Kantu ezagunen doinuekin egindako bertsoak
Zenbait bertso sariketatan (Bertxoko, Kataxulo...) bertsolari gazteek etxetik prestatutako bertsoak eramaten dituzte, doinu ezagunekin. Emaitza bitxiak gertatzen dira telebistan edo tabernetan entzutera ohituta gauden doinuekin bertsoak egitean.
Goiko bideo hori Alaia Martin bertsolari gaztearen agurra da, duela hiru urte pasatxo, II. Kataxulo Bertso Txapelketako kanporaketan. Maia Erlearen kantu ezaguna erabili zuen.
Txapelketa hartako finalean Aitzol Barandiaran ataundarrak La Puta de la Cabra kantuaren doinua erabili zuen, eta hemen emaitza:
Duela zenbait egun ZuZeun ikusi genuen Oier Aranzabal zarauztarrak Gpuntuko saioan hasierako agurra egiteko Shakiraren Waka-Waka abestiaren doinua erabili zuela.
Bertso musikatuen kontuakin ekarri genituen Sustatura Hudaltzainak 2009ko abenduan.
Joan den apirilaren 15ean Bertso-saio musikatua egin zuten Donostiako Egia auzoko Bukowsky tabernan: tabernako giro-ilunean aritu ziren Beñat Gaztelumendi, Jon Martin, Arkaitz Oiartzabal "Xamoa" eta Jokin Labayen. Bideoa bertsoa.com webgunean ikus dezakezue.
Jun dan astean Ni ere bertsolari jaialdian izan nintzen. Zumarraga eta Urretxuko ikastetxe guztietako 4. mailako ikasleak, bertsotan.
Bertso-eskolako blogean irakurri det: bertso jaialdi arrakastatsua. Aretoa, lepo. Guraso ugari zutik. Makina bat argazki eta bideo kamara.
Esan bezela, neu ere han izan nintzan, semea hantxe nuen nik ere -, eta behin baino gehiagotan burutik pasa zitzaidan gogoeta hau ipini nahi det hemen:
Hau, mezetara jutea baino okerragoa da. Han sikiera zure munduan egon zaitezke mezak irauten duen bitartean, baina hemen minutuerdiro txaloka hastera behartuta zaude.
Bai, heavy xamarra, nere gogoeta. Baina ez dakit ba katarsi moduko bat ez ote dan behar haurrei zuzendutako bertsolaritzan.
Bertsoa, ederra da. Bertsozaletasuna sustatzea, gauza aberasgarria. Umeei egin diezaiekeen mesedea eta ekar diezaiekeen onura, haundia. Bertso-eskolen lana eta ahalegina, txalogarria.
Baina doinu hoiek!! Noizkoak dira??
Betikoak, bai. Hain justu, duela ehun urtekoak.
Umeei bertsozaletasunaren arra txertatu nahi badiegu, nere ustetan, uste apalean, derrigorrezkoa da gaur egungo doinuak erabiltzea. Shakirarenak, Esne-beltzarenak, berdin zait zeinenak, baina meza santuaren antza haundiegirik ez dutenak behintzat.
Horra, botatzen diodan erronka, Zumarraga-Urretxuko bertso-eskolari, zein edonongoari: hurrengo jaialdirako, erabili gaur egungo doinuak. Baietz orduan arrakasta, baina benetako arrakasta.