Bitartean, Estatu Batuetan, Patxi Lopez...
Gaur Donostian Nazioarteko Konferentzia hori egiten den bitartean, Patxi Lopez lehendakaria Estatu Batuetan dago jakina den bezala. Baina handik igortzen dituen seinale eta mezuak begirada zorrotzarekin jarraitzen ditu jendeak. Eta agian espektazioa ere sortuko du bihar Harvard-en emango duen hitzaldiak, zeina honako kartel honekin iragarri duten antolatzaileek, zazpi probintzien mapa eta guzti.
Batetik, adierazpen instituzionala egin zuen atzo lehendakariak. Besteak beste, hau esan zuen Patxi Lopezek:
ETAk eta bere inguruek, betiko amaiera lortzeko, konferentzia bat antzeztu nahi badute, zera esan nahi diet; aprobetxa dezatela.
Adierazpen instituzionala ETBk New York-en dituen lokalen eraikineko sabaitik egin zuen lehendakariak, bideoan ikusten den bezala. Ondoren aisialdirako tartea ere hartu zuen Lehendakariak, Twitterren jakinarazi zuenez:
Times Square. Luz, gente y musicales. instagr.am/p/Qappt/
Bihar, berriz, hitzaldia dauka Patxi Lopezek, Bostondik gertuko Harvard Unibertsitatean: Hazkunde iraunkorra erdiesten; zer ikas dezakete Europako erregio batzuek Euskal Herritik? Agerraldia Europako Ikasketetarako Minda de Gunzburg zentroak antolatu du. http://www.ces.fas.harvard.edu/ Uste dugu Youtube bidez zuzenean emango dutela, hemen gaueko 22.00etatik aurrera (Euskal Herriko ordua).
Antolatzaileek prestaturiko kartelak zazpi probintzien mapa bat erakusten du, eta Patxi Lopez titulu honekin aurkezten du: President of the Basque Country.
Argazkiak.org | Patxi Lopez Harvarden © cc-by-sa: sustatu
Jarraian itsatsitakoa da Patxi Lopez EAEko lehendakariak atzo New York-etik zabaldutako adierazpen instituzionala. Testua ez dugu aurkitu Jaurlaritzaren webguneetan, baizik eta egunkari bateko dokumentuen artean (doc fitxategi bat, gaztelaniazko bertsioa ere badaukana).
****
Hona etorri nahi izan dut; Zona Zerora. Hau da terrorismoaren bidegabekeria erakusten duen irudia. Baina, baita ere, etorkizuna eta askatasunaren eredu. Euskaldunok, inor baino hobeto dakigu zein den leku honen esanahi eta mina.
Urteak daramatzagu, indarkeriaren mehatxupean. Eta ikasi dugu terrorismoari aurre egiteko bide bakarra askatasuna eta demokrazia direla.
Hemengo hildakoak gogoratuz, Euskadin hil dituzten guztien oroitzapena aurrean dudala, indarkeriari aurre egin dioten euskaldun guztiei eskerrona agertuz, hemendik, nahi dut Euskadiko aro berriari ongietorria eman.
Laster ospatuko dugu Euskadin terrorismoaren amaiera; askatasunaren egun handia.
Baina ez da dohaineko oparia: asko kostata lortu dugu. Denbora latzak izan ditugu, egun ilunak. Behin baino gehiagotan hortzak estutu ditugu, aurpegian malkoen gesala ezin gordez. Euskadin izan da hamaika pertsona egoera larrienean ez dutenak amore eman, askatasunari eutsiz norberaren duintasunean ez dutenak etsi.
Gaur, horiei guztiei, eta izan ditugun biktimei, hemen, Zona Zeron, Euskadiren izenean eskerrona erakutsi nahi diet. Euskadin hasten dugun aro berriari eskua luzatu nahi diot, guztion indarrak batzeko deia eginez.
ETAk eta bere inguruek, betiko amaiera lortzeko, konferentzia bat antzeztu nahi badute, zera esan nahi diet; aprobetxa dezatela.
Aprobetxa dezatela benetan indarkeriarekin betiko amaitzeko. Guk etorkizun berria eraiki dugu, inteligentziaz, zuhurtasunez, zuzenbidearen bide jarraiki.
Sarri ETAren terrorismoari aurre egiteko batasuna eskatu izan dut. Gaur, gizarte berria eraikitzeko guztion indarrak elkartzeko deia egiten dut. Hiritar guztiei euren partaidetza eskatzen diet, indarkeria atzean utziz, askatasunezko elkarbizitza demokratikoa lortzeko Euskadin.