Teknofiloen albistegia
3

Googleren bi produkturen ezarpena erosi dute Jaurlaritzak eta EITBk

Erabiltzailearen aurpegia
Sustatu
2009-04-03 : 16:04

EITBk, Googlek eta Eusko Jaurlaritzak gaur iragarri dutenez, euskal erakundeek Googleri zenbait produkturen ezarpena erosi diote. Google euskaraz izenburuarekin iragarritako ekitaldian, bi produktu ezarpenen berri eman dute. EITBk banatutako ohar batek dioenez, "Googlen euskarazko tresna eta zerbitzu berriak gehitzeko plangintzan, Expressive SL euskal enpresak, multinazional amerikarrarekin batera, ezartze eta aholkularitza lanak egingo ditu."

Batetik, Google Search Appliance delakoaren hardwarea ezarriko da, Jaurlaritzak eta EITBk beren webguneen edukia (eta beste erakunde batzuena) indexatzeko eta Euskarazko Bilatzaile Orokorra deituko duten zerbaitekin bilatu ahal izateko. Hemen beheko gailu hau bezalako zerbitzari multzo batek osatzen duen hardware multzoa da hori.

Bestalde, Google Apps aukeraren Enterprise kategoriako ezarpen bat egingo zaio Eusko Jaurlaritzari. Horrekin, Euskadi.net, eitb.com edo euskal erakunde publikoen beste domeinu batzuekin, sarbidea izango dute administrazioko langileek eta herritarrek Googlek eskaintzen dituen bere ofimatika produktuetara: Gmail, Google Docs eta Calendar direlakoak. Alegia, Gmail-eko e-posta, Gmail-eko kontu batekin izan beharrean, Euskadi.net edo Euskadimail.com moduko kontu batekin (Euskadimail izena aurkezpeneko diapositiba batean ikusi dugu).

Euskara produktu hauetan

Produktu hauetan euskarak izango duen garrantzia azpimarratu dute gaurko aurkezpenean, baina berez gaur ez dute nobedaderik aurkeztu. Carlos Gracia Google-koak esan du Jaurlaritzak Googleko bilaketak euskarara egokitzeko txosten bat prestatu diela, eta hori aplikatzen hasi direla jada, urratsez urrats. Euskarazko edukien bilaketa espezifikoa barik, zaila izango da Google Search Appliance horretan oinarrituriko Euskarazko Bilatzaile Orokorrean euskarazko eta erdarazko edukien bereizketa egitea, Euskadi.net bezalako webgune batean eduki eleanitza baitago.

Google Apps delakoaren euskal bertsioan, berriz, euskarazko e-posta ikusiko bada, aldez aurretik Gmail euskaratzen badute izango da. Lan hori boluntarioek egina omen dago aspaldi, baina orain arte ez da agerian publiko egin behintzat. Hurrengo asteetan egingo da publiko Gmail euskarazkoa. Eusko Jaurlaritzak bideratua du jada Metaposta izeneko proiektu baten garapena, herritar guztiek e-posta kontuak izan ditzaten. Bizkaiko Foru Aldundiak, bestalde, Microsoft-ekin akordioa dauka, postontzi elektronikoa (eta beste zerbitzu batzuk) enpresa horren teknologiarekin garatzeko. Orain beste kontratu bat, nonbait, Googlerekin antzeko zerbitzu bat lortzeko.

EITBk ekitaldian publiko egin duen ohar batean dioenez, EITBk lan egingo du "euskarazko edukiak zein zerbitzuak multinazional amerikarraren zenbait produktutan (Youtube, Books, Maps, Earth edo Blogger) ezartzearen alde". Gaur egunean, Google Maps jada euskaratua dago.

Googlek enpresa mailako zerbitzu hauek eskaintzen dituenean, izaten da bere oinarrizko teknologian dauden aukerak aplikatzen dituela bezero baten mesedetan. Hortaz, produktu hauetarako euskarazko gaitasunak garatzen badira, pentsatzekoa da Google orokor eta doakoan ikusiko ditugula gaitasunik horiek (euskaraz bilaketa egiteko aukera, Gmail eta Docs euskaraz...).

Gaurko ekitaldian hitz egin dutenak izan dira Patxi Baztarrika Eusko Jaurlaritzako Hizkuntza Politikarako sailburuordea, Juan Diego EITBko Estrategia eta Interneteko zuzendaria eta Carlos Gracia Google Enterprise Iberiako zuzendari nagusia eta Miguel de Reina Expressiveko zuzendari komertziala eta Googleko zuzendari komertzial ohia izango dira. Miren Azkaratek ez du izan etortzerik (iragarria zegoen gonbidapenean), Eusko Legebiltzarraren osaketan egon baita.

Erantzunak

jolaus
2009-04-07 : 20:06

Oraintxe bertan entzun dut Patxi Gaztelumendik gai honen inguruan Info7 irratian esandakoa eta jarraitzen dut tutik ere ulertu gabe.


Norbaitek esplikatu luke, modu argi eta errazean, zertan datzan akordio hau? Zer da, aurretik zintzilik, onartzeke, egiteke... zegoena eta akordio honen bitartez gauzatuko dena?


Eskerrik asko! ;)


iPtx | info 7 irratia
2009-04-08 : 20:27

Iepa Jolaus!


zer da ulertzen ez duzuna? Patxik Info7 irratian botatakoa, ala akordioa bera?


Uste dut, ahalik eta argien mintzatu nintzela, nahiz eta aitortu behar dudan, Bilboko erreka alboko hotel bateko kafetegian nengoela kronika egiterakoan.


Info7 irratia, Interneteko irratia da batipat, eta ez dauka patxadazko estudiorik han hemenka.


Informazio gehiago gura baduzu, oraindik gehiago nahasteko, klik egin irratia.com azken saioan. google euskaraz? galdetu eta komentatu dugu.


jolaus
2009-04-09 : 14:03

Aupa Patxi


Irratia.com-eko saioa entzun dut eta bertan ipini dituzuen estekak ere bisitatu ditut.


1) Appliance-ena garbi dago. Suposatu nahi dut honek, erabiltzaile bezala, izango duela onurarik Internetean zehar euskaraz nabigatzerakoan. Ondo da.


2) Euskadimail.com edo GApps-en inguruko hori ere, zertan datzan ulertzen dut. Gure ikastolan erabiltzen dugun modura, herritar bakoitzari posta kontu bat emateko aukera hori egokia iruditzen zait. Dena den, horretarako ez da akordio berezirik behar ala? Edonork erabil dezake GApps zerbitzu hori horrela nahi badu. Gainera, goran adierazten den bezala, ez dakit nola uztartzen den hau Metapostarekin. Baina, tira, zeintzuk diren asmoak ulertu ditut.


3) Baina Google-en aplikazioak euskaraz erabiltzeko aukeraren inguruan, jarraitzen dut piperrik ulertu gabe. Edo azalpenak eman dituenak ez du ulertzen zertaz ari den edo, honen inguruan kea besterik ez digute saldu.


EITB.com-en zera irakurri daiteke: "Datozen bi urteetan, besteak beste, gmail posta elektronikoko tresna euskaratuko dute" Nola euskaratuko dutela? Hiru urte baino gehiago darama GMail euskaratuta eta! Eta Gmail bezala beste hainbat tresnekin ere antzeko zerbait gertatu da. Beraz, ez da zuzena EITBk dioena.


Goiko esaldiaren aurretik zera irakur daiteke: "Gainera, multinazionalak eskaintzen dituen hainbat zerbitzuk, tartean gmail, euskarazko bertsioa izango dute. Geroago etorriko dira egutegia, argazkiak eta aplikazio ofimatikoak." GMail aspalditik euskaratuta egonda ere, erabiltzaileok ez dugu aukerarik izan posta zerbitzua euskaraz erabiltzeko. EITBek dioena horrela bada, akordio honekin zer lortu da Google-ek gure hizkuntzari, aurretik ez zuen ofizialtasuna ematea? Alegia, GMail-ek eskaintzen dituen 52 hizkuntzekin batera gurea agertzea? Eta hori bera gertatzea Google-eko beste zerbitzu guztiekin?


Hementxe daukat ataskoa. Nola ulertu behar dugu azken zati hau?


PS: aurrekoan Mikel eta biok eztabaida luzea izan genuen gai honekin. Zeintzuk dira Google-ek ematen dituen arrazoiak euskara GMail-en erabiltzeko aukerarik ez emateko? Arrazoi ekonomikoak dira? Politikoak? Argibiderik bai honen inguruan?


Erantzun

Twitter ikonoa  Facebook ikonoa  Sartu