Kirmen Uribek webgune berria du

Lehendik ere bazeukan webgunea Kirmen Uribe idazleak (Ondarroa, 1970). Oraingoan, baina, goitik behera berriztu du, gune dinamikoagoa sortuz. Idazlearen agenda eta hitzaldien berri emango du, albisteak ere baditu, bideoen atal bat... bere biografia eta bibliografia azaltzeaz gain. Tarteka testuak gehitzen joateko asmoa ere badu.

Webgune berria dela eta, galdera batzuk bota dizkiogu Kirmen Uriberi, eta berak azkar erantzun.

• Webgune berria daukazu. Zer helburu duzu webgune berri honekin?
  Helburua komunikazioa da, irakurleekin harremanak estutzea. Nahi duenaren esku jartzea informazioa (berriak, agenda kontuak, orain arteko egindakoaren laginak...) eta gainera bitxikeriak ere gerturatzea, lortzea zailak diren gauzak: irakurketak, grabazioak, edizio arraroak... Adibidez, Bordelen bertako aktore eta musikarien laguntzaz euskaraz eta frantsesez egindako errezitala dago entzungai. Edo Taipeiko poesia festibalean "Bisita" poemarekin tajutu zuten bideoa. Bestalde, esan beharra dago webguneak ez duela soilik testuetan arreta jartzen, idazleen webetan gertatu ohi den legez, dinamikoagoa egin nahi izan dugu, eta irudiari ere toki berezia eman nahi izan diogu, ikusentzunekoei.
• Webguneaz gain, zure hainbat bideo Youtuben daude, Facebook orrialdea ere baduzu... Laneko kontu hutsak dira? Ala zure eguneroko jardunerako ere erabiltzen dituzu teknologia berriak?
  Ez, eguneroko bizitzan erabiltzen ditut, maila pertsonalean eta lanean. Mundu guztiak bezala, bestalde.
• Interneta, oro har, eta sare sozialak bereziki, erabilgarri ikusten dituzu idazle baten jardunerako?
  Ez erabilgarri bakarrik. Inspirazio iturri ere bai. Gaur egun ezin da idatzi teknologia berriak kontuan hartu gabe, haiei bizkarra emanda, izango ez balira bezala. Gure bizitzan eragina duten neurrian literaturan ere izan behar dute. Pasa den mendeko nobela beltzak zigarroaren kerik gabe idaztea bezala izango zen. XX. mendeko literatura kazetaritzak eta zineak moldatu zuten. XXI. mendekoa ezingo da ulertu internetik gabe. Ni saiatu naiz tradizio berri hau guztia nire lanean jasotzen. B-NY-B eleberrian gmaileko mezu elektronikoak eta Facebookekoak bere horretan ageri dira, baina ez hori bakarrik. Idazketan ere izan dute eragina. Liburuak sare-egitura du, lehenengo pertsonan kontatzen da eta sare-sozialetako testuen abiadura hori erabili dut kontakizunean. Asko dugu ikasteko idazleok teknologia berrien kulturatik.
• Gainera, aipatu duzun eleberri horrek, New York-Bilbao-New York liburuak, blog egitura duela ere aipatu izan da. Inoiz ikusiko zaitugu blog bat idazten?
  Badut asmo bat, "Lantegia" izenekoa, eta azaldu literatur lan bat barrutik, nola sortzen den, dauden zailtasunak, zalantzak, dokumentazio-lanak. Hori dena irakurlearen esku jarri. Baina pixkanaka pixkanaka joango naiz, oraingoz webgunea martxan jartzearekin nahikoa dugu. Sare-sozialetan parte hartzea ere oso interesgarri ikusten dut, blog klasikoa moldatzea baino areago.
• Euskal idazleen artean badago nolabaiteko fobia txiki bat teknologia berrien aurrean. Ez dago ia blogaririk, are gutxiago tuiterlaririk, eta webgunea duzuenok ere dozenara ez zarete helduko. Rara avis bat zara? Denbora kontua da?
  Denbora kontua da dudarik gabe. Ezin dugu bizi teknologia berriei bizkarra emanda. Literatura sistema goitik behera aldatuko da urte gutxian. Badirudi batzuk beldurrez ikusten dutela hori, Eibarren armak egiten hasi zirenean sorginak hil zirenean bezala. Hori dio behintzat esaera zaharrak. Ez, gauza interesgarriak sortuko dira, hibrido berriak, literatura eta ikusentzunekoak nahastuz... Irakurleekin harremana ere sarearen bitartez egingo da gehienbat. Edo zuzenekoetan. Nahiz eta hasieran egoera zaildu egingo den neurri handi batean, aldaketa garai guztietan jazo ohi denez, nik aukera bat bezala ikusten dut kontua, gauza berriak probatzeko aukera.
• Eta amaitzeko: noizko Twitterren?
  Astirik banu egoki kudeatzeko, bihar bertan.

KirmenUribe.com

Argazkiak.org | KirmenUribe.com © cc-by-sa: codesyntax