Teknologia albisteak
Blogariak txarto uzten dituen thrillerra
Sustatu
2009-04-20 : 17:04
State of Play filmaren kritika egin dute bi blogari euskaldunek, filmaren gaiaren harietako batetik tiraka: blogak toki txarrean uzten dituela, hedabide tradizionalen aldean.
Gaztelaniazko trailerra da hori (La sombra del poder). Orijinala ingelesez hemen dago, baina ez du itsasteko koderik eskaintzen.
Zera dio Joxe Aranzabalek filmaren gainean:
Filmak indartu egiten du aurreiritzia, hortik zehar dabilena, zeinaren arabera, blogariek arinkeriak idazten baitituzte. Aitzitik, paperean dabiltzanak, profesionalismoaren eta sakontasunaren paradigma dira. Une batean, gainera, blogariak berak aitortu egiten du esku artean duten informazioa inportanteegia dela, eta hobe paperean ateratzea. Enpin.
Amatiñok, berriz, galdera batzuen bidez laburbiltzen du nola marrazten dituen blogak film honek:
Blogak balio al du lehen lehen mailako albisterik emateko? Paperezko egunkariak digitalak baino serioagoak al dira? Zilegi al da blogez aditzera ematea egunkari-zutabez ontzat emango ez litzatekeena? Internetek errotatibaren erantzukizuna eta sinesgarritasuna hankaz gora botako al ditu?
State of Play Kevin Macdonald zuzendariaren thrillerra da. Protagonistak dira Russell Crowe, Rachel McAdams eta Helen Mirren.
State of Play filma BBC-k egina eta izen berea duen telebistarako mini-serie batean oinarrituta dago.
Aurten kaleratu den filma tele-serie horren adaptazioa da.
Telebista serie hori (ordu beteko sei tele-saio) 2003koa da (2002-2003).
Frantzian serie hori bi urte beranduago, 2005ean "Jeux de pouvoir" izenarekin eman zen telebistan. Eta izen berdinarekin - Jeux de pouvoir - , kaleratuko da udan Frantzian.
Argi dago 2003an blogek ez zutela gaur eguneko presentzia eta indarra, eta hortik ere uler daiteke. Kontutan izan Sustatu bera garai horietan, 2001-2002 urtean, kaleratu zela.
Bestalde, norbaitek esan duen bezala kazetaritza tradizionalari egindako omenaldizko filma da, eta ez hainbeste berriaren goraipamena, nahiz eta filmean biak kontutan izan.