Teknologia albisteak
1

Hauteskunde kalkulagailua D3Mren botoak zenbatzeko prest

Erabiltzailearen aurpegia
Sustatu
2009-02-25 : 19:02

Prest dugu jada Sustatuko hauteskunde kalkulagailu bikoitza, Demokrazia 3 Milioi plataformaren izenean emandako bozak zenbatzeko gauza dena. Kalkulagailu honetan datuak behin sartu, eta emaitza bikoitzak erakusten ditu. Zerrenda debekatuen aldeko bozak kontuan hartuta, edo hartu gabe. D'Hondt legearen kalkuluak bi aldiz egiten dira, eta eserleku banaketa modu batean edo bestean egiten da.

2003ko udal eta foru hauteskundeetara begira prestatu zuen Sustatuk lehen hauteskunde kalkulagailu egokitua. Batasunaren legez kanporatzearen ondoren, Autodeterminazioaren Biltzarrak (AuB) eta beste zenbait herri plataforma aurkeztu ziren orduan, baina alderdien legeak denerako balio duenez, debekatu egin zituzten.

Orduko kalkulagailu hura beste hauteskunde batzuetarako ere moldatu izan dugu Sustuan. Eta, orain, martxoaren 1eko Eusko Legebiltzarrerako hauteskundeen txanda da.

Simulazioa 2005eko datuekin

Nola dabilen probatzeko, test bihurri bat egin dugu. 2005eko Eusko Legebiltzarrerako hauteskundeetako emaitzak pasatu ditugu kalkulagailutik. Orduan EHAK aukera legala izan zen, baina debekatu izan balute eta haren botoak baliogabetzat jo izan balituzte?

Hauxe zatekeen hauteskunde ukroniko horren osaketa:

 Alderdia | Emaitzak | EHAK baliogabetu balute
 EAJ-EA   | 29       | 34
 PSE-EE   | 18       | 20
 PP       | 15       | 17
 EB       | 3        | 3
 Aralar   | 1        | 1
 EHAK     | 9        | 0

Bi gazta ere egin ditugu

Google Chart

Gehiengo osoa, 38 eserleku.

Google Chart

Horra, hiru probintzietan irtengo liratekeenak, kalkulagailuaren bidez ateratako pantaila irudietan. Datuak Euskadi.net-etik atera ditugu.

Aurtengo kalkulagailura moldatzeko, EHAK-aren orduko bozak D3M epigrafearekin kalkulatu ditugu.

Horra, Bizkaiko emaitza simulazioa:


Argazkiak.org | Hauteskunde kalkulagailuaren simulazioa, Bizkaia © cc-by-sa: sustatu

EAJ-EA koalizioa izan zen orduan. Oraingo simulazio honetarako, EAJ epigrafea erabili dugu.

Azpian, Gipuzkoako simulazioa.


Argazkiak.org | Hauteskunde kalkulagailuaren simulazioa, Gipuzkoa © cc-by-sa: sustatu

Azkenik, Arabako simulazioa. Unidad Alavesaren botoak ageri dira Besterik epigrafean.


Argazkiak.org | Hauteskunde kalkulagailua, Araba © cc-by-sa: sustatu

Erantzunak

Joseba
2009-02-26 : 00:39

Zorionak.



Lezio bat da jende askorentzako, eta jarrera duina eta osoa erakusten du.

Erantzun

Twitter ikonoa  Facebook ikonoa  Sartu