanik, pertsonaia mutanteekin erabat identifikatuta sentitzen naiz; ezohiko boterea dute, eta sarritan, diren bezalakoak izateagatik, jende askok ez ditu onartzen.

Denok ditugu besteengandik ezberdintzen gaituzten ezaugarriak. Alde horretatik, denok senti gaitezke superheroiekin identifikaturik?

Zalantzarik gabe. Guztiok ditugu dohai jakin batzuk. Baina dohai horiek ongia edo gaizkia egiteko erabili daitezke. Adibidez, hitz-jarioa duenak, gauzak argi azaldu eta jendea konbentzitzeko gaitasuna duen horrek, badu botere bat. Baina botere hori mundu hobeago bat egiteko erabili dezake, edo jendea elkarren aurka jartzeko. Superheroiek gauza bera egin dezakete euren soperbotereekin.

Elkarrizketa osoa gaztezulo.com-en