LH5eko ikasleek EAEn jasoko dituzten miniordenagailuak Windows-pekoak izango dira derrigor
Espainiako Gobernuak agindu zuen, Lehen Hezkuntzako 5. mailako ikasleek doako mini-ordenagailua izango zutela ikasgelan datorren ikasturtean. Zein sistemarekin? erkidego bakoitzak erabakiko zuen hori. EAEn erabaki dute: Hezkuntza sailak lizitazioa atera du lehiaketara. 20.000 ordenagailu eskatu dituzte, eta derrigor Microsoft Windows XP lizentziak izan beharko dituzte.
Ordenagailuak erosteko deialdi publikoa abuztuan egin du publiko Eusko Jaurlaritzako Hezkuntza Sailak. Irailaren 9an amaitzen da epea. Iragarpen hori euskaraz dago, baina baldintzen zehaztapena, gaztelaniaz bakarrik.
Deialdi publikoa eta teorikoki irekia, baina baldintza teknikoak zehazteko orduan, 20.000 ordenagailuek derrigor izan beharko duten softwarea zehazten da.
- 20.000 makinek Microsoft-en Windows XP profesionala izan beharko dute sistema eragile gisa.
- Makina horien artean, 18.500ek (1.500 makina salbuetsita geratzen dira), Microsoft Office Standard ofimatika paketearen eta Microsoft One Note programaren lizentziekin etorri beharko dira.
Gehiago ere zehazten du deialdiak:
La adquisición de las licencias de software de Microsoft se realizará a cargo del adjudicatario con las condiciones y precios que están establecidos para este proyecto entre Microsoft y el Departamento.
Alegia, dagoeneko adostuta dago enpresa pribatu batekin lotean derrigor sartu beharreko elementu batzuen prezioa. Deialdia gainbegiratuta ez dugu aurkitu prezio horren berri, ezta ere hornikuntza horretarako prezioa zein lehiaketa edo prozeduraren bidez erabaki den.
LH5erako ordenagailuen promesa
Lehen Hezkuntzako 5. mailako ikasleek doan ordenagailu bat jasoko zutela Jose Luis Rodriguez Zapaterok agindu zuen, udaberrian Espainiako parlamentuan egindako Estatuaren egoeraren gaineko eztabaidan.
Susmoak izan ziren hasieratik, ez ote zuen ekimenak Microsoftentzako sekulako pagotxa ekarriko, ea ez ote ziren derrigor Microsoft-en lizentziekin etorriko ordenagailu horiek. Hispalinux elkarteak komunikatu bat kaleratu zuen kezka horiek azalduz. Dokumentu horretan lizentzien gastuen kalkulu batzuk egin zituen Hispalinuxek:
- Windows sistema eragilea, hezkuntzarako prezio merketuetan, 60 euro inguru. EAErako 20.000 ordenagailuetan, 1.2 milioi euro lirateke.
- Office paketea, hezkuntzarako prezio merketuan, 52 euro. EAErako, 18.500 makinatan, 960.000 euro lirateke.
- Microsoft One Note programaren lizentzien kostuez ez dakigu.
Zenbait informazioren arabera, ordenagailuetan ezarri beharreko software motaren aukera erkidego autonomo bakoitzaren esku egon da. Hortaz, Eusko Jaurlaritzak aukeratu omen du Microsoft-en softwarea erabiltzea.
Deialdiko dokumentazioa
Guztira, ia 9.8 milioi euroko lizitazioa da, baina hor lizentziak eta makinak sartzen dira, eta ordenagailu hauen horniketaz gain, beste hiru lote ere badaude. Horietako batean, arbel digital interaktiboak erosteko lehiaketa dago. 539 arbel erosi behar dira, baina kasu honetan derrigorrezko software hornikuntzarik ez da aipatzen.
Deialdi nagusiari dagokionez, hemen gorde dugu PDF dokumentua, eta behean itsatsita daukazue. Dokumentuaren behekaldean, ikastetxe publiko bakoitzean zenbat ordenagailu izango diren zehazten da banan-banan.
Erantzunak
Egia esan lotsagarria da. Berez zentzurik aurkitzen ez diodana ikasleei besterik gabe netbook bana ematea da. Zein da helburua? Zertarako? Ze eduki lantzeko? Noren ardurapean? Pedagogikoki ze justifikazio dauka? Eta ikasleak etxean internet konexiorik ez badu, zertarako behar du?
Propaganda politikoa besterik ez zait iruditzen, horrekin gizartea teknologia berrietan puntan dagoela sinestarazi nahi baligute bezala.
Sistema eragilearena, no comment. Eusko Jaurlaritzak urte luzeetan eraman duen politikaren jarraipena besterik ez da. Eta orain, zer ote dio idoia Mendiak?
Propaganda hutsa, lehen esan dudana.
Hauteskunde garaian software librea nahi dugu ekimenari erantzunez, Patxi Lopez Lehendakariak hainbat gauza interesgarri esan zituen, hona hemen haietako batzuk:
- PSE-EE (PSOE) alderdian, dudarik gabe, Administrazioa Publikoa neutral mantendu ezin daitekeela eta software librearen alde gogotsu lan egin behar duela uzte dugu
- Gure apustua kode irekiko softwarearen aldekoa izango da dudarik gabe.
- Joan den legislaturan, esaterako, Eusko Legebiltzarreko Mahaian hasi behar den honetan parlamentari bakoitzari software librea duen ordenagailu eramangarri bana emateko proposamena aurkeztu genuen
- Aurreko legislaturan, nire Parlamentari Taldeak zentzu horretan ekimen bat bultzatu zuen, gazteak kode irekiko programen erabileran trebatzea, heldu direnean askatasunean aukeratzeko gaitasuna izan dezaten. Hezkuntzan erabiltzen den software guztia kode irekikoa izatearekin zeharo ados gaude, eta batez ere informatika geletan ikasleei tresna hauek erabiltzen irakastearekin. Aurkeztutako jarrera defendatzera eramaten gaituzten arrazoiak ez dira soilik ekonomikoak, nahiz eta baduen garrantzia, baizik eta helduak direnean aukeratzeko gaitasuna indartua duten herritarrak heztea ahalbidetzen dutenak.
- Estandar irekiekin konpromisoa hartua dugu. Gure gobernaketan, kontratazioek estandar irekiak errespetatu beharko dituzte, Jaurlaritzako orrialdeek erabiltzailearen softwarearen araberako diskriminaziorik egin ez dezaten. Halaber, nolabaiteko ezintasunak dituzten pertsonentzat azken legislaturan, ONCE fundazioaren eskutik eta Espainiako azken postuetan kokatuz, zartada galanta jaso duten e-administrazioen orrialdeen erabilera hobetuko dugu.
- Ez dut manifesturik sinatu, baina Parlamentari Taldeko eta hautagai den kide batek, Idoia Mendiak, izenpetu duelako ustea dut. Bertan agertzen diren bost puntuetan aipatzen denarekin zeharo ados nago, eta ez nuke sinatu eta laguntzeko arazorik izango
Euskal Hezkuntzarako erosketa berria Lakuan: 20.000 netbook, harritzekoa, orain ere software librerik gabe... Krisirik latzenaren garaian, Idoia Mendia eta Patxi Lopez lehendakari berberaren adierazpen politiko guztiak gezurtatuz.
Garai bateko peztatan, 1.500 milioitik gora (BEZ kanpo) gastauko Hezkuntza sailak miniportatilak erosten, XP Mikrotxof sistemapean. Gero lizentziak berritzeko auskalo zenbat xahutuko den... teknologi garapenean, sormenean, malgutasunean, norberaren beharrizanak asetzerakoan zenbat galduko den. Non arraio dago Software Librearen aldeko apustua? (Atzekoz) aurrera doan Herria? Estremadurak bai ta guk ez, noiz arte?
Windows + MSOffice lizentziak: 2 milioi eurotik gora
Ubuntu + OpenOffice: 0 euro
Negargarria benetan. Argi eta garbi esatearren, guztion sakeletatik ateratako bi milioi euro alferrik gastatzeko modurik penagarriena da hori.
Bestalde, deialdian ez dut ezer irakurri euskarazko LIP bikainei buruz (Windows eta Office euskaraz erabiltzeko paketeak dira LIPak). Baten batek esango dit: tira, hori behintzat dohainik da, eta nahi duenak deskargatu eta instala ditzala. Nire ustez, ordea, aldez aurretik instalaturik eman beharko lituzkete.
Patxi Lopezek software librearen alde hitz egin zuen kanpainan, eta gero ere bai, horretan jardungo balu bezala, software librearen aldeko lanean lehendakari denetik. Euskal Encounterrean bota zuen hau: "Vamos a hacer una apuesta decidida por el software libre, por las licencias libres como el OpenData y el copyleft allí donde sea posible."
Eta Gobernuko bozeramaileak, Idoia Mendiak ere askotan aldarrikatu izan du software librearen bandera , eta bera izan da aurreko gobernuei kaña eman diena gai hauetan.
Benetan, lotsagarria.
Norbaitek esango du normala dela, jakina zela hau horrela egingo zutela, baina nik banuen esperantza txiki bat PSEko goi mailako politikoek esan zutena irakurri ondoren.
Idioa Mendiak zioenez, Lo Prometido es deuda (txiste eskasa dirudi), eta Patxi López Lehendakariak orain dela bi aste Euskal Encounter-ean mezu berbera zeraman. Oso interesgarriak dira hauteskunde garaian Lehendakariak hartu zituen konpromisoak .
Eta honen aurrean zer ? ixilik geratu behar gara ? egia esan abuztua ez da garai onena protesta ekimenak bultzatzeko, baina amorrua ematen du adarra nola jotzen diguten ikusteak.
Gauzak diren bezalakoak dira, inertziak agintzen du.
Horixe pentsatu nuen duela egun batzuk Gipuzkoa.net ataria berritzeko lehiaketarena irten zenean, hura ere derrigor software lizentzia jakin batzuei lotuta.
Orain arteko azpiegitura sistema horietan oinarrituko zen, eta preso gaude gipuzkoarrok IBMren lizentziak ordaintzera per secula.
Amorrua eman zidan bereziki ze Gipuzkoa 2.0 ekimenaren aurkezpenaren egun berean irten zen deialdi hura. Eta aurkezpen hartan nik entzun nion Markel Olano diputatu nagusiari, eta sinetsi nion, bere borondate irekian nik ez dut zalantzarik, baina lehiaketa hura Foru Aldundiko Presidentzia sailak sinatu arren, IZFEk idatzi zuen goitik behera. IZFE hornitzaile jakin batzuetatik aterako duenik...
Eta IZFE esaten duenak Gipuzkoan esaten du EJIE Eusko Jaurlaritzari dagokionez. Erraza zaie hornitzaile horiekin eta lizentzia horiekin jarraitzea; ez da enpresa publiko hauentzat aurrekontu arazoa izango, herritarron zergak baitira zerbitzu hori ordainduko dutenak.
Argazkiak.org | IZFE eta Gipuzkoako Batzar Nagusien egoitzak © cc-by-sa: sustatu
Hor dago IZFE, Miramongo parke teknologikoan, Batzar Nagusien egoitza berriaren ondoan. Nork erabakitzen du gipuzkoarren izenean?
EJIE ere ez dago Eusko Legebiltzarretik eta Lakuatik urruti.
Politikarien kontraesanak? Guztiok dauzkagun kontraesanak:
Porque he dicho una y mil veces...
Ikastoletakoei ere Windows erosarazi beharko liekete! Hezkuntza publikoa bazterturik uzteko beste plan bat?
Hezkuntza saila ez da bakarra. EAEko administrazio publiko osoa dabil Wintxof pean. Hau guzti hau, hori gogorarazteko balio beharko
Berriak gai honen inguruko albistea dakar gaur. Artikuluaren arabera, proiektu hau erdibana ordaintzea erabaki zuten maiatzean Eusko Jaurlaritzak eta Espainiako Hezkuntza ministerioak, Isabel Zelaa Hezkuntza sailburuak eta Angel Gabilondo ministroak egindako bilera batean. Mini-ordenagailuez gain, lehiaketan irtendako beste horniketa batzuk ere orduan adostu ziren: wi-fi ekipamenduak eta arbel elektronikoak.
Mutu geratu naiz. Negarrez hasteko nago, guarkorako berri txarragorik ezin zen egon.