Twitterren etorkizuna ezbaian
El Pais egunkariak Nicholas Negroponte teknologia aditua elkarrizketatu du, eta besteak beste, Twitterrengan ez duela konfiantza gehiegirik erran du: "Ez dut uste Twitterrek luzaroan iraungo duenik; denbora asko galtzen da, nahiz eta interesgarria iruditzen zaidan mezu laburrak modu erraz eta zuzenean bidaltzea".
Facebookek, ordea, bide oparoagoa izango du, Negroponteren aburuz: "Askoz ere erabilgarriagoa da".
Bestalde, duela urte batzuk iragarritako paperezko komunikabideen gainbehera berretsi du orain: "Ziur gaude papera euskarri gisa desagertuko dela, banaketa eta ekoizpen arrazoiengatik eta kostuarengatik. Muina ez da zer pantailatan edo zer euskarritan jasotzen ditugun albisteak, baizik eta albiste horien sinesgarritasuna".
Elkarrizketa osoa irakurtzeko, hemen
Erantzunak
Nirea azken bi urteetako erabiltzaile arrunt baten iritzia baino ez da.
Patxitraperok dioen modura, Twitter eta Facebook supermerkatu handi baten antzerakoak dira. Nik, aldiz, esango nuke sarea bera dela supermerkatu handi bat. Eta zer aholkatzen digute kontsumitzaileen elkarteetik supermerkatura joan behar dugunean? Ba aldez aurretik erabakitzea zer den erosi beharrekoa eta horren araberako zerrenda bat egitea. Nola osatu gure "interneteko zerrenda"? Adibidez, Twitter-en bitartez, bertako kontua postontzi handi bat balitz bezala erabiliz. Nik horretarako dut Twitter eta agenda zerbitzu hori betetzen laguntzen duela esango nuke.
Iban Arantzabalek esandakoa irakurrita irrati libreen fenomenoaz akordatu naiz. Oso zaila da "amateurismo"tik abiatuta sormena eta kalitatea mantentzea.
Joseba, gustatu zait konparaketa. Eta horren haritik, ni behintzat urduri jartzen nau ehunka "spam" (batere interesatzen ez zaizkidan eskutitzen) artean begiratzen - denbora asko galtzen - ibili beharra, hamar bat gauza tajuzko jasotzeko. Bestela ere, hain zuzen tajuzkoak direlako, beste hedabideeetan (Sustatun, Berrian, Zuzeun...) azalduko direnak.
Eta hamar beharrean, ehun balira ere. Informazio jakingarri guzti hori ere, beharrezkoa zait? Derrigorrez ondo-ondo informatuta egon beharra dago? Geratzen zait denborarik informazio horrek ekar lekizkidakeen onurez gozatzeko? Ala prozesatzaile hutsa bihurtu naiz?
@Patxitrapero: Oso zaila da definitzea zer den beharrezkoa; beraz, bakoitzak idatz ditzala bere lehentasunak nahi duen agendan. Edozein kasutan, beti merezi du zerbaiten bila ibiltzeak. Akordatzen naiz, aspaldi, diskaren bat erostera joaten nintzenean, nola dendako apal guztiak arakatzen nituen lepoko minez eta erdi zorabiaturik burua jaso behar izateraino tarteka. Adibidez, aurten Natalie Merchant-en Spring and fall: to a young child izeneko kanta hau deskubritu dut ia kasualitatez. Tira, badakit kanta horrek ez didala bizitza salbatuko, baina egun horretan sarean galdutako denborak bere fruitua eman zuen eta lehenagoko garai haietan dendatik ateratzean izaten nuen emozioa berreskuratu nuen.
Patxitraperok ere uste du, Negropontek bezala, denbora-galtze handia dakarrela Twitterrek.
Josu Lezameta Jozulinek, ostera, indar handia ikusten dio tresnari.
Iban Arantzabalek ere piztu zuen eztabaida beste ertz batetik duela egun batzuk.