Gabonak Zubietan: herriko eskolan ikasten jarraitzeko aukera eskatzen
Zorionak eta urte berri on 2010. Hona hemen Zubietako (Gipuzkoa) Eskola Txikiko Guraso Elkarteak urte berria ospatzeko atera duen postala. Olentzero maitea: Aurtengoan ez dugu jostailurik nahi, aurtengoan gure herriko eskolan ikasten jarraitzeko aukera baizik ez dizugu eskatu nahi...
Argazkiak.org | Zubietako eskola txikixa © cc-by-sa: sustatu
Olentzero maitea:
Aurtengoan ez dugu jostailurik nahi, aurtengoan gure herriko eskolan ikasten jarraitzeko aukera baizik ez dizugu eskatu nahi. Horrela, herriko betiko lagunekin jostatzen segituko dugu, autobusa hartu beharrik ez, eta etxetik, eskolara oinez joaten jarraituko dugu, eskolan atetik atera eta plazan eta frontoian jolas eta jolas ariko gara... Izan ere, horrela, Zubietan gure algarak eta negarrak entzungo dira, gurasoon eta aiton-amonen elkarrizketek plaza beteko dute, Zubieta herri bizi-bizia izango da. Ez dugu uste gehiegi eskatzea denik. Gurasoek esaten digute txintxo portatu ezkero, Olentzerok ekarriko digula eskatutakoa. Ea egia den!
Zubietako kezkak
Gure auzoa, Zubieta, Gipuzkoan dago. Zubietako eremu batzuk Donostiari dagozkio eta beste batzuk Usurbilgoak dira. Horrela izanda, auzoari dagokion erronka bat jorratu behar dugunean bi udaletara jo behar dugu. Bi udalak, izatez, hain ezberdinak izanda normalean ez dira adostasunetara iristen eta eta gure erronka aurrera ateratzea oso zaila da.
Horretaz gain, Donostiako udalak Zubieta begiz jo du zenbait azpiegitura eraikitzeko: Erraustegia, Kartzela... Beste inork nahi ez dituenak guregana ekarri nahi dituzte.
Zein zaila den Zubietan bizitzea!
Eskolako arazoari dagokionez, gure auzoko Eskola Txikiak 30 urte baino gehiago ditu eta nahiz eta urte askotan ikasle gutxi izanagatik desagertzeko zorian egon, gaur egun ume dexente dauzkagu matrikulatuta (30 baino gehiago 2-7 urte bitartekoak).
Eskolako eraikuntza txikia geratu zaigu eta aurreko ikasturte bukaeran proiektu bat aurkeztu genuen Hezkuntza sailan. Egitasmoan 12 urte arteko luzapena eta eraikuntzaren handitzea eskatzen genuen. Proiektu honi Hezkuntza Sailak irailean eman zion erantzuna: Ez dago luzapenik, ez dute eraikuntza handituko, eta hurrengo ikasturtean ikasleak daukagun eraikuntzan sartuko ez direnez, Lehen Hezkuntzako lehen zikloa (5-7 urte) kenduko dute!!!
Gurasoak oso kezkatuta gaude, Eskolako etorkizuna beltza ikusten dugu, luzera begira eskola desagertu egingo dela somatzen dugu...
Ba Hernaniko Langile Ikastolan (www.langile.com) ere berdintsu gabiltza. Azken urteotan matrikula asko ugaritu da, baina Hezkuntza Sailak 75eko muga jarrio dio gure ikastolari. Ondorioz, hainbat eta hainbat guraso kanpoan geratuko lirateke. Ikastolak aurrera egiteko erabakia hartu zuen orain dela urte batzuk, gure eskola aukeratzen zuten guztiei ateak zabalduz. Talde horiek Haur Hezkuntzan egon diren bitartean ez da arazorik egon. Baina ba dira bi urte talde horiek Lehen Hezkuntzara iritsi direla eta hemen hasi dira benetazko arazoak. Lehen Hezkuntzako 1. eta 2. mailako 4 talde daude, baina Hezkuntza Sailak 3 bakarrik onartzen ditu. Hau dela eta, ez du bidaltzen ez irakaslerik, ez eta kopuru horiei dagokien beste eratako laguntzarik. Eta urtez urte gauzak okerrera doaz.
Hau gutxi balitz, orain herriko 3 DBHko zentroak (tartean gurea) eta institutua elkartu nahi ditu Hezkuntza Sailak, "makrozentro" batean. Gure eskolako guraso nahiz irakaslearen gehiengoa fusio horren aurka dago, ez baita egin kriterio pedagogikoak kontutan hartuz, helburua ekonomizista hutsa erabiliz baizik.
Inposaketa hauek salatzeko, hainbat mobilizazio burutzen ari gara bertako gurasook, nahi dugun eskola mota aukeratzeko eskubidea aldarrikatuz. Hauen barruan, bihar abenduaren 23an, eguerdiko 12:00etan elkarretaratze bat egingo dugu Hezkuntza Saileko ordezkaritzan gure desadostasuna adierazteko. INPOSAKETARIK EZ !!!
Halaber, ia 1.300 sinadura bildu ditugu herrian, eta Arartekora joko dugu.