Umeak erregistro zibilean euskeraz inskribatzeko
Bizkaiko Batzar Nagusietako Ezker Abertzaleko Taldeak aurkeztuta, atzo Kultura eta Euskera batzordean umeak erregistro zibilean euskeraz inskribatzeko proposamena eztabaidatu eta onartu egin zen.
Zoritxarrez, euskaldunon hizkuntz eskubideak eremu honetan urratuak dira ere. Kontutan izan behar dugu, 2005ko ekainaren 22ko 12/2005 Legeak 1957ko ekainaren 8ko Erregistro Zibileko Legearen 23.artikulua moldatu zuela, eta pasarte berri bat txertatu zuen. Aldaketa hau tarteko, legez posible da jaiotza inskripzioak erregistroa dagoen lekuko hizkuntza ofizialean egitea. Horren adibide, erregistro liburu ofizialak dagoeneko badaudela katalanez eta galegoz.
Hala ere, inskripzioak euskeraz egiteko eskubidea aitortu arren, eskubide hori gauzatzeko estatuko administraziaoek eta EAEko administrazioek ez dute inolako mekanismorik jarri hori posible izan dadin. Are gehiago, onartezinak diren argudioak erabili dituzte: legea garatu gabe dagoela, Euskeraren Legea aldatu behar dela eta egokitzeko denbora behar dela. Ez al dira nahikoak 3 urte legea egokitzeko,benetan borondatea baldin badago?
Bitartean, ume eta guraso euskaldunen eskubideak urratu egiten dira.
Hona hemen onartutako proposamena;
Bizkaiko Batzar Nagusiek gai honetan eskumena duen erakundeari eskatu egiten diote beharrezkoak diren baliabideak jar ditzala 2009. urtetik aurrera jaiotzen diren umeak Erregistro Zibilean euskeraz inskribatuak izan daitezen .
Erantzunak
(Hernaniko bake epaitegian inork ez daki euskaraz).
Gure haurra laster jaioko da (aste honetan, hurrengoan...). Hernaniko bake epaitegian eskatu genuen euskaraz erregistratzea, eta Donostiako epaile batek ezezkoa erantzun zuen, programa informatiko bat jarri arte ezinezkoa zela, Bergarako epaileak emandako autoa baliogabetu zutela eta abar.
Badirudi gure haurra inforeg baino lehenago iritsiko dela. Tristea da.
Oraindik Microsoft-i edo dena delakoari eskerrak eman beharko dizkiogula dirudi.Kasualitatez ez balira erregistroa informatizatzen ari (denbora luzez dirudienez)ez genuke eskubide hori izango. Bai tristea...
Ez al da benetako arazoa, Bilbon adibidez, erregistro zibilean inork ez duela euskaraz egiten eta euskararen aurkako jarrera dutela?Ez dutela inondik inora ere euskaldundu nahi, ez beraiek ez zerbitzua ere? Eta justizia sailak hori galerazteko ezer gutxi egin duela?
Justizia euskalduntzea aplikatibo informatiko bat jartzea baino gehiago da.
Guk gure haurrari itxaroteko esan genion, hori esaten baiziguten administrazioetatik. Eskubidea geneukala bai, baina itxaroteko 15 hilabete edo amaren sabelean....Baina haurra tematu ta uztailean jaio zen. Ezin abendurarte itxaron :-)Ta noski, ezin izan genuen euskaraz erregistratu. Hilabete mordoska lehenagotik eskatu arren. Gainera, Bilboko erregistro zibilean hori eskatzean gu ginen "gaiztoak" (eta noski, behin erregistroan, gazteleraz eskatu behar diezu zure haurra euskeraz erregistratu nahi duzula...)
Jakin badakigu gai honek kezka eta amorrazio ugari sortarazi dituela herritarren artean. Horrexegatik ari gara Justizia Saileko Euskalduntze Zerbitzutik, egoerari buelta eman nahian. Baina ez da berehala lortuko den gauza bat. Justizia Administrazioa ez da egun batetik bestera euskaldunduko.
Dena den, eta aurreko mezuan genion bezala, gaur egun Eibar, Donostia eta Bilbon haurra euskara hutsean inskribatzeko eskubideaz baliatzeko aukera dagoen bezala, gaurtik bertatik aurrera Gasteizen ere eskubide hori bermatzen ari dira. Eta piskanaka Tolosa, Gernika-Lumo, Bergara, Amurrio...alegia, Barruti Judizial buruetan gauzatu ahal izango da eskubide hori.
Baina beste gauza bat bake-epaitegien kasua da. Hauek gehixeago itxaron beharko dute (ez baitago guztiau geure esku, Madrilgo Justizia Ministerioaren esku baizik).
Dena den, ahalik eta ondo eta azkarren egiten saiatuko gara. Eta azkenik. Benetan pozten gaitu gai honek herritarren artean sortzen duen kezkari erantzuteko modua izateak (neurri batean behintzat). Lanean jarraituko dugu.
"Benetan pozten gaitu gai honek herritarren artean sortzen duen kezkari erantzuteko modua izateak".
Guri, behar izan genuenean (duela 8 hilabete) ez zigun bada inork erantzun.
Erantzun bai, baina gure eskubideak bermatuko lituzkeen konponbide bakar bat ez zigun inork eman. Kontua ez dago Espainiako Justizia ministerioaren esku. Tokian tokiko epaitegietako epaileen borondate pertsonalaren esku baizik. Gu zaborraren pare tratatu gintuen Azpeitiko epaileak (oraindik ez digu erantzun ere egin), eta Elebidera, Arartekoarengana, Behatokira eta beste hainbat erakunderengana jo arren, ez genuen ezer lortu. Hitz politak bai, betiko moduan, baina euskaldunon hizkuntza eskubideek zanpatuta jarraitzen dute jeltzaleek euskal erdiko autonomia erkidegoan boterea lortu eta 30 urtera.
Kontu honen inguruko odisea guztia pasa den ekainean kontatu nuen nire blogean, atalka:
http://www.urola-kostakohitza.info/blogak/kalaportu/haurra-euskaraz-erregistratu-nahi-dugu-b-3
Bertan, nabarmen geratzen da erakunde publikoen utzikeria kontu honen inguruan. Baina hori bai: "Ez da utzikeria, ezintasuna baizik", esango digute betikoek, ahalik eta hitz polittenekin.
Patetikoa, besterik gabe.
/cache/Udako-Ola-2024_1_small_content.jpeg)
Lehen hala zen, baina abendutik hasita umeak euskaraz inskribatu ahal izan dira.
Izan ere, erregistro-liburuen sistema informatizatua martxan jarri denetik, inskripzioak euskaraz ere egin daitezke zenbait erregistro zibiletan (jaiotzak, ezkontzak, heriotzak nahiz tutoretzak). InfoReg izeneko programaren bidez egingo dira hemendik aurrera inskripzio guztiak, eta programa horrek euskaraz ere egiteko aukera ematen du. Oraingoz Donostian, Bilbon eta Eibarren dago instalatuta, baina hilabete gutxiren buruan Euskal Autonomia Erkidegoko erregistro zibil guztietan egongo da.
Euskararen normalizaziorako bidean beste urrats garrantzitsu bat dela iruditzen zaigu eta, beraz, eskubide hori erabiltzera gonbidatu nahi zaituztegu.