Teknologia albisteak

Lance Armstrongen gezurra, dokumental euskaratua

Erabiltzailearen aurpegia
2014-07-04 : 09:03
Lance Armstrong txirrindulari estatubatuarrak gezur handia antolatu zuen minbizitik bizirik irten ondoren, eta bere ahal guztiekin defendatu zuen, harik eta 2013ko urtarrilaren 13an aitortu zuen arte. The Armstrong Lie dokumentalak modu dramatikoan azaltzen ditu gezurraren nondik norakoak, Armstrongek berak baimena eman baitzion Alex Gibney dokumental egile estatubatuarrari insider gisa jarraitzeko 2009ko Tourra (lau urte geldirik egonda Armstrongek 40 urterekin egin zuena) eta nahi adina aldiz txirrindularia elkarrizketatzeko. Emaitza, ikusgarria bezain interesgarria. Eta orain euskaraz, azpitituluekin.

“Hau ez da dopinaren inguruko istorio bat, boterearen ingurukoa baizik”, horixe dio kazetari batek dokumentalean bertan. Eta ez zaio arrazoirik falta. Beste inork baino hobeto, Armstrongek maisuki eragiten zituen boterearen hariak eta bere bizitzaren kontakizuna, hainbesteraino ze dokumentalaren egilea hainbat aldiz agertuko da etsita, Armstrongek berari esandako gezurrak direla-eta.

Liluragarria da Lance Armstrongen nortasuna, bere gorabehera guztiekin, baita Michele Ferrari mediku italiarrarena ere, orain arte beti ilunean. Eta zer esanik ez, Hein Verbruggen 1991tik 2005era UCIko presidente izan zenarena.

Euskaldunak ere agertzen dira dokumentalean (Joseba Beloki, Iban Mayo, Haimar Zubeldia eta 2009an Pirinioetan ibili ziren txirrinduzale mordoa), baina batez ere zentratzen da AEBek XX. mende bukaeran eta XXI. hasieran izan zuen txirrindulari belaunaldian, Lance Armstrong buru zela.

Dopina, boterea, etika, ankerkeria, negozioa eta txirrindularitzarekiko maitasuna. Horra, laburbilduta, dokumental bikain honen gaiak.

Erantzun

Twitter ikonoa  Facebook ikonoa  Sartu