Teknofiloen albistegia
1

Kontsolek jai dute, Googlek iragarri duen Stadia joko-plataforma gailentzen bada

Erabiltzailearen aurpegia
Sustatu
2019-03-21 : 09:29

Googlek iragarpen inportantea egin du aste honetan. Bideojokoen alorrean, gamer kultura eta ohituretan, eta jokoen industria osoan eragina izan dezakeena. Stadia izeneko joko plataforma bat iragarri du, eta zera du ezaugarri nagusiak: ez dago kontsolarik. Telebistara edo ordenagailura, lainotik zuzenean emango dizu jokoaren indar guztia Googlek.

Iragarpenak ondorio sakonak izan ditzake, gauzatzen bada, eta gauzatutakoan agindutako arintasun eta gaitasunak baditu, joko aukera polit bat izatez gain. Stadian dauden jokoek ez dute beharko Play Stationik edo Xbox-ek jokatzeko, ezta software bereziturik instalatu beharrik ordenagailuan. Jokoaren indar bisuala eta operatiboa ez da etxean egongo, baizik eta lainoan, eta Googlek saretik zerbitzatuko dizu zure pantailara.

Jokorako hardware atalen batzuk salduko ditu Googlek, dena dela: joystick berezituak, seguruenik. Baina kontsola garesti bat aurreztu ahal izatea, kolpe latza izan daiteke Sony eta Microsoft-entzat, Pleiak eta Eksbosak egiten dituzten etxeentzat. Jokoen ereduari dagokionez, kartutxoak saldu beharrean, eredu berriarekin "alokairuak" edo harpidetzak saltzea izan daiteke eredu berria, plataforma berriarekin. Pentsa jokoen Netflix batean. Ez duzu DVD jogailurik behar etxean, ezta DVD edo Blu-Ray-rik erosi behar ezta?

Sistemak benetan kontsola batek eman dezakeen indar guztia eskaini dezakeen, horra batzuek orain duten zalantza. Baina Googleren gaitasun eta zerbitzari laino erraldoiarekin... Beste zalantza bat da ea jokalariak etxean ematen dituen aginduek berehalako erantzuna izango oten duten lainotik jasotako irudi eta akzioetan, jokoa zapuztu dezaketen 'delay' edo atzerapen okerrik gabe. Orain arteko erakustaldietan, ez da halako arazorik antzematen, baina erakustaldiak dira, jakina. Hemen adibide bat:

Googlek beste gaitasun batzuekin hornitu nahi du Stadia, gainera. Botoi bati sakatu, eta instant batean, zure jokoa Youtubeko zuzeneko bat bihurtuko da, eta 'gameplay'-a ere sortuko da, nahi izanez gero. Honekin, joko streaming zuzenekoen nagusi den Twitch plataformari egin nahi dio aurre Googlek (Twitch Amazonen jabetzakoa da).

Era berean, garapeneko ingurunea open-source edo irekia izango da, eta garatzaileentzat abantaila bat izan daiteke hori, jokoen biltegia handitzeko.

Jokaldiak, azken batean, Interneteko azken aroko joera bat indartzen du. Tarteko hardware eta euskarrien zaharkitzea. Gorago aipatu dugu, eta pentsa, zertan den orain Blue-Ray formatua, irudi perfektuak emateko disko horiek... Samsung-ek iragarri berri du otsailean, ez duela jada Blu-Ray jogailurik fabrikatuko. Zertarako ba? denak streaming bidez ari direnean filmak ikusten, Netflix eta antzekoetan...

Jada nahiko anakronikoak dira DVD jogailuak. Laster kontsolak ere bai agian.

 

Erantzunak

2019-03-22 : 13:18

Albiste honen inguruan asko hitz egiten ari dela ikusten ari naiz eta kontu gehiagorekin jorratu beharrekoa dela uste dut.

Bideo jolasetan streaming bidez aritzearena ez da berria. Duela urte asko Onlive izeneko plataforma probatu nuen eta bikain zebilen. Sony, Nvidia, Microsoft... aspalditik ari dira honekin lanean. Gai honen inguruan zalantza asko etortzen zaizkit burura:

- Zergatik egin behar diogu Googleri besteei baino kasu gehiago? Logo polita dutelako? Diru asko dutelako?
- Netflix bezalako plataforma baten prezio 10-16€ inguruan ibiltzen da. Sonyren PS Now 15€ hilean edo 100€ urtean. Baino joko berrienak kanpoan geratzen dira. Zein izango da Googleren zerbitzuaren kostua eta zein eduki izango du? Plataformaren arrakasta bi kontzeptu hauen baitakoa izango dela pentsatzen dut.
- Zer gertatuko da indie delako garatzaileekin? Steam bezalako plataformek asko lagundu die, baino dena Googlera badoa, jolasak egiteko gaitasuna izango dute? Eta ekonomikoki etekina ateratzeko?
- Bideo-jolas guztiak "lainoan" exekutatzen badira, zerbitzari oso potenteak beharko dira. Nork kudeatu ditzake horrelakoak? Enpresa erraldoiek bakarrik. Beraz, enpresa erraldoi hauek industriaren kontrol guztia jaso eta txikiak alboratzen dituztenean, zein izango da zerbitzu hauen prezio berria?
- Ez al dago dena bi edo hiru enpresaren esku uzteko arriskua? Bazirudien garai bateko Sega VS Nintendo gainditua zegoela.
- Gure pribatutasuna galtzen ari garen garai honetan, jolasteko modu honek ez al du egoera hau okertuko?
- Azken aldian errealitate birtuala indarra hartzen ari da, zer gertatuko da honekin?

Teknologiak aurrera egitearen alde nago eta aldaketa bat egongo dela ukaezina da. 5G teknologia indarrean sartzen denean horrelako ekimenek indar gehiago izango dute ere. Baino medioei zuhurtziaz aritzea eskatzen dizuet. Ez dezagun azkarregi ezagutzen ez dugun zerbait goraipatu, batez ere izan ditzakeen eragin guztiak kontuan hartu gabe.

Erantzun

Twitter ikonoa  Facebook ikonoa  Sartu