Teknofiloen albistegia
5

Hezkuntza sailburuaren azalpenak LH5eko ikasleei emango zaizkien ordenagailuez

Erabiltzailearen aurpegia
Sustatu
2009-10-02 : 12:10

Mikel Basabe Aralarreko legebiltzarkideak galdera batzuk egin dizkio idatziz Isabel Celaá Hezkuntza Sailburuari, L.H.ko 5. mailako ikasleek jasoko dituzten ordenagailu eramangarrien hizkuntzaz eta ordenagailuon softwareaz. Hemen galdera-erantzunak.

Lehen Hezkuntzako 5. kurtsoko geletan banatuko diren ordenagailu eramangarri txikietan euskara aldez aurretik aukeratutako hizkuntza gisa izango al dute erabiltzaileek (ikasle eta irakasleek) interfazean eta nabigatzailean? Hornitzaileari hau adierazi al zaio?

Aldez aurretik aukeratutako hizkuntza euskara izango da B eta D ereduetako ikasleentzat eta gaztelania A eredukoentzat. Puntu hau ekipoek izan beharreko konfigurazioa adierazteko unean esango zaio erabiltzaileari, 1. loteko oinarri teknikoen pleguak 7. atalean adierazten denez.

Microsoft One Note programan euskara lokalizatuta ez dagoela eta 18500 lizentzia eskuratuko direla kontuan hartuta, Hezkuntza, Unibertsitate eta Ikerketa Sailak edo Eusko Jaurlaritzako beste sail batek akordioren bat lortu al dute Microsoft-ekin, software hori euskaraz aurkitu ahal izateko?

Hezkuntza Sailak ez du inolako negoziaziorik egin Microsoft enpresarekin, software hori euskaraz aurkitu ahal izateko. Hezkuntza Sailak ez ditu euskaraz aurkitu ezin diren softwareak kargatuko B eta D ereduetako ikasleentzako ekipoetan.

Softwarea euskaraz aurkitu ahal izatearen baldintzapean egongo al da Microsoft One Noteren lizentziak erostea? Edo, egokiagoa litzatekeena, emango al zaio software libreari lehentasuna eta garapen horiek lizentzia libreekin eta euskaraz egingo al dira?

Hezkuntza Sailak Office Standard eta Microsoft One Noteren lizentziak lizitatu ditu. Izan ere, Microsoft enpresak ateratako pakete batean dator lizentzia horiek, Windows XP Home OEM lizentziarekin batera, eskuratzea. Pakete hori 2.0. eskola deritzona da eta oso prezio ona du balizko lizitatzaileentzat. Lotean eskuratze horrek, prezioaren arrazoiengatik, ez du produktu horiek ekipoetan instalatu behar direnik esan nahi. Ekipo guztiek abiatzeko bi puntu dituzte disko gogorrean eta haietako batean Linuxetik datorren sistema operatibo libre bat joango da, euskarara itzulita egongo dena. Bi puntutan ezarriko dira euskaraz lokalizatu ahal diren programak, lizenzia libreekin batez ere. Une hauetan irizpide hauekin ebaluatzen ari da Lehen Hezkuntzako 5.eko ikasleei entregatu beharreko ordenagailuetan instalatu behar den softwarea.

Zergatik ez zaio software libreari lehentasunik eman eta zergatik ez dira garapen horiek lizentzia libreekin gauzatu?

Aurreko erantzunean esan den legez, ebaluatzen ari da hezkuntza-sistemarako software egokia. Une honetan Lehen Hezkuntzako 5. kurtsoan fokalizatuta dago eta software libreari ematen zaio lehentasuna. Gehigarri gisa, prestakuntza-programa bat egiten ari gara, lizentzia libreekin dituzten tresnetan prestakuntza sartzen duena, programak dakartzan gainontzeko prestakuntza-premiei gehitu beharrekoa.

Erantzunak

Sustatu
2009-10-02 : 12:49

Hezkuntza sailburuaren erantzunak lehiaketako plangintza pleguari erreferentzia egiten dion arren, plegu hartan, Hezkuntza Sailaren webgunean dagoen bezala, ez dago hemen adierazten diren gauza gehienen aipurik:


  • ez da esaten ereduen araberako konfigurazio bat egin behar denik

  • abiatze bikoitzaren aipurik ez dago.


Sailburuak dioenez, "Aurreko erantzunean esan den legez, ebaluatzen ari da hezkuntza-sistemarako software egokia. Une honetan Lehen Hezkuntzako 5. kurtsoan fokalizatuta dago eta software libreari ematen zaio lehentasuna." Software librearen aipurik ez dago pleguan: dokumentazio hori Sustatuk gai honi buruz abuztuan atera zuen lehen albistean dago itsatsita, hemen. Lehentasuna software librea izan dela esan arren, lehiaketaren funtsa ordenagailuak Microsoft lizentziekin hornitzea izan da.


xuriken
2009-10-02 : 13:52

Bideo honetan, Victor Bermejo IKTen programako arduradunak Eskola 2.0 egitasmoaren azalpenak ematen ditu irakasle talde baten aurrean. Niri zehaztapen falta handikoa iruditu zait Nire irudipena da nahiko galduak daudela, eta gauzak korrika eta presaka egiten ari direla, plangintza egokirik gabe. Epaitu zuek.


Sustatu
2009-10-02 : 14:24

Eskerrik asko bideoagatik, Xuriken. Hezkuntza Sailaren bideo hori Youtuben azaldu zen irailean, baina borratu egin zuten gero. Vimeo eta Euskaltuben kopiak agertu dira ordea. Ematen du norbait damutu egin zela informazio hori Youtuben zabaltzeaz.


Hezkuntza Sailak martxan jarri behar dituen ildo berriei buruzko beste jardunaldi baten informazioa ere zabaldu zen irailean, baina kasu hartan ere, kronika argitaratu zuen blogariari hura kentzeko eskatu zioten Jaurlaritzatik.


Sustatu
2009-10-02 : 14:35

Gai honekin zerikusia du bihar Bilbon antolatu den topaketa irekiak: Eskola Librea: software librea Eskola 2.0 proiektuan


Hika Ateneoan, 10.00etatik aurrera. Gai-ordeneko puntu batzuk:


  • Eskola 2.0: zer egin da orain arte? /

  • Eskola 2.0: proposamenak eta etorkizuneko ekintzak

  • Software Librea Euskal Administrazio Publikoan


Informazio gehiago wiki honetan.


Sustatu
2009-10-06 : 09:55

Mikel Basaberen galdera eta Zelaaren erantzuna jasotzen duen Legebiltzarreko PDF dokumentuan akats bitxi bat dago, Mikel Basabe talde popularreko legebiltzarkide izendatzen du agiriak. Egiazki, Aralarko legebiltzarkidea da.


Erantzun

Twitter ikonoa  Facebook ikonoa  Sartu