Christopher Hitchensentzat nahikoa dira bi atzamar makinaz idazteko
Christopher Hitchens idazle nekaezina da. Minbizi ia sendagaitz batekin bizi da azken hilabeteetan, baina ez du eten bere jarioa, ez polemista bezala agerpen publikoetan, ezta artikuluak idazten ere. Eta nahikoa zaizkio bi atzamar teklatuan idazteko, hurrengo bideoak erakusten duen bezala! Erreibindikatua sentitzen naiz, ia inork onartzen ez didan ideia batean: mekanografia alfer alferrekoa dela.
Hamar barik, nahikoa bi
Nire teoria da mekanografia, hamar atzamarrekin, bakarrik dela baliagarria baldin eta tekleatu behar duzuna aldez aurretik emana datorkizun: alegia, paperetik testu bat kopiatu behar duzu, edo diktaketa lanean (edo grabaketa batetik transkribatzen). Alegia, idatzi behar duzuna ez denean zure ahotsa. Aldiz, pentsatu eta idatzi behar baduzu, alferrik da. Sekula ez doaz eskuak burua baino azkarrago. Pentsatu egin behar da, ideiak ordenatu, eta esaldietan forma eman haiei. Eta horrela sortzen zaizuna, idatziz jartzeko, bi atzamarren abiadura nahikoa da.
Izatez, kazetari izan nintzenean edo gerora ere (idaztea tokatu izan baitzait), mekanografoak topatu izan ditut inguruan, baina nik baino azkarrago idazten dutenak, ba ez. Hiru mila karaktere kokodriloen krudeltasunaz? Alde ala kontra? Aterako dizkizut bi atzamarrekin, askok hamarrekin baino azkarrago.
Hitchens horrela ikustea poz handia izan da niretzat beraz. Bideoa Reddit albiste-komunitatean aurkitu dut. Ez naiz lehena izan bertan Hitchensen idazteko erari erreparatu diona, baina nonbait, sinestezina da kontua gehienentzat. Neure iritzia ere utzi dut bertan, baina jendea ez dago neurekin ados. Programatzaile batek baino gehiagok erantzun du abiadura mentalaren argudioarekin, hamar atzamarrekin azkar idazteak abantaila dela, burua hurrengo pentsakizunera ahalbait azkarren pasatzeko... Batek Hitchensen beste bideo bat ere aipatu du, non sei atzamarrekin ari den nonbait. Badaezpada ez dut klikatu: nire aurritziak dagoeneko nahikoa finkatu dira lehen bideo honekin, ez dezadan neure uste irmoa despisteekin kutsa.
Ezagutu Hitchens
Christopher Hitchens da idazle polemiko eta azkar-azkar bat. Ezker marxistatik abiatu eta Irakeko inbasioaren aldeko bihurtzeraino. Bidean, monarkia britainiarra, Clinton, Ama Teresa Kalkutakoa... makina bat pertsonaia publiko txikitu ditu bere lumaren zorrotzarekin. Azken urteotako ateismo berrindartuan ere protagonista nagusietako bat dugu, ez bakarrik Jainkoaren absurdoa nabarmentzen duelako, baizik eta erlijioen oker eta kalteak agerian jartzeko egindako lanagatik.
Ikusi ezazue, jariorako nolako gaitasuna duen:
- Tony Blair kristauarekin eztabaidan, fedea ona ala txarra ote den.
- Apokalipsiko lau zaldunak: lagunekin hemen, aurkariekin baino, intelektual ateoen arteko tertulia. Torrent gisa jaisteko moduan estekan.
Eta idazten bada...
- The King's Speech, oscarretan irabazi duen filmari buruzko bi iruzkin.
- Vanity Fair aldizkarian bere artikuluak eta haren gaixotasunari buruzko beste zenbait testu.
Erantzunak
Ez nuen Christopher Hitchensentzat ezagutzen baina, aurreko batean autoa konpontzera eraman nuen tailerrera eta hango bulegariak ere bi atzamarrekin idazten zuen, oso motel idatzi ere! Denbora mordoa behar izan zuen fitxa betetzeko, desesperatzeko modukoa! Hala ere, onartu behar dute beti iruditu izan zaidala oso barregarria ikustea bi atzamarrekin azkar-azkar idazten dutenak, nik sagutxo itxura hartzen diet...
Bestalde, urreratu batzuk ere bazarete bi atzamarrekin idazten duzuenok. Izan ere, iPad, telefono eta gailu berri horiekin guztiekin bi atzamarrekin idaztea besterik ez dago! Batzuetan, halako tresna aldaketak ekarri izan ohi dute ohituren aldaketa!k. Seguru nago iPadak hilko duela mekanografiaren izarra!
Nik asko (eta gehiegi) idazten dut bi hatzekin, eta ulertzen dut Luistxok dioena, baina beti bota izan dut faltan hamarrekin idaztea. Areago, azken bi urteetan gaitzak jota nabil bi hatzen kontu horregatik eta idatzi ezinik ari naiz geratzen, elbarriturik, eskuineko hatz-besoetako minez, batez ere. Kirofanoa ere ezagutu dut... Segur naiz hamarrekin idatzi izan banu, ez nukeela horrelakorik. Barkatu, baina neuk menderatu ez arren, mekanografiaren alde egingo nuke nik, nahiz eta horrek ez duen inoren idazlanik hobetuko, akaso bai baten-baten osasunik ez hainbeste gaiztotuko...
Ba niri bi hatzamarrekin idaztea pentsatzeko orduan, ertzain bat datorkit burura, salaketa bat edo deklarazio bat jasotzen, bi hatzamarrekin idazten duena, ezpainak mugitzen dituena idazten ari dena xuxurlatzeko, eta, tarteka geratu egiten dena esateko: "no me deja la pantalla!"
Nik mekanografia ikasi nuen eskolan eta hamar atzamarrekin idazten nuen. Gogoan dut ordenagailu faltan, idazteko makina zahar batekin praktikatzen nuela etxean. Azkar idazten ikasi nuen, hatzamar txikia nekatzen bazitzaidan ere (makina zaharrekin SHIFT tekla erabiltzeko indar asko egin behar zen).
Gero ordenagailuan programatzen ikasi eta egun osoa CTRL, ALT, SHIFT, ALTGR eta abarrekin nenbilen etengabe eta bi atzamar bakarrik (erakusleak) erabiltzen nituen. Testu bat idazten nuenean modu baten idazten nuen eta programatzen edo nabigatzen nengoenean berriz beste modu batean. Azkenean, ni kontziente izan gabe, tarteko bide bat hartu nuela dirudi eta bi atzamar erabiltzen nituen batez ere, baina SPACE tekla atzamar lodiarekin (erpuruarekin) jotzen jarraitzen nuen.
Urteak pasatu dira eta bi atzamarrekin idazten nuelakoan nengoen baina artikulu hau irakurri dudanean, orain nola idazten dudan begiratu dut eta nire idazteko erak eboluzionatu duela dirudi: oraindik hatz erakusleak erabiltzen ditut gehien, baina idatziko dudan berbaren arabera, hatz luzeak ere noizbehinka erabiltzen ditudala ikusi dut. SPACE teklarentzat erpurua erabiltzen dut (beti erpuru berdina) eta SHIFT teklekin hatz nagiak. Beraz, gehien erabiltzen ditudanak 2-3 atzamar badira ere, guztira 7 hatz erabiltzen ditut. Inoiz erabiltzen ez ditudan atzamarrak txiki biak eta erpuruetako bat da. Txundituta geratu naiz...
Baina beno, esan nahi nuena da teklatua erabiltzeko erak ez duela inolako zerikusirik teklatuak erabiltzeko ohiturarekin eta idazteko habiadurarekin. Nik urte mordoa daramatzat teklatuak erabiltzen eta oso azkar idazten dut, baina mekanografia jakin arren arau horiek erabiltzeari utzi nion, geldoago joatea eragiten ninduelako (!).
Bai, Luistxo. Mundu guztia oker dago. Zuk arrazoia.
Bi behatzekin, hamarrekin baino azkarrago idazten da. Mekanografia ikastaro guztiak, fraude bat dira.
;-)