Teknofiloen albistegia
13

Susaren e-book denda berria

Erabiltzailearen aurpegia
Mikel Lizarralde
2011-11-02 : 20:11

Zarauzko Hitzari esker (B. Sarasolaren bitartez Twitterren) jakin dut Susa argitaletxeak E-book formatuan bere liburuak eskainiko dituela. Ez da bere katalogoa e-book formatura egokitzen duen lehen argitaletxea izango, ezta azkena ere, baina hartu duten erabakia txalotzekoa da, duen sinpletasun eta ausardiagatik.

Sinplea, erraza eta ausarta:

  • Liburu guztiak prezio berean (3,56 eurotan) salduko dituzte.
  • Jasotako diruaren banaketa berritzailea: bi euro idazlearentzat eta bat argitaletxearentzat (gainerako 56 zentimoak zergak dira).
  • DRM babesik gabe.

Hemen ikus daiteke eskuragarri dauden 66 idazle eta 142 lanekin. Hala ere, hau ez da Susak e-book formatuan egiten duen lehen apustu ausarta, aspalditik dago eta sarean Armiarmaren liburu elektronikoen zerrenda eder bat.

Erantzunak

Joxe Aranzabal
2011-11-02 : 20:56

Zorionak Susari zerbitzu honengatik. Albiste hau irakurri bezain laster, kontu bat sortu dut Susan, bi liburu erosi eta elektronikoki ordaindu ditut. Erositako liburuak izan dira “Fikzioaren izterrak”, Ur Apalategirena eta “Bitsa eskuetan”, Miren Agur Meaberena.


Horrekin batera, Calibre aplikazioa instalatu dut nire ordenagailu berrian, eta MOBI formatura bihurtu ditut liburu biak, nire Kindle irakurgailuan irakurtzeko.


Jon Abril
2011-11-02 : 21:11

eta oraindik e-book-ik erosi ez dugunontzat, zein gailu mota gomendatzen duzue?

Mikel Lizarralde
2011-11-02 : 23:15

Kaixo Jon. Ni neu gustura nabil Amazonen Kindle irakurgailuarekin. Liburuak irakurtzeko soilik nahi baduzu nahikoa eta soberan. Aparailu horren 3. bertsio daukat, egungo bertsioa oraindik eta sinpleagoa eta merkeagoa da.


Behin edo behin Asus Eee Pad tablet-ean irakurri dut libururen bat, baina esperientzia erosoago eta hobea iruditzen zait Kindle-ean irakurtzea.


Isuts (Iñigo Susperregi)
2011-11-03 : 10:33

Jon, nik ere Kindle 3a daukat duela hilabete erdi ere eta oso erosoa da. Hainbat eta hainbat foroetan (www.forokindle.com eta www.zonaereader.com) nagusiki irakurri ondoren, irakurgailu hau erostea erabaki nuen. Kalitate eta prezio aldetik onenetakoa baita. Alde txarra liburuak soilik irakurgailuak eskaintzen duen formatoan soilik irakuri ahal izaten dituela da, baina Calibre programarekin epub edota pdf formatoko liburuak mobi formatora bihur ditzakezu eta honela arazorik gabe irakur ditzakezu e-liburuak.

Animo!

Gari Araolaza
2011-11-03 : 12:22

Zorionak Susari!



Oso garrantzitsua da jendea erostera ohitzea, baina horretarako prozesua errazteko pausoak eman behar dira, eta hau norabide horretan pauso garrantzitsua da! Ni jadanik pirateatzera ohituta nago, ez da lojikoa tapa gogorrezko edizio bat 15 Eurotan eta ebook-a 17 an egotea, eta hori sarri gertatzen zait.



Ebook baten bila hasi, webgune desberdinetan, publizitate-tranpak saihestu, captchak azertatu (ze zailak diren azkenaldian), deskargatu, Calibren jarri, konbertsioa egin eta gero ebook-era kargatu. Ba... hori egin beharrean 3,5 edo 6 Euro ordaindu eta di-da batean deskargatzea ez dago gaizki!



Aztertu ote dute Amazonen liburuak salgai jartzea? Diru banaketa ez litzateke hain interesgarria izango ziurrenez (Amazonen komisioak eta abar), baina askoz errazago erosteko aukera izango genuke.

eli
2011-11-03 : 12:40

Mikel Lizarralderi edo Joxe Arantzabali: Mikelen estekak AEBetako Amazonera eraman nau, eta, noski, Kindleren salneurria dolarretan dago. Erosi al da gailua Euskal Herrian? Zein preziotan?

Joxe Aranzabal
2011-11-03 : 12:54

Atzo Susaren liburuak erosi nituenean, konturatu nintzen oso erraza dela bertatik liburuak jaitsi eta ez ordaintzea, Susak ez baitu ezinbestean lotzen bata bestearekin. Nik ere, nahi izan banu, ordaindu barik utz nitzakeen liburuak.


Susak argitu beharko luke hori gurata egin duen ala oharkabean itzuri zaien. Zeren horrela utziko balu, arazo bat izan lezake, eta potoloa, jende askok ez luke-eta ordainduko (eta, ondorioz, egile asko kobratu barik geratuko lirateke).


Behin hiru erabaki horiek hartuta (prezioa, DRMrik ez eta zelan banatu dirua), iruditzen zait Susak ez lukeela aukerarik eman behar ordaindu barik jaisteko (salbu, opari gisa jar ditzakeen liburuak), horrek eragotzi egingo lioke-eta merkatu bat sortzea liburu digitaletan, eta uxatu egingo lituzke-eta idazleak Susatik.


P.D. Erantzuna Eliri: Nik Internet bidez erosi nuen Kindle irakurgailua. Amazonen webgunean sartu eta erosi egin nuen. Handik astebetera-edo, abisu bat jaso nuen Elorrioko postetxetik, paketa bat jasotzeko. Amazonek, bestalde, ez ditu parekatzen dolarra eta euroa (Applek egiten duen moduan). Hortaz, 99$eko irakurgailu bat irtengo zaizu 75€tan, hor nonbait.


Mikel Lizarralde
2011-11-03 : 13:22

Kaixo Eli. Joxek dioen moduan denda amerikarrean eros dezakezu. Prozesua jarraituz kostu osoa emango dizute, bidalketa eta aduana gastuak barne.

Serafin Basauri
2011-11-03 : 13:53

Zorionak Susa!



Aukera bikaina, arazo eta oztoporik gabe, liburuak erosi eta Kindle irakurgailura deskargatzeko.



Eskerrik asko.

txerren
2011-11-03 : 14:27

Nik ere gaur goizean 3 erosi ditut, Jon Benitoren Bulkada eta Koldo Izagirreren Rimmel eta Ez duk erraza Konpai! Guztira 10 euro ta 62 xentimo, nire Nook-ean irakurtzeko. Ez da batere negozio txarra!



Nire aldetik liburuak ordaindu eta irakurtzeko aukerak bereiztea, eta batez ere idazleari argitaletxeari baino bi aldiz gehiago bidaltzea ikaragarrizko aurrerapausua iruditu zait. Zenbat aldiz erosi ote dudan gero irakurri ez dudan libururik, eta zenbat aldiz irakurri ote dudan liburu bat, autoreari zuzenean ordaindu nahi eta nola jakin gabe...



Joxeren zalantzak ulertzen ditut, baina "pirateria" geldiezina da, ez dut uste babes mekanismoetan oinarritu behar denik euskal argitalgintza, irakurleriaren inplikazio eta askatasuna bultzatzen duen sistema batean baizik. Prezio hauetan, eta modu honetan, pirateatzeko gogo txikiagoa sentitzen dut, eta irakurtzeko gogo handiagoa.



Chapeau, Susa. Ni behintzat "harrapatu" nauzue.

eli
2011-11-03 : 15:08

Eskerrik asko Joxe Arantzabal eta Mikel Lizarralde, emandako azalpenengatik.

Unai
2011-11-03 : 18:03

Galdera Susakoei:



katalogoko liburu gehiago jartzeko asmoa duzue?



Eskerrik asko.

Mikel Goñi
2011-11-03 : 23:59

Atzo aurreratu nuen bezala, kobratu bezain pronto erosi ditut bi liburu.

Kontua da Canoren Pasaia Blues eta Edorta Jimenezen Speed Gauak erosi ditudala. Speed gauak, lehengagotik jaitsia nuela (orriz orri) Susaren webgunetik. Berriro jaitsi dut Epub formatuan eta ordaindu dut.

Nik ez dakit hori negozioa ote den, baina bi kontu. Egile eta argitaletxearen arteko akordioa ona iruditzen zait, eta DRM gabekoak izatea are gehiago.

Erantzun

Twitter ikonoa  Facebook ikonoa  Sartu