Teknologia albisteak
1

Bideo estatikoak, Instagrameko algoritmoen azken ondorio inozoa

Erabiltzailearen aurpegia
Sustatu
2022-02-15 : 09:44

Instagrameko memeetara ohituta bazaudete, ikusiko zenuten nola hedatu diren azken aldian bideo-meme estatikoak, hala nola esteka honetakoa. Ze zentzu du mugimendurik ez duen segundu bakar bateko bideo irudi isil batek? Algoritmoaren araberako zentzua du: Instagramek bideoak baloratzea erabaki duenetik, irudi finkoko memeek gutxiago balio dute, eta zuk halakoak egiten badituzu, irudia hutsarekin baino ikuskatze gehiago lortuko dituzu segundu bateko bideoarekin.

 

Joera estupido honek adierazten zer punturaino Instagram bateko algoritmoak duen garrantzia, jendearen apeta edo gogotik aparte, sistemak erabakitzen duenean automatismoz zuk zer ikusi behar duzun. Tiktok-en bideo lehia handitzen dela? Instagramek erabakitzen du bere edukian bideo-lehia egin behar dela, eta beraz algoritmikoki bideoak indartzen dira.

Eduki sortzaileak konturatu, eta edozein eduki bideo formatura egokituko dute, horrekin ikuskatze gehiago sortuko baitira.

Normala da hau gertatzea, edukia norberaren horma edo lerroan ikusteko modu nagusiak sare sozialaren algoritmoa denean. TikTok-en arrakasta faktore bat bere algoritmoaren sekretuari lotua dago, diotenez. Facebook/Meta-ren indar publizitarioa ere algoritmoei lotuta dago, haien interesen araberao edukia erakusten dizute Facebook-eko horman edo Instagrameko zure kontuan.

Joera horren kontrako eduki-ikuskatze egoki bakarra Twitterren ordenatze kronologikoa da; baina Twitterrek ere ahaleginak egiten ditu ordenatze hori barik, berak "zaindutako" eduki alternatiboa ikusten amaitu dezazun. Twitterren azkenengo erabakia, boto negatibo sekretuena, horretara zuzendua egon daiteke; beren algoritmoa fintzera, zuri eduki "enpaketatua" errazago emateko. Oraingoz bederen bi aukerak hor daude: "txioak gertatu ahala" (ordena kronologikoa) edo "txio aipagarrienak" (beraiei okurritzen zaizkien algoritmoen araberako edukia).

Egin kasu Sustaturi, Twitteren bederen, aukera dagoenez, "gertatu ahala" aukeratu. Jendeak txiokatzen duena jendearen ordenean, zuk erabakitako jendeari jarraitzen diozulako. Hori da zure algoritmoa, ez sare sozialek asma dezaketenea,

Erantzunak

2022-02-20 : 19:31

Twitterren aldaketak eginez gero informazioa gertatu ahala ikustea lortuko duzu, bai, baina aukera hori ez da lehenetsia, Twitterrek zuk iragarkiak ikustea nahi duelako eta hori lortzeko bere algoritmoarekin zu ahalik denbora gehien pantaila begira egotea nahi duelako. Hori lortzeko Twitterren egiten duzun guztia zelatatzen du zu engantxatzeko erak kosta ala kosta aurkitzeko (Facebook, Instagram, TikTok eta abarrek bezala).

Euskarazko edukien iragazkirik ere ez duzu aurkituko. Twitter erabiltzen baduzu ezinezkoa da, une batez bada ere, euskarazko edukiak bakarrik ikustea. Twitterrek euskaldun diglosikoak nahi ditu errentagarriagoa delako. Ez ahaztu, zu ez zara Twitterren bezeroa (horiek iragarkiak jartzen dituztenak dira), zu produktua zara, salgaia.

Nahi duzu Twitter moduko bat, algoritmo manipulatzailerik gabea, enpresa baten ordez komunitateak berak gidatua, gertukoa eta euskarazko edukiak bakarrik edo mundu osokoak ikustea ahalbidetzen dizuna? Albiste on bat daukat zuretzat: guzti hori dagoeneko existitzen da eta milaka euskaldun egunero solasean ari dira bertan!

Mastodon.eus euskal sare sozial libre eta federatua probatzea gomendatzen dizut. Mastodon.jalgi.eus ere badago. Euskal komunitate aktiboak dira eta fedibertsoaren parte izanik, mundu osoan zabaltzen eta indarra hartzen doan komunitate osasuntsu eta sare globalaren parte. Egin proba, harrituko zara zeinen erraza eta lagunkoia den ikustean. Ez zara damutuko! https://kaixo.mastodon.eus/

Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago