Kontseiluak udalen hizkuntza-politiken neurketa jasotzen duen web gune berria aurkeztu du
Euskararen Gizarte Erakundeen Kontseiluak bigarren aldiz neurtu ditu udaletako hizkuntza-politikak. 2006an egin zen lehen neurketa eta ziklo politiko osoa igaro ondoren egin du bigarrena, 2010ean. Otsailaren erdialdean egin zuen Kontseiluak bigarren neurketaren aurkezpena Donostiako Aquariumean. Orain, berriz, www.udalenhizkuntzapolitika.org web gunea.
Argazkiak.org | UdalenHizkuntzaPolitika.org © cc-by-sa: sustatu
2006an egin zen lehen neurketan, datu guztiak liburu batean bildu baziren ere, oraingoan informazio guztia euskarri informatikoan eta sarean eskainiko du Kontseiluak. Web gune honetan, hainbat informazio topatzeko aukera izango du erabiltzaileak.
Hala nola, Kontseiluak egin duen irakurketa osoa, txosten formatuan, udaletan ematen diren aurrerapauso eta atzerapausoak (bi atal hauek parte-hartzaileak izateko helburua dute; bera, edozein herritarrek bere herriko egoeraren inguruko informazioa eman nahi baldin badu, bertan argitaratzea eska dezake).
Kontseiluak sortutako hainbat lan ere jasotzen da bertan, hala nola, ordenantza eta delibero eredugarriak, hizkuntza-politika berri eraginkorrerako proposamena. Bestetik, gai honi lotutako albisteak jasotzen dituen atala ere badago eta baita multimedia artxiboetarako lekua ere.
Erabiltzaileak egindako bi neurketen ranking-ak ere ikusi ahal izango ditu bertan. Eta kontsulta xeheak egiteko aukera ere badago. Horretarako, izena ematea beharrezkoa izango da. Kontsulta xeheak, hainbat aldagai kontuan hartuta egin ahal izango dira, egindako bi neurketetako datuekin. Bestalde, 66 herrik orrialde propioak dituzte, ranking atalean. 2010ean 114 herrietako hizkuntza-politikak aztertu badira ere, 2006an 66 herri izan ziren, horregatik, alderaketak 66 horiek aintzat hartuz egin dira.
Martxan dagoen tresna berria udaletako hizkuntza-politiketan interesa duen ororentzat baliagarria izango da.
/cache/Udako-Ola-2024_1_small_content.jpeg)
Webgune hori aurkezteaz gain, aste honetan Kontseiluak urteko batzarra egin du Nafarroan, Altsasun, hain zuzen ere. Bertan, Kontseilua osatzen duten bazkideen hainbat ordezkari bildu da. Paul Bilbao Kontseiluko idazkari nagusiak azaldu duenez, "euskaraz bizi nahi dugula aldarrikatzen ari gara azken urteotan. Herritar andanak aldarrikatu du nahi hori eta Kontseiluak hori lortu nahi duten herritarrentzat akuilu izan nahi. Aurten zentzu horretan urratsak eman daitezen lan egingo dugu".
Urteko batzarrean, Kontseilua osatzen duten bazkideek 2010ean egindako lanaren balorazioa egin dute eta 2011n garatuko diren ildoak ere adostu dituzte. Euskaraz bizitzearen aldeko apustu argia egiten du Kontseiluak. Datozen hilabetetan, ildo horretan jarraituko du lanean.
Euskaraz bizitzeko eskubidearen inguruan aritu da Bilbao ere, eta gai hau, erdigune politiko-sozialean koka dadin deialdia egin du. Herri mugimenduak bultzatuta euskararen normalizazioan aurrerapauso garrantzitsuak egin direla aipatu du, baina oraindik helburura heldu ez garenez (euskararen normalizazioa), indar gehiagoz lan egiteko deia egin du. Ildo horretan, guztiok elkarrekin lan egitearen beharra ere aipatu du Kontseiluko idazkari nagusiak. Izan ere, Bilbaoren esanetan "euskaraz bizi nahi duten herritarrei euskalgintzak babesa eman nahi die izan ere, guztiok elkarrekin lan eginez aurrerapausoak ematea lortuko dugu".
Iruñeko Planetariumean 2010eko azaroan aurkeztu zuen Kontseiluak egoeraren inguruan egiten duen irakurketa eta aurrera begira egiten duen proposamena. Norbanakoen aktibazioan indarra egin nahi du Kontseiluak aurrera begira. "Euskararen normalizazioan guztiok dugu zeregina. Bakoitzak bere esparrutik jomuga dugun normalizazioan urratsak eman daitezen eragin dezake", aipatu du Paul Bilbaok. "Herritar askok euskaraz bizi nahi duela aldarrikatu du modu desberdinetan eta baita eguneroko bizitzan ere. Hori guztia kudeatzen ahalegina egingo dugu", esan du Kontseiluko idazkari nagusiak.
Datozen hilabeteetan gauzatuko duen lanaren plangintza onartu du batzarrak eta epe laburrean emango du Kontseiluak abian jartzeko asmo duen dinamika osoaren berri publikoki.
Bestetik, Kontseiluko bazkideen batzarrak Xabier Mendiguren Bereziartu ohorezko lehendakari izendatzea erabaki du. Mendiguren Kontseilua bere sorreratik ezagutzen du. Sortze prozesuan parte hartu zuen eta lehen hamar urtetan bertako idazkari nagusia izan da. Egindako lanaren errekonozimendu gisa oroigarri bat ere jaso du.