Black Mirror, Reality TV kontzeptuaren inguruko muturreko fikzioak

Endemol ekoiztetxearen adar batek (Zeppotron) ekoizten du Black Mirror. Big Brother eta reality TV esaten zaion telebista ereduaren beste formatu batzuen asmatzaile, ekoizle eta bultzatzailea da Endemol, eta horregatik, nolabait paradoxikoa da telesail honen atzean ere etxe bera izatea. Izan ere, fikziozko lanak izan arren Black Mirrorren atalak (argumentuan independenteak dira gainera, ez dago loturarik istorioetan ezta aktore-multzoan atal batetik bestera), guztietan ideia bateratzaile bat dago: Reality TV kontzeptuaren inguruko ikus-entzunezko produktu eta esperientzia estremoak irudikatu dituzte. Hori da telesailaren funtsa, zientzia fikzioaren eta terrorearen elementuak gehituta, bide batez.

Lehen atala inpakto handikoa izan zen, bereziki. Ingalaterrako printzesa bat bahitu dute eta askatzeko eskaera zehatza da: Erresuma Batuko lehen ministroak telebistan zuzenean sexua izan behar du zerri batekin. Horri egiten dio erreferentzia kartel honek:



Bigarren denboraldian itzulitako atalak ere ez dira txarrak. Emandako azken biak dira euskaratu direnak ('Waldoren ordua' itzuli du Ana Malagonek, eta 'Hartz Zuria' Luistxo Fernandezek), baina azkenengoetatik has zaitezkete lasai, eta gero hasierakoetara jo.

Gozatu Black Mirror euskaraz, eta atal gehiagorekin inor animatzen bada, ongi etorria izango da.