146 urteren buruan, Seattle P-I egunkaria ez da gehiago paperean kaleratuko
Gaur argitaratuko du paperezko azken alea Seattle Post-Intelligencer egunkariak, AEBetako egunkari historiko handienetako batek. 146 urteko historiaren ondoren, itxi egin dute Seattle P-I (honela ezagutzen da batik bat), eta Interneteko albistegi soil gisa jarraituko du, informazio lokalean eta iritzian oinarrituta. Erredakzioan, 165 lagunetik, 20 laguneko lantaldera igaroko dira.
Hona albistea SeattlePI.com webgunean bertan. Argitaratzailea (nagusia) ageri da bideoan erredakzioari albistea ematen. Erabakia Hearst etxearena izan da, garai bateko AEBetako egunkari talde handiena zenarena, hura baita Seattle P-I-ren jabea. Albistea ez da sorpresa, AEBetako egunkari askoren krisia ezaguna da, eta Seattleko honen kasuan, duela bi hilabete jarri zuten publikoki salgai, esanez ez bazuten eroslerik aurkitzen sarera igaroko zela papera atzean utzita.
Eta halaxe gertatu da. 165 laguneko erredakziotik, 20ko erredakzio batera igaroko dira. Gaur egungo webgunea ere eraldatu egingo da, papereko orotariko albisteen bertsiotik, albiste eta iritzi lokalean zentratzera igaroko dira, eta blogak izango dira horren oinarri nagusietako bat, PaidContent webguneak dioenez. Publizitatea lortzeko ahalegin eraberrituak ere egingo omen dituzte webguneari begira. Nielsen estatistika zerbitzuaren arabera, 1.8 milioi bisitari bakar ditu SeattlePI.com webguneak hilean. PaidContent-ek beste barne-estatistika bat aipatzen du, 4 milioi bisitari bakar.
Seattle P-I-k 117.000 ale saldu izan ditu paperean, azken auditoria publikoen arabera. Hala ere, iaz 15 milioi dolarreko galera izan zuen.
Egunkariaren urtarrileko ale bat © cc-by-sa: Jason Taellious, Dreamsjung
Seattle-n beste egunkari handi bakarra geratuko da orain: The Seattle Times. P-I baino kontserbadoreago izateko ospea du, eta zirkulazio handiagoa. 198.000 ale egunean. Gaur egungo P-I-ko harpidedunei Times iristen hasiko zaie etxera, kontrako agindurik ez badute ematen. Hala ere, lehia desagertzen zaion arren, Seattle Times ere superbibentzia arazoetan dago bere webgunean bertan irakur daitekeen albiste honen arabera.
Albistea AEBetako beste egunkari handi batzuen webguneetan:
Erantzunak
Honi gehitu gaur irakurri duguna: NYT inprimatzeak, harpidedun bakoitzari Kindle bat doan bidaltzea baino bi aldiz garestiagoa da (via Alt104, via Microsiervos)
artikulu horretan hori iradokitzen ez dutela esan arren, oso serio pentsatzekoa da kindlearen kontua, ezta ?
hedapena murriztuko litzateke eta berarekin publizitate sarrerak, kindle formatura pasaz gero. dena den, publizitate hori eraginkorra izango litzateke harpidedunen artean eta, kindlea berez duketen noizbehinkako erosleen artean ere.
bestalde, kindlean egunkaria irakurtzeak papera, garraioa etabar aurreztuko lituzke, ekologikoki eramangarriagoa izan liteke eta banaketa erabat azkartuko luke.
kindlea hedatzen eta merketzen bada.. zergatik ez ?
Beste egunkari bat itxi da duela aste gutxi Denverren, Rocky Mountain News, 150 urte betetzeko gutxi falta zitzaiola. Coloradoko egunkari zaharrena zen. Hango erredakzioko lantalde batek sarera egin duela salto: In Denver Times
proiektua aurkeztu dute. 50.000 harpidedun behar dituzte, hilean 5 dolar ordaintzeko prest, egunkari digital berria egiteko: doan oro har, baina premium sekzio batekin harpidedun horientzat.
Albiste hau ilustratzeko Flickr-eko irudi libre bat erabili dugu hor gorago, Seattle P-I saltzeko balio zuen kaleko txanpon-ontzi horrena. Oso produktu amerikarra, pertsonarik gabeko kiosko gisa funtzionatzen dute ontzi horiek, eta egunkari bakoitzak bere kolore eta adierazgarriak dituztenak izaten dituzte.
Orain Seattle P-I-ren ontziak birziklatu edo bota beharko dituzte. Agian irudi honetan ikusten den tokira.
Boston Globe egunkariaren Boston.com webguneak argitaratzen dituen Big Picture irudi bilduma ikusgarrien artean, krisiari eskaini diote bat eta hantxe aurkitu dugu.
Are egunkari zaharragoa itxiko da Michigan estatuan uztailean: The Ann Arbor News 176 urtez argitaratu izan da, baina gaur jakinarazi du haren jabeak (Booth Newspapers egunkari sarea) uztailetik haruntzago ez dela argitaratuko.
Gorago aipaturiko beste kasu batzuetan bezala webgune batek ordezkatuko du papera: AnnArbor.com ekimen berriak. Itxiera eta eraldaketari buruzko detaileak webgune horretan daude une hauetan.
Ia 50.000 aleko eguneroko zirkulazioa du gaur egunean The Ann Arbor News-ek.
Martxoaren 12an, The New York Times egunkariak infografiko argigarri bat argitaratu zuen Albiste txarrak egunkarientzat izenburuarekin, eta bertan oso garbi ikusten da zein egoera kaskarrean dauden egunkari asko AEBetan. Seattle P-I ere hor agertzen da, itota.