Euskariana jarri da martxan, "Euskadiko Liburutegi Digitala"

Euskarianaren fondoen jatorria beste euskal erakunde batzuen artxiboen bateraketik dator: Euskadiko Irakurketa Publikoko Sarea, Bilgunea, Ondare Bibliografikoaren Katalogo Kolektiboa, Aldundiak, Eusko Ikaskuntza, Eresbil edo Sancho el Sabio, Labayru eta Lazkaoko Benediktinoen fundazioa, besteak beste. 

Jaurlaritzaren ohar ofizialaren arabera, Euskarianak bildu nahi du

• Euskal autoreek sortu duten guztia
• Euskadin argitaratu den guztia (hori dio oharrak, EAE edo Euskal Herri osoan ote Euskadin?) 
• eta munduko edozein tokitan euskal gaiei buruz sortu den guztia.

Helburu horiek lortzeko, ekimenak "ahalik eta baliabide digital gehien bildu nahi ditu euskal kulturarekin lotuta, eta bereziki, bibliografikoak, erregistroak sistematizatuz eta homogeneizatuz, materialen jatorria identifikatuz eta sortzaileen eskubideak errespetatuz".

Bilaketa sistema pixkat konplikatua da Euskarianan, baina tira, azkar dabil. Bilaketa aurreratuan, saiatu zerbait jartzen Izenburua alorrean, eta egin murrizketa gero dokumentu-motaren menuarekin. Bilduma nagusien arabera ere arakatu daiteke.

Webgunea ohar zorrotz batekin dator, "Eusko Jaurlaritza 2021 egile-eskubideak, eskubide guztiak erreserbatuak", baina eduki guztiak ez daude horrela, eskubidez itxira. Argazki bilduma librea ia osorik, ia 10.000 argazki. Era berean, Material grafikoa alorreko eduki gehiena ere librea da.

Horrek ez du esan nahi Euskarianan argazki guztiak libre direnik, ze museoko objektu askoren irudiak daude, baina horiek ez daude "argazki" gisa sailkatuta eta euren irudiak copyright itxiren batekin egon ohi dira.

Eskuizkribuen atalean ere eduki libre mordoxka dago PDM markarekin (jabetza publikoa esan nahi du horrek).

Musika/soinua eta ikus-entzunezkoak kategorietan datozen edukiek ez dute eskubide egoerari buruzko oharrik. Egunkari eta aldizkarietan, pieza asko libreak dira ordea.

Bisitatu eta eraibili Euskariana: https://www.euskariana.euskadi.eus/