Sortu ez legeztatzea erabaki du Gorenak
Espainiako Auzitegi Gorenak Sortu ez legeztatzea erabaki du. Sorturen Estatutuek indarkeria oro gaitzesten zuten, ETArena barne. Legeztatzea lortzeko, Auzitegi Konstituzionalera errekurritu beharko du Sortuk, baina ez dirudi Udal hauteskundeetarako lortuko duenik.
Hedabideetan agertzen denez (eitb, Berria, El Mundo, Goiena...) legez kanpo uzteko arrazoia ez da Estatutuetan agertzen dena, baizik eta "Batasunaren jarraipena" izatea. Estatutuen aurkezpena baino 3 aste lehenago, Espainiako Gobernuko Barne Ministroak 2 aukera ikusten zituen Batasunaren legeztapena gauzatzeko:
O convencer a ETA para dejar las armas o abandonar ellos a ETA
Alegia:
- ETAk armak uztea.
- Legez kanpo geratutako ezker abertzaleak estrategia militarra albo batera uztea.
Sortuk indarkeria gaitzetsi du, baina Batasunaren jarraipena izate hutsa arrazoi da legez kanpo uzteko. Rubalcabaren ildo beretik hitz egin zuen Eusko Jaurlaritzaren bozeramaile Idoia Mendiak, urtarrilaren 16an Ser irratian:
O conseguir que ETA abandone la violencia, o desvincularse clara y activamente.
Baina Idoia Mendiaren elkarrizketa horretan beste apunte interesgarri bat ere uzten du: "Evidentemente las Leyes tienen una letra, pero también tienen un espíritu, y hay que cumplir con él". Alegia, idatzita egon gabe ere, legearen "izpiritua" bete behar dela.
Erabakia ez dute aho batez onartu, 61eko aretoko 3 magistratuk epaiaren aurkako boto partikularra eman baitute. Estreinakoz gertatu da hori, Batasuna legez utzi ondoren hainbat alderdiren aurka hartutako erabakiak aho batez hartu baititu Auzitegi Gorenak: AuB, Herritarren Zerrenda, Aukera Guztiak, ANV-EAE, ASB, EHAK-PCTV, Abertzale Sozialistak, Askatasuna eta D3M. Oraingo honetan 3 magistratuk aurkako boto partikularra eman dute.
Edonola ere, erabakiak aurrera egin du eta orain horren aurkako babes helegitea aurkeztu dezakete Sorturen sustatzaileek Konstituzio Auzitegian. 30 egun dituzte errekurtso hori aurkeztu ahal izateko, baina ondoren gehiago luzatuko da, auzitegi honetan prozesuek luze jotzen dute eta ez dirudi maiatzaren 22ko Udal eta Foru hauteskundeetarako erabakirik hartuko dutenik, izan ere zerrendak apirilaren 13a eta 18a bitartean aurkeztu behar dira.
Erantzunak
Jesus Egiguren PSE-EEko presidenteak irrati batean egindako adierazpenak jaso ditu Berria.info-k. Sortu legez kanpo uztea anekdota iruditzen zaio, eta ez omen du hainbeste garrantzirik legeztatzea orain edo lau hilabete barru gertatzea. Gainera, abertzaleen indarra biktimismotik sortzen dela uste du Egigurenek.
Sorturen estatutuak aurkeztu zirenean bakearen lehen eguna huraxe izan zela esan zuen Jesus Egigurenek. Duela egun gutxi, era berean, ausardia politikoa eskatu zion Jose Luis Rodriguez Zapatero Espainiako gobernuburuari.
Libian indarkeria justifikatu dute espainiarrek eta indarkeria erabili interes ekonomikoengatik. Aldi berean, Sortu legez kanpo utzi dute, indarkeria gaitzetsi baina "ez sinesgarria" delako. KONTRADIKZIO IZUGARRIA IZATEAZ GAIN, INJUSTIZIAREN KEINU MINGARRIA. Kontua ez da "justiziaz" hitz egitea, espainiarren legeak euskaldunen aurkako sistema batez baizik.
El Mundok dioenez Goreneko aretoko 16 epaileen artean 9-7 bozketa gertatu zen. Legez kanporatzearen aurka bozkatu zuten zazpi horietarik, 3k kontrako iritzia idatziz emango dute, ez besteek.
Egunkari horretako zuzendariak, Pedro J. Ramirezek esan du Twitterren bozketa estu horrek ez duela ezer onik iragartzen Auzitegi Konstutizionalaren erabakiari begira, eta ezker abertzalea instituzioetatik at egoteko, kaleko mobilizazioa beharrezkoa izango dela.