Teknologia albisteak

Joseba Sarrionandiarentzako Euskadi Sariak eman du jada zer komentatu

Sustatu

2011-10-03 : 14:10

Gaur goizean jakinarazi da Literaturako Euskadi Saria Joseba Sarrionandiari eman diotela, Moroak gara behelaino artean? liburuagatik. Eusko Jaurlaritzak, saria ematen duenak, hala ere, ez dio sariarekin batera doazen 18.000 euroak egileari zuzenduko, ETAkoa delakoan.

Honako jakinarazpena zabaldu du Eusko Jaurlaritzak, Berriak informatzen duenez (ez baitugu guk oharrik aurkitu ez Kultura sailaren webgunean, ez Irekia edo Kulturklik informazio zerbitzu publikoetan):

Eusko Jaurlaritzak, legea betetzeko eta terrorismoa irmoki arbuiatzeko daukan konpromisoarekiko koherentziaz, oztopo larriak ditu berak babesten eta diruz hornitzen duen saria horrelako pertsona bati eman dakion, hau da, ETA organizazio terroristako kide izateagatik kondenatua izan den, kartzelatik ihes egin duen, 1985az geroz leku ezezagunean den eta bere militantziaz sekula damutu ez den pertsona bati.

Jaurlaritzaren betoarena El Pais egunkariak ere argitaratu du, eta lehen unean, akats handi batekin, gainera. Argazki batean ezkerretan kokatu dute Joseba Sarrionandia, eta han agertzen zena ez zen bera, baizik eta Iban Zaldua irakasle eta idazlea. Argazkia zuzendu dute, baina pantaila irudia atera diogu:

Gaur jakinarazitako gainerako Euskadi Sariak hauek dira:

Euskarazko literatura itzulpena: Karlos Zabalak Zubi bat Drinaren gainean lanagatik.
Literatura lanaren ilustrazioa: Iban Barrenetxea Bombástica Naturalis lanagatik.
Gaztelaniazko saiakera: Iñaki Uriartek Diarios 1999-2003 lanagatik.

Erantzunak

Sustatu

2011-10-03 : 14:50

Kultura Sailak PDF bidezko ohar bat bidali die batzuei, eta Argia.com-en aurkitu dugu guk. Han zehaztu dira Sarrionandiaren liburuak epaimahaiaren iritziz dituen merituak:

Epaimahaiak ikusitako merituak
- Edukien aldetik, oso ondo egitaratuta, ondo garatzen dira ideiak, formalki oso sendoa, lan handia, oso dokumentatuta.

Originaltasuna, urteak pasako dira eta euskal kulturan klasiko bat bihurtu daitekeen
lana.

Ate asko zabaltzen dituen lana, kontsultarako ere baliagarria.

Diskurtso ugaritasuna, eta era berean azpimarratzekoa ere bada pentsaera nagusitik
kanpoko ikuspegi ezberdinak eskeintzeko ahalegina. Kultura aniztasunaren aldeko
aldarria.

Azkenik, edizio lan handia dago atzean, titulu sugerentea, argazkiz eta azalpenez
betetako lana.

Epaimahai hau osdatu dute pertsona hauek:

Ainhoa Larrañaga Elorza, epaimahaiburu.

Andoni Eizagirre Eizagirre, epaimahaikide.

Katixa Agirre Miguélez, epaimahaikide.

Josu Bijuesca Basterretxea, epaimahaikide.

Fernando García Murga, epaimahaikide.

Marta Merino Ortiz de Landaluce, epaimahaiko idazkari (botorik gabea).

Gorri

2011-10-03 : 15:36

Marka da gero prentsa-ohar ofizialean egilearen abizena oker idaztea!

Sustatun ondo jaso duzuen bezala, SARRIONANDIA da, eta ez SARRIONAINDIA.

Ohiko akatsa dela ikusita, Google-en egin dut proba: ondo idatzita 199.000 emaitza inguru, oker idatzita 35.000.

Sustatu

2011-10-03 : 15:52

Egia da, bai, Gorrik dioena: PDF horretan gaizki dago idazlearen izena.

Kontu honek eman du zenbait komentario interesgarrirako Twitterren honezkero. Adibidez:

LoreaArakistain. Euskadi Saria. Dirua aurrezteko estrategia kreatiboa EJrena.

Theklaneh. Nik uste dut #sarrionandia etorri beharko litzatekela bafle baten barruan saria jasotzera

Zaldieroa. .@ibanZ ....zer kabroia zaren!!! eta urte guzti hauetan "iban zaldua" heteronimoarekin gu engainatzen!!!

MasaEnfurecida. TODOS LOS QUE HAYÁIS BAILADO O COREADO SARRI-SARRI ALGUNA VEZ SOIS COLABORADORES DE ETA

Sustatu

2011-10-03 : 17:16

Eusko Jaurlaritzak honako adierazpen hau kaleratu du sariaren inguruan:

Eusko Jaurlaritzak errespetatzen du 2011ko Euskadi literatura saria euskarazko saiakeraren arloan Joseba Sarrionaindiari eman dion epaimahaiaren irizpide askatasuna, eta ez du idazlearen literatur balioa zalantzan jarri nahi.

Dena dela, Eusko Jaurlaritzak, legea betetzeko eta terrorismoa irmoki arbuiatzeko daukan konpromisoarekiko koherentziaz, oztopo larriak ditu berak babesten eta diruz hornitzen duen saria horrelako pertsona bati eman dakion, hau da, ETA organizazio terroristako kide izateagatik kondenatua izan den, kartzelatik ihes egin duen, 1985az geroz leku ezezagunean den eta bere militantziaz sekula damutu ez den pertsona bati.

Ondorioz, Eusko Jaurlaritzak onartu egiten du Joseba Sarrionaindia euskarazko saiakeran 2011ko Euskadi Literatura sariaren irabazletzat jo duen epaimahaiaren ebatzia, baina iragarri nahi du sariari dagokion dirua atxiki egingo duela saridunak justiziaren aurrean bere egoera erregularizatu artean.

Kopururik ez da zehazten oharrean. El Pais-ek 18.000 euro atxikiko dituztela esan du, baina izatez, saria handiagoa da: 18.000 euroko saria egileari eta 4.000 eurokoa lan saritua beste hizkuntza batean argitaratzen bada.

Iban Zaldua

2011-10-03 : 17:29

Ni agertu naizen argazkia 2005ekoa da. Honela agertu zen aurkezpen hura Berria-n.

Egia da egun horretan aurkezten genuen liburuan (Poetikak&Poemak) bazegoela atal bat Sarrionandiari dedikatua (ni nintzen editorea, eta horregatik nengoen han: aurkezpena Gasteizko Gora tabernan egin genuen). Baina pentsatzea ere Sarrionandia aurkezpenera etorri zenik!
Enfin.

Sustatu

2011-10-03 : 19:53

Ainhoa Larrañaga epaimahaiburua elkarrizketatu du Goienak eta ez zaio ondo iruditzen Jaurlaritzak diru-saria atxikitzeko erabakia, Sarrionandiak sariketako baldintza formal guztiak betetzen baitzituen.

Eneko

2011-10-03 : 21:03

Gustatuko litzaidake jakitea ea ze iritzi daukaten Utikan! manifestu "famatu" hura sinatu zuten idazle handiek sari honetaz. Nori eta Sarrionandiari.

e-gor

2011-10-03 : 23:11

Twitter-eko beste bat, oso ona (niretzat behintzat): @unaimy PatxiLok eta Aresek Sarriri saria eman. Eta honek saria jasotzen duenean Ertzaintza agertzen da eta tak, atxilotuta. #LaPoliciaNoEsTonta

Eta MasaEnfurecida-k dioenaz, Patxilok Sarri Sarri atsegin du ;-)

assar

2011-10-04 : 00:22

Fermin Etxegoien:

Ikusiko duzu nork irabaziko duen Euskadi Saria, Bildu Lakuara ailegatzen denean

txu

2011-10-04 : 00:48

Eusko Jaurlaritza ez da inor, inor gero, inorik saria atxikitzeko. Izatekotan epaia, bere zigorran isun ekonomikorik baldin badauka, ostean ezta epaia ere ez. Beste gauza bat da ea nola doan jasotzera. Baina oingo Jaurlaritzak jakin bereizten ejekutiboa eta judiziala? Bai zera! Ejekutiboak hartzen dau judizialaren papera eta ala! Total Espainian ez diote kontra egingo!

Amonamantangorri

2011-10-04 : 02:12

Ezjakinaren galdera:

Elkarrek, Ereinek, Txalapartak, Pamielak nora bidaltzen dituzte Sarriren sosak? Zer egiten du CEDROk Sarriren egile-eskubideekin? Jaurlaritzaren ustez, enpresa eta erakunde zintzo horiek terrorismoarekin kolaboratzen al dute?

Iñigo m

2011-10-04 : 09:53

Patxilo eta euskal literatura:

http://zuzeu.com/2009/05/05/patxi-lopezek-euskal-idazleak-ahotan/

maite

2011-10-04 : 10:42

Ia aklaratzen naizen. Liburuan jartzen duenez Iñigo Aranberrik editatu bazuen obra saritua (epai-mahaiak goraipatzen duen puntuetako bat), eta Aranberrik Utikan Euskadi Saria manifestoa sinatu bazuen... ez dut ezer ulertzen.

Bagatza

2011-10-04 : 15:33

Espainiarrak eta euskal espainolistak joko eremuaren jabeak dira; arauak haien nahiera egiten, aldatzen ala baliogabetzen dituzte, eta baita ere erabaki noiz bete eta noiz ez.

Berdin zaie haien Constitución sakratua, Alderdien Legea, Autonomi Estatutua edo Literatur Sariaren arauak izatea...... haiek agintzen dute eta kito.

Arrazoiak? Zertarako behar dituzte Audiencia Nacionala eta La Brunete baldin badauzkate?

etiam

2011-10-05 : 12:15

Iban Barrenetxea eta bere lan ere aipatu nahi nuke nik. Ilustrazio atalean jaso du Ibanek Euskadi Saria. Benetan zoragarria da Ibanek egiten duen lana. Zorionak Iban!! Iban eta bere lana ezagutzeko:

"Bombástica Naturalis" saritutako lanaren ilustrazio batzuk.

Andoni Olariaga

2011-10-05 : 13:00

Gaitik desbideratzen banaiz ere, jakinaraztea bakarrik hausnart 0. alea osoroik Lapiko Kritikoan dagoela deskargatzeko, Joseba Sarrionandiari egin genion elkarrizketa barne.

http://basque.criticalstew.org/?page_id=6367

Mikel Lizarralde

2011-10-05 : 19:54

Andoni, nik eskertzen dizut bat desbideratzea :-)

Paperezko alearekin ez dakit zer egin dudan eta Sarrirena berrirakurri nahi nuen. Eskerrik asko beraz!

Sarriren miresle bat

2011-10-10 : 16:16

Zer iruditzen Eusko Jaurlaritzak Sarrionandiari patetikoki ukatu dizkion 18.000 euro horiek bere miresle garenok jartzen baditugu? Zergatik ez ditugu 18na euro jartzen, eta mila kidera iristen garenean berari ematen? Pamiela argitaletxeak berak ireki dezake kontu bat eta guk han sartu. Ez dakit, ideia bat da...