Teknologia albisteak
6

Lana "libre" partekatzea dirulaguntzak jasotzeko baldintza izatea nahi du Ezker Batuak

Erabiltzailearen aurpegia
Sustatu
2009-10-05 : 15:10

Diru publikoaz egindako kultura- edo zientzia-lanei "copyleft lizentzia aplikatzea" eskatu du Ezker Batuak, "gizarte honetan kultura benetan guztion ondarea izan dadin". Horrela kultura-ekoizpena "askatasunez kopiatu, erreproduzitu eta banatu" ahal izango dela defendatu dute, "merkataritzako erabilerarako ez bada". Badirudi ez-merkataritzarako lizentzia aplikatu nahi dutela, baina hori ez da librea.

Mistoa-Ezker Batua taldeak Eusko Legebiltzarrean egindako eskaria tramitatzea onartu du Legebiltzarraren Mahaiak.

Eskaria Legebiltzarrean

Mikel Arana Etxezarreta Mistoa-Ezker Batua Berdeak taldeko bozeramaileordeak ondoko legez besteko proposamena aurkezten du, lehenbailehen osoko bilkuran eztabaidatua izan dadin, funts publikoekin egindako kultura- edo zientzia-lanei copyleft lizentziak aplikatzeari buruz.

Arrazoiak:

Diru publikoz lagundutako edozein lan artistiko, zientifiko, zinematografiko, musikal edo literario askatasunez banatzeko aukera eman behar da, copyright gabe, gizarte honetan kultura benetan guztion ondarea izan dadin, eta lanak ahal bezain zabalduak izan daitezen. Lan horien copyright lizentzia kendu behar da, behar bezala zabaltzeko oztopo bat izaten delako, eta bere ordez copyleft lizentzia jarri behar da. Horrela, kultura-ekoizpena askatasunez kopiatu ahal izango da (merkataritzako erabilerarako ez bada), baita erreproduzitu eta banatu ere. Copyleft lizentzia guztiz bateragarria da jabetza intelektualeko eskubideekin. Bestalde, copyleft lizentziak ez ditu egilearen ondareeskubideak kaltetzen. Egileak ordaina jaso behar du bere lanaren truke. Esaterako, 2008an gehien saldu zen diskoak copyleft lizentzia bat zeukan.

Legez besteko proposamena

  1. Eusko Legebiltzarrak Eusko Jaurlaritzari eskatzen dio copyleft lanetarako biltegi bat sor dezala interneten, erabiltzaileek hortik jaitsi ahal izan ditzaten. Doan edo kopuru bat ordainduta jaitsi ahal izango dira. Jaisteagatik ordaintzen den guztia egilearentzat izango da. Era berean, Eusko Legebiltzarrak Eusko Jaurlaritzari eskatzen dio loturak sor ditzala copyleft lizentzia duten lanak zabaltzen dituzten beste zenbait webgunerekin, funts publikoez lagundutako lanak gehiago zabaltzearren.
  2. Eusko Legebiltzarrak Eusko Jaurlaritzari eskatzen dio copyleft kontzeptua eta horren abantaila ekonomikoak ezagutzera eman ditzala ostalaritzako establezimenduen artean, baita girotzeko egile-eskubideen menpeko musika erabiltzen duen beste edozein negoziotan ere.
  3. Eusko Legebiltzarrak Eusko Jaurlaritzari eskatzen dio ahalik eta lan gehienak zabal ditzala, euskal egileenak (katalogoz kanpokoak) edo/eta euskal herritarrentzat interesgarriak izan daitezkeenak. Egileekin edo beren oinordekoekin negoziazioa egingo da, jatorrizko lizentziaren ordez copyleft lizentzia jartzeko, eta behin adostasuna lortuta, lanak guztiz digitalizatu eta biltegiratuko dira.

Erantzunak

Luistxo Fernandez
2009-10-05 : 15:48

Libre, ez libre, copyleft... Gai honekin askotan nahasten dira, eta nahasten gara. Ezker Batuaren ekimena komentatu izan den blog pare batean, erantzunetan, azaldu izan da kontua, nola merkataritzarako ez baimentzeak (Arana legebiltzarkidearen testuan agertzen den bezala), edukia copyleft eta libre izaera gabe uzten duen. Iruzkin zehatz batzuk Marko Txopitea Txopik utzi ditu hemengo erantzunetan.


Txopik berak ere azaldu izan du aurretik euskaraz. Eta post horretarako, grafiko majo hau ere sortu zuen:



Koloreek gakoek ere erakusten dute lizentzia eta kontzeptu horiekin nola jokatu:


  • Gorria: copyright eskubide pribatibo ohikoak.

  • Horia: Creative Commons lizentzia zenbait, murrizketa jakin batzuekin edukia libre izendatzea uzten ez dutenak. Txopik dioenez, hauek aurkituz gero semaforoan, stop, gorriarekin bezala.

  • Berdea: eduki libreak, erabilpen kultural librerako modukoak. eta horien barruan, zenbait ñabardura segun eta lizentzia edo definizio bat edo beste erabiltzen dugun, ez baita gauza bera jabetza publikoa edo cc-by-sa, azken hau benetako copyleft lizentzian berdin banatzeko probisio birala daukalako.

karlos
2009-10-05 : 17:37

ongi iruditzen zait ez komertzialarena, bestela nik egindako lana argitaletxe handi batek hartu eta dagoen moduan saldu dezake, promozio kanpaina handi bat egin eta banatzaile-sare on bat erabilita (nik ez daukadana). Jendeak doan erabiltzea nahi dut, baina ez enpresentzako doan lan egin.

Josu Mendicute
2009-10-06 : 11:06

Ba nik ongi ikusiko nukeen alderantziz, Karlos: denok ordaindutakoa, izan dadila denon onurarako. Eta bestela, ez dezagun denok ordaindu.

Pablol
2009-10-06 : 18:53

Oker ez banabil, Karlos, lizentzia ez-komertzialarekin zuk ere ezin dezakezu merkaturatu.



Norbaitekin zuzendu nazala oker baldin banago, mesedez.

Juanan
2009-10-06 : 21:36

Pablol: oker zaude. Zure produktua baldin bada, eta NonCommercial klausularekin banatzen baduzu, zuk saldu dezakezu baina besteok erabili bai, baina ezingo dugu zuzenean saldu (edo etekin komertzialik atera zure produktuari) zurekin $negoziatu$ gabe.



Ikus:

http://wiki.creativecommons.org/Frequently_Asked_Questions



"Secondly, the noncommercial license option is an inventive tool designed to allow people to maximize the distribution of their works while keeping control of the commercial aspects of their copyright. To make one thing clear that is sometimes misunderstood: the "noncommercial use" condition applies only to others who use your work, not to you (the licensor). So if you choose to license your work under a Creative Commons license that includes the “noncommercial use” option, you impose the ”noncommercial” condition on the users (licensees). However, you, the creator of the work and/or licensor, may at any time decide to use it commercially. People who want to copy or adapt your work, "primarily for monetary compensation or financial gain" must get your separate permission first. "

Pablol
2009-10-07 : 00:58

Eskerrik asko Juanan ^^

Erantzun

Twitter ikonoa  Facebook ikonoa  Sartu