Teknologia albisteak
7

Osakidetzaren webgune berriak euskaldunak iraintzen ditu

Erabiltzailearen aurpegia
Unai
2011-04-05 : 11:04

Eusko Jaurlaritzaren Osasun Sailak atzo aurkeztu zuen Osakidetzaren webgune berria. Euskarazko atala iraingarria da euskaraz irakurtzen dakien edonorentzat, lehen orrian bertan bost akats nabarmen topatu baitaitezke. Suposatzen da orri hori ez duela euskaldun normal batek testeatu, Eusko Jaurlaritzari bost axola zaio edukiak euskaraz ondo dauden ala ez. Osakidetza erantzuten zaitu, informativoak, gaztelerazko zatiak... Iraingarria. Oraindik ere entzun beharko dugu Osakidetzak "mediku onak behar ditu, ez euskaldunak" eta "euskarak diskriminatu egiten du" bezalako perlak.


Argazkiak.org | Osakidetza berria © cc-by-sa: herri.admin

Atari berriko azalean ikusten dena handituta, horra akatsen katalogo bat:


Argazkiak.org | Osakidetza masai ikastaroa © cc-by-sa: herri.admin


Argazkiak.org | Osakidetza masai ikastaroa © cc-by-sa: herri.admin

Baina hau ez da PSOEren Eusko Jaurlaritzak Interneten euskararen aurka egiten duen lehen aldia. Sustatun bertan aipatu zen Irekiaren webgunean zeuden akatsak.

Beste adibide batzuk

Erosketa Aktiborako Q Plana kanpaina atera zuten orain gutxi. Webgunearen helbidea gazteleraz, Planaqtiva.com) da, euskarari jaramonik ez, eta nabigatzailea euskaraz konfiguratuta eduki arren zuzenean beti gaztelerazko bertsioara doa. Webgune honek sare sozialekin lotura du, Facebooken ere sarrera gehienak gazteleraz dira eta erderaz aritzen direnean herrien izen ez ofizialak erabiltzen dituzte: Baracaldo, Santurce, Marquina... Euskarazkoen ere ezin asmatu: Gizpuzkoa, Donosti. http://www.facebook.com/planaqtiva/posts/108934839188227

Twitterren gauza ez da hobetzen, hemen ere profil berriak sortzen dituztenean euskara baztertzen dute. Etxebizitzaren Euskal Legea aurkezteko profilaren bioa hizkuntza bakarrean azaltzen da.

Erantzunak

Karlott
2011-04-05 : 11:53

Polizia espainolek osaturiko gobernutxo hori zeinahi astakeria egiteko gauza da -azpitik, noski-, zeharo medriokreak direla behin eta berriro frogatu dute horko gehientsuenek.

Hasi Mendia eledunarekin (a ze grazia zeukan Azkaratek, gezurrik latzenak zinismo ezin freskoagoaz adierazteko!), segi galiziar koadrilla curriculumgabe horrekin (inutilagorik nahi? Ez da posible, alferrik da horiekin) eta bukatu Superpatxi lehendakari ergel harroxka inauguratzailearekin, sekula santan gauza berririk esan edo egin ez duena.

Kasakristokoak dira,ez dute ezagutzen ez euskara, ez euskaldunok. Horregatik ez dituzte errepasatzen publikatuko den testurik.

Sustatu
2011-04-05 : 12:14

Beste errorerik ere bada webgunean. Irakurri dugu Twitterren aurretiazko zitarik hartzerik ez zegoela Firefox edo Chrome nabigatzaileekin.


Aproba bat egin dugu Firefox-ekin eta behintzat OTI txartelarekin (gaztelaniaz, TIS), errorea irten zaigu, gaztelaniaz gaztigatuz telefonoz deitzeko. Deitu dugu, eta lehen hitza gaztelaniaz egin diguten arren, euskaraz argitu digute inongo nabigatzailerekin ez zebilela aukera hori gaur goizean.



Argazkiak.org | Osakidetza aurretiko zita © cc-by-sa: herri.admin


Unai
2011-04-05 : 13:38

Eta oraingo honetan ere, Twitter kontu ofiziala zabaldu dute eta bio-a (profilaren azalpen laburra) gaztelera hutsez dago:


http://twitter.com/#!/osarean


Sustatu
2011-04-05 : 14:00

Twitter kontu hori O-sarean deritzon proiektu batena da, ez dakigu zehatz Osakidetzaren atari berriak horrekin zerikusia zuzena duen.


Bi hizkuntzatan tuiteatzen dute kontu horretatik, baina euskaraz akats tontoak ere ageri dira: Badira arratsaldeko 4rak 4ren 4an eta hemen dago Euskal Osasun Publikoaren Atari Berria edo Blogan Post berria.


Blog bat ere badute, baina hizkuntzen kudeaketaren aldetik gaizki antolatua: mezuak itzuliak dira, eta erantzun-hariak nahasita daude. Horrela mezu batzuek, itzulpenik gabe, gaztelaniaz agertzen dira portadan, eta euskarazko mezu batek, ordea, gaztelaniazko erantzunak izan ditzake koherentziarik gabe.


Txopi
2011-04-05 : 14:45

Nik Firefox-ekin zita eskatu dut behin baino gehiagotan OTI txartel arruntarekin. Baina kostatu zitzaidan. Arazoa ez zen Firefox erabiltzen nuela, baizik eta euskaraz ari nintzela zita eskatzen:



Txartel fisikoan iraungitze data HILEA/URTEA agertzen da. Zita eskatzeko euskarazko formularioan, programatzaileek dena euskaratu eta URTEA/HILEA sartzeko eskatzen dizute. Baina noski, formularioak urtea lehenago eskatu arren hilabetea da espero duen lehen datua. Horrela egin ezean errorea ematen du. Instrukzioak euskararen kasuan beraz oker daude.

Sustatu
2011-04-06 : 13:38

Twitter bidez Sustaturi erantzun diote: "ure gune guztien Euskararen berrikusketa prozesuan gaude. Eskerrik asko zuen ekarpenengaitik".


Aldaketa batzuk gertatu dira Osakidetzako portadan: falta zen ergatibo agertu da, bilaketa lehiatilako testua zuzendu dute, akats ortografikoren bat ere bai, aurretizko zitaren inguruko gaztelerazko azalpena desagertu da (euskarazkorik agertu barik)...


Era berean, Twitterreko profil horren azalpena bi hizkuntzatan jarri dute.


ane zabala
2011-04-06 : 14:03

Egun on !!



Osakidetzako web berrian sartu naiz eta antza denez, hasiera baten zeuden akatsak zuzenduta daude: mugitzen ari diren seinale !!



Bestalde, zita bat hartu dut inolako arazorik gabe. Urtea/ Hilabetea/ Eguna jarriz badoa, eta epemugarekin berdin!!



Egia esan, web berri hau aurreko baino askoz politagoa da.

Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago