Sustaturen Facebookeko jarraitzaile gehienek euskaraz daukate euren kontua

Facebooken adiskide bat izatetik orrialde izatera igaro da Sustatu. Aldaketa iragarri genuenetik 358 zale izatetik (ekainaren 22an) 619 izatera pasa da (uztailaren 8an). Gorakada horren grafika eman digu Facebookek:

Argazkiak.org | Gorakada FB jarraitzaileetan © cc-by-sa: sustatu

Aldaketa egin genuenean, arrazoien artean, honako hau eman genuen:

Orrialdeen kudeaketa ereduak hobekuntzak izan ditu Facebook-en. Profil pertsonaletara sartu gabe, erabiltzaileen estatistika orokorrak lortzen dira (adin taldeen arabera, adibidez), eta marketin aldetik abantaila hauek areagotu daitezkeela uste dugu. Webgune baten kasuan, gunerako trafikoa monitorizatu eta areagotzeko bideak ugalduko direla uste dugu.

Hala da, eta estatistika horien artean ikusi dugu Sustatu.com orrialdea gustoko dutenen artean hizkuntza nagusia euskara dela. Horrela daude banatuta Facebook jarraitzaileak hizkuntzaren arabera:

• Euskara 388
• Gaztelania 193
• Ingelesa 28 (16 AEBko ingelesa, 12 Erresuma Batukoa)
• Frantsesa 3
• Katalana 1
• Poloniera 1

Facebook euskaraz 2008tik erabili daiteke. Ez dakigu jarraitzaileek Facebook kontua bakarrik konfiguratu duten, edo nabigatzailea euskaraz izatean automatikoki erabiltzen duten Facebook euskaraz. 2009ko Sustatu webgunearen estatistiketan Sustatuzaleen %46ak zerabilen nabigatzailea euskaraz.

Nola euskaratu zure Facebook kontua

Zure Facebook kontua ez baduzu euskaraz ikusten, agian izango da oraindik ez duzula zure nabigatzailea euskaratu. Nabigatzailea edozein hizkuntzatan izanda ere, Facebook kontua euskaratu dezakezu. Horretarako, ondorengo pausuak jarraitu:

1. Kontua. Cuenta / Account
2. Kontuaren ezarpenak. Configuración de mi cuenta / Account Settings
3. Hizkuntza. Idioma / Language

Instrukzio hauekin batera, Tuenti euskaratu zutenean egin genuen bezala pantaila-bideo bat ekarri dugu instrukzioak argiago ikusteko: